Naxçıvanlı tədqiqatçılar beynəlxalq müsabiqədə diploma layiq görülüblər
Tarix: 04-02-2021 23:38 | Bölmə: Reportaj

AMEA Naxçıvan Bölməsinin mətbuat xidmətindən Sabaha-inamla.az-a verilən məlumata görə AMEA Naxçıvan Bölməsi Tarix, Etnoqrafiya və Arxeologiya İnstitutunun Qədim dövr arxeologiyası şöbəsinin müdiri, AMEA-nın müxbir üzvü, professor Vəli Baxşəliyev, Arxeoloji xidmət şöbəsinin müdiri, tarix üzrə fəlsəfə doktoru, dosent Zeynəb Quliyeva, institut əməkdaşlarından Turan Həşimova və Elmar Baxşəliyev Rusiya Federasiyasının Sankt-Peterburq şəhərində keçirilən “Mərkəzi Asiyanın qədim və orta əsr mədəniyyətləri (şəhərləşmə və maldar cəmiyyətlərin təşəkkülü, inkişafı və qarşılıqlı əlaqəsi)” mövzusunda beynəlxalq onlayn konfransda iştirak ediblər.
Rusiya Elmlər Akademiyasının Maddi Mədəniyyət Tarixi İnstitutunun, Böyük Pyotr adına Antropologiya və Etnoqrafiya Muzeyinin, Şərq Əlyazmaları İnstitutunun və Dövlət Ermitajının birgə təşkilatçılığı ilə keçirilən konfransda Naxçıvanın qədim dövr arxeologiyası ilə bağlı ən son elmi yeniliklər beynəlxalq elmi ictimaiyyətə təqdim olunmuş, əməkdaşlarımız Naxçıvan arxeologiyası ilə bağlı çoxsaylı sualları cavablandırmışlar.
Konfransın Təşkilat Komitəsi tərəfindən professor Vəli Baxşəliyevin “Naxçıvanın Neolit mədəniyyətinin Orta Şərqlə əlaqələri” və dosent Zeynəb Quliyevanın “Naxçıvanın Eneolit mədəniyyətinin Yaxın Şərqlə əlaqələri” adlı məqalələrinin elmi əhəmiyyəti nəzərə alınaraq Ümumrusiya Elmi Tədqiqatlar Cəmiyyəti tərəfindən Moskva şəhərində keçirilən müsabiqəyə təqdim edilmişdir.
“31.01.2021 – elmi-tədqiqat işlərinin 31-ci beynəlxalq müsabiqəsi”ndə uğurla iştirak edən alimlər sertifikatla mükafatlandırılıb. 518 tədqiqatçının iştirak etdiyi müsabiqədə əməkdaşlarımızın təqdim etdiyi hər iki məqalə maraqla qarşılanmış və arxeologiya üzrə məqalələr nominasiyasında II dərəcəli Diplomla təltif ediliblər.
AMEA Naxçıvan Bölməsinin mətbuat xidməti
“Naxçıvanın Neolit mədəniyyəti” adlı monoqrafiya nəşr olunub
AMEA Naxçıvan Bölməsi Tarix, Etnoqrafiya və Arxeologiya İnstitutunun Arxeoloji xidmət şöbəsinin müdiri, tarix üzrə fəlsəfə doktoru, dosent Zeynəb Quliyevanın “Naxçıvanın Neolit mədəniyyəti” adlı monoqrafiyası işıq üzü görüb.
Naxçıvan Muxtar Respublikası Ali Məclisinin Sədri yanında Bilik Fondu tərəfindən nəşr olunan monoqrafiyada ilk dəfə olaraq Naxçıvan ərazisində Neolit mədəniyyətinin özünəməxsus xüsusiyyətləri və mənşəyi təhlil olunub.
Əsərdə Azərbaycan-Fransa beynəlxalq arxeoloji ekspedisiyası tərəfindən 2013-2018-ci illərdə I Kültəpə yaşayış yerində aparılan qazıntılar zamanı aşkar olunan çoxsaylı materiallarla 1951-1964-cü illərdə aşkar edilmiş arxeoloji materiallar kompleks halda tədqiqata cəlb edilib. Monoqrafiyada Naxçıvan ərazisindəki Neolit dövrü abidələrinin qalıqları, evlərin quruluşu, ocaq tipləri, qəbir abidələri, əmək alətləri, silahlar, keramika məmulatlarının özünəməxsus xüsusiyyətləri haqqında məlumatlar öz əksini tapmışdır. Neolit dövründə mövcud olan iqtisadi və mədəni əlaqələr, təsərrüfat həyatı ilə bağlı məsələlər araşdırılmış, Kültəpə mədəniyyətinin Cənubi
Qafqaz, Urmiya hövzəsi və Mesopotamiyanın qədim mədəniyyətləri ilə qarşılıqlı mədəni əlaqələri müəyyənləşdirilmişdir. Aparılan müqayisəli təhlillər əsasında Kültəpə yaşayış yerinin Cənubi Qafqazda formalaşmış Neolit mədəniyyətinin əsas ocaqlarında biri olduğu, həmçinin Azərbaycanın Mezolit mədəniyyəti ilə bağlı olduğu və yerli zəmində formalaşdığı qeyd olunmuşdur.
Giriş, beş fəsil, nəticə, ədəbiyyat və illüstrasiyalardan ibarət monoqrafiya “Əcəmi” Nəşriyyat-Poliqrafiya Birliyində nəfis tərtibatda çap olunub. Nəşrin elmi redaktoru AMEA-nın müxbir üzvü, professor Vəli Baxşəliyev, rəyçiləri isə tarix elmləri doktoru, professor Qüdrət İsmayılzadə və tarix üzrə fəlsəfə doktoru, dosent Bəhlul İbrahimlidir.
Kitabın “İllüstrasiyalar” adlı hissəsində Naxçıvanın Neolit dövrü abidələrinin yerləşdiyi ərazilərin xəritəsi verilmiş, arxeoloji qazıntılar zamanı aşkar edilmiş bəzi maddi mədəniyyət nümunələrinin fotoşəkilləri oxuculara təqdim edilmişdir. Əsərin ərsəyə gəlməsində Azərbaycan, türk, rus, ingilis dillərində olan 130 elmi mənbə ilə yanaşı, internet resurslarından da istifadə olunub.
Sabaha-inamla.az





Baxış sayı: 122


Bölməyə aid digər xəbərlər