Muxtar respublikada həyata keçirilən özünüməşğulluq proqramı çərçivəsində Naxçıvan Muxtar Respublikası Əmək və Əhalinin Sosial Müdafiəsi Nazirliyi tərəfindən 23 sosial qayğıya ehtiyacı olan ailə müəyyənləşdirilib və 19 nəfərin hər birinə 2 baş iribuynuzlu, 4 nəfərin hər birinə 20 baş xırdabuynuzlu mal-qara verilib.
Nazirliyin mətbuat xidmətindən AZƏRTAC-ın Naxçıvan bürosuna bildirilib ki, özünüməşğulluğu təmin edilmiş şəxslərdən 8 nəfərini sağlamlıq imkanı məhdud şəxslər, 3 nəfərini şəhid ailəsi, 2 nəfərini nikahı pozulan qadın, 2 nəfərini ailə başçısını itirən şəxs, 1 nəfərini müharibə veteranı, 1 nəfərini həyat yoldaşı cəzaçəkmə müəssisəsində olan qadın və 6 nəfərini isə sosial qayğıya ehtiyacı olan ailələr təşkil edib.
Bununla əlaqədar keçirilən tədbirdə çıxış edən Naxçıvan Muxtar Respublikası əmək və əhalinin sosial müdafiəsi naziri Nicat Babayev muxtar respublikada sosial qayğıya ehtiyacı olan ailələrə göstərilən qayğıdan, onların məşğulluğunun təmin olunması istiqamətində həyata keçirilən tədbirlərdən danışıb. Qeyd olunub ki, Naxçıvan Muxtar Respublikası Ali Məclisi Sədrinin təsdiq etdiyi müvafiq Dövlət proqramlarının icrası çərçivəsində, özünüməşğulluğa cəlb olunmuş ailələrin təsərrüfatlarında qısa müddət ərzində artımlar olub, bu da həmin ailələrin sosial rifah halının yaxşılaşmasına müsbət təsir edib. Nicat Babayev muxtar respublikada sosial qayğıya ehtiyacı olan şəxslərə göstərilən qayğıya görə Naxçıvan Muxtar Respublikası Ali Məclisinin Sədrinə minnətdarlığını bildirib.
Tədbirdə çıxış edənlər nazirlik yanında Dövlət Məşğulluq Agentliyinin direktoru Vüsal Süleymanlı və Şərur Rayon Məşğulluq Mərkəzinin direktoru Samir Qasımov ötən dövr ərzində proqramın icrası istiqamətində görülən işlərdən danışıb, əldə olunan nəticələrdən bəhs ediblər.
Daha sonra aktiv verilmiş ailə təmsilçilərinə müvafiq sənədlər təqdim olunub. Tədbirdə iştirak edən sakinlər göstərilən diqqət və qayğıya görə minnətdarlıqlarını bildiriblər.