Bütün xəbərlər
AMEA-nın Naxçıvan Bölməsində kitab təqdimatı olub
Tarix: 22-06-2023 22:37 | Bölmə: Ədəbiyyat

AMEA-nın Naxçıvan Bölməsində yeni nəşr olunmuş “Naxçıvanın əlyazmalar xəzinəsi” kitabının təqdimatı keçirilib.

Bu barədə Sabaha-inamla.az-a AMEA-nın Naxçıvan Bölməsindən bildiriblər.
Bildirilib ki, təqdimat mərasimini giriş sözü ilə bölmənin sədri, akademik İsmayıl Hacıyev açıb. Akademik əvvəlcə Əlyazmalar Fondunun ümumi fəaliyyətinə nəzər salıb, fond əməkdaşlarının son illər çap olunmuş əsərlərini diqqətə çatdırıb. Əlyazmalar Fondunun səmərəli fəaliyyətindən söz açan bölmə rəhbəri qeyd edib ki, kitabdakı “Əlyazmalar Fondunun yaranması və inkişaf yolu” adlı ön sözdə qurumunümumi fəaliyyəti ilə tanış olmaq, görülən işlərbarədə geniş məlumat almaq mümkündür. Kitabı ümumi təhlil edən İsmayıl Hacıyev çıxışının sonunda müəllifləri ərsəyə gətirdikləri yeni kitab münasibətilə təbrik edib.
Bölmənin İncəsənət, Dil və Ədəbiyyat İnstitutununaparıcı elmi işçisi, filologiya üzrə fəlsəfə doktoru, dosent Aygün Orucova tədbirdə “Əlyazmalar Fonduna həsr olunan dəyərli əsər” başlıqlı məruzə edib.
Əvvəlcə Azərbaycan əlyazmaşünaslığının keçdiyi inkişaf yoluna nəzər salan Aygün Orucova kitablabağlı əhatəli məruzə edib. Məruzəçi bildirib ki, layihənin müəllifi filologiya elmləri doktoru Fərman Xəlilov, nəşrin elmi redaktoru akademik İsmayıl Hacıyev, rəyçisi professor Hacıfəxrəddin Səfərli, müəllifləriisə Əlyazmalar Fondunun əməkdaşlarından Fərman Xəlilov, Səbuhi İbrahimov, Fəxrəddin Eylazov və Kübra Vəliyevadır.
Üç bölmədən ibarət kitabın ilk bölməsi “Naxçıvan əlyazma və çap materiallarında” adlanır. Burada Məhəmmədtağı Sidqinin “Dilimiz və məktəbimiz” adlı məktubu, ölkəşünas Hacı Mirbağır Mirheydərzadənin Şərur dairəsinə ekspedisiyasının nəticələri, Seyid Səbrinin 1926-cı ildə “Şərq qapısı”qəzetində dərc olunmuş “Ordubad qəzasında asari-ətiqə” adlı məqaləsi,  Naxçıvanı Tədqiq və Tətəbbö Cəmiyyətinin 14 iclas protokolu, mühafizə olunan qədim əlyazma, çap kitabları, bəzi mənbələrdə Naxçıvanla bağlı materiallar və başqa məlumatlaryer alıb.
Kitabın digər iki bölməsində isə fond əməkdaşlarının nəşr olunmuş monoqrafiya və kitabları, elmi məqalə, eləcə də konfrans materiallarının dərc olunduğu mənbələr diqqətə çatdırılır, Əlyazmalar Fondunda mühafizə olunan əlyazma və çap kitabları ilə bağlı tədqiqatlardan söz açılır.
Sonda kitabla bağlı fikirlərini ümumiləşdirən alim vurğulayıb ki, “Naxçıvanın əlyazmalar xəzinəsi” maraqlı tədqiqat əsəri olmaqla yanaşı, həm də Naxçıvan əlyazmaları ilə bağlı elmi araşdırmalara istiqamət verir.
AMEA Naxçıvan Bölməsi Tarix, Etnoqrafiya və Arxeologiya İnstitutunun baş direktoru, AMEA-nın müxbir üzvü Hacıfəxrəddin Səfərli tədbirdə çıxış edərək “Naxçıvanın əlyazmalar xəzinəsi” kitabı haqqında fikirlərini bölüşüb, əlyazma mətnlərini öyrənməyin məsuliyyətindən və tələb etdiyi zəhmətdən söz açıb.
Yeni kitabın ensiklopedik xarakter daşıdığını qeyd edən professor müəlliflərin işini yüksək qiymətləndirib. Alim kitabda qeyd olunan bəzi toponimləri təhlilə cəlb edib, əlyazmalarda əksini tapan türk mənşəli yer adlarından, Naxçıvanı Tədqiq və Tətəbbö Cəmiyyətinin fəaliyyətindən danışıb.
Sonda müəlliflər adından çıxış edən Əlyazmalar Fondunun baş direktoru, filologiya elmləri doktoru Fərman Xəlilov təqdimat mərasiminin təşkilinə görə minnətdarlıq edib, mövzu ilə bağlı sualları cavablandırıb.
Sabaha-inamla.az





Baxış sayı: 447


Bölməyə aid digər xəbərlər