Keçmiş ABŞ əsgəri ilə rus pilotun dəyişdirilməsi Türkiyədə baş tutub
Tarix: 27-04-2022 23:10 | Bölmə: Dünya

                    Keçmiş ABŞ əsgəri ilə rus pilotun dəyişdirilməsi Türkiyədə baş tutub


Xəbər verdiyimiz kimi, Rusiya 2019-cu ildən bu ölkədə həbsdə olan ABŞ Dəniz Piyadaları Korpusunun keçmiş əsgəri Trevor Ridi kokain qaçaqmalçılığına görə ABŞ-da həbsdə olan rus pilot Konstantin Yaroşenko ilə dəyişdirib.
“Qafqazinfo”nun “Anadolu” agentliyinə istinadən məlumatına görə, məhbusların mübadiləsi prosesi Türkiyədə baş tutub.
Trevor Ridinin atası Coey Rid ABŞ Dövlət Departamenti və ABŞ prezidenti Co Baydenin ona zəng edərək oğlu ilə bağlı məlumat verdiyini bildirib.
Sərbəst buraxılan Ridlə görüşdüklərini deyən ata Rid, “Bu həftə onu Moskvadakı həbsxanaya köçürdülər. Onu oradan Türkiyəyə gətirdilər. Trevor bizə dedi ki, hava limanında, filmlərdə olduğu kimi, ABŞ təyyarəsi Rusiya təyyarəsinə yaxınlaşdı və onlar iki məhbusu dəyişdirdilər” deyib. 
Amerika mətbuatına açıqlama verən və adının açıqlanmasını istəməyən bir amerikalı rəsmi mübadilə ilə bağlı bunları söyləyib: 
“Mübadilə Türkiyədə Prezident Rəcəb Tayyib Ərdoğan hökuməti ilə əməkdaşlıqda, Bayden administrasiyasının rəsmiləri və Kreml rəsmiləri tərəfindən əvvəlcədən qərarlaşdırılan diqqətli təşkil edilmiş bir sıra hərəkətlərlə baş verdi. Rid və Yaroşenko Türkiyəyə demək olar ki, eyni vaxtda gəliblər. Hər iki tərəfin nümayəndələri digər ölkənin iddiaçısının kimliyini təsdiqlədi, bundan sonra Yaroşenko və Rid uçuş-enmə zolağı ilə təyyarələrə tərəf getdilər”.
Mövzu ilə bağlı jurnalistlərə açıqlama verən yüksək rütbəli ABŞ rəsmisi, mübadilənin aylarla davam edən danışıqlar nəticəsində baş verdiyini bildirib.
ABŞ-ın milli təhlükəsizlik müşaviri Ceyk Sallivan Rusiya ilə ABŞ arasında məhbus mübadiləsində vasitəçiliyə görə Türkiyəyə təşəkkür edib.
Sallivan tviter hesabından verdiyi açıqlamada “Trevor Ridi vətəndə salamlayaraq, Ridin sağ-salamat evə qayıtmasında roluna görə Türkiyəyə minnətdarıq. Bu çox vacib məsələdə göstərdikləri köməyə görə türk tərəfdaşlarımıza təşəkkür etmək istərdik” yazıb. 
Adının açıqlanmasını istəməyən ABŞ Dövlət Departamentinin rəsmisi bildirib ki, ABŞ Prezidenti Co Bayden məhbus mübadiləsi çərçivəsində azad edilən Rusiya vətəndaşı Konstantin Yaroşenkoya görə xüsusi əfv fərmanı verib. 
Xatırladaq ki, Rid 2019-cu il avqustun 15-də Rusiyada polislə əlbəyaxa davadan sonra həbs edilib və daha sonra "Rusiya polislərinin həyat və sağlamlığına təhlükə törətmək" ittihamı ilə 9 il həbs cəzasına məhkum edilmişdi. 
Mülki pilot Yaroşenko 2011-ci ildə Liberiyadan ABŞ və Avropaya kokain keçirməyə cəhddə ittiham olunub və 20 il müddətinə azadlıqdan məhrum edilmişdi.


Baxış sayı: 89


Bölməyə aid digər xəbərlər
11-06-2022, 15:07 Bayden Zelenskini qınayıb