Bütün xəbərlər
Türkiyə PKK ilə bağlı İsveçdən konkret addım gözləyir
Tarix: 13-01-2023 21:50 | Bölmə: Dünya

İsveçin baş naziri Ulf Kristersson yanvarın 12-də Stokholmda Kürdüstan Fəhlə Partiyasına (PKK) dəstək aksiyası iştirakçılarının hərəkətlərini pisləyib.
Sabaha-inamla.az rus mətbuatına istinadən xəbər verir ki,Türkiyə prezidenti Rəcəb Tayyib Ərdoğana qarşı aksiya zamanı törədilən təhqiramiz hərəkətlərdən danışan baş nazir bunları ölkəsinin təhlükəsizliyinə təhdid adlandırıb. Kristersson ölkə telekanallarından birində deyib: "Bu, İsveçin NATO-ya daxil olmaq istəyinə qarşı təxribatdır".
Bu arada Türkiyənin xarici işlər naziri Mövlud Çavuşoğlu bildirib ki, Ankara Stokholmdan təkcə Türkiyədə qadağan olunmuş PKK tərəfdarlarının hərəkətlərinin pislənməsini deyil, konkret hərəkətlər gözləyir. "Bu, irqçilik və nifrət əsasında törədilən cinayətdir. İsveç bu hərəkətə görə məsuliyyətdən yayına bilməz. Sadəcə olaraq onu pisləməklə bundan qaça bilməzlər", - RİA Novosti Çavuşoğlunun sözlərindən sitat gətirir.
Yanvarın 12-də Stokholmda PKK tərəfdarlarının bir neçə yüz nəfərin iştirak etdiyi aksiyada partiyanın simvolları və lideri Abdullah Öcalanın portretləri nümayiş etdirilib, Ərdoğanın ünvanına təhqiramiz ifadələr səsləndirilib. Yerli bələdiyyə binasının qarşısındakı dirəyə isə Türkiyə prezidentinə bənzəyən gəlincik ayaqlarından asılıb.
Bundan sonra İsveçin Ankaradakı səfiri Türkiyə Xarici İşlər Nazirliyinə çağırılıb və ona etiraz edilib. Türkiyə Böyük Millət Məclisinin sədri Mustafa Şentop isveçli həmkarının daha əvvəl Türkiyə paytaxtına planlaşdırdığı səfərini ləğv edib. Ərdoğanın vəkili Hüseyn Aydın isə Ankara Baş Prokurorluğuna aksiya ilə bağlı istintaq açılması tələbi ilə ərizə verib. Sonradan məlum olub ki, bununla bağlı artıq cinayət işi açılıb.


Baxış sayı: 122


Bölməyə aid digər xəbərlər