Yeni nazir bu problemlərdən başlasa, pis olmaz...
Tarix: 17-10-2021 09:14 | Bölmə: Digər

Yeni nazir bu problemlərdən başlasa, pis olmaz...


Fərid Qayıbovun yeni gənclər və idman naziri təyin edilməsi Azərbaycan idmanı üçün yeni eranın başlanğıcı olmalıdır. 2015-ci ildə Bakıda keçirilən 1-ci Avropa Oyunlarından sonra geriləməyə başlayan idman yenidən canlanmaq ərəfəsindədir. Yeni nazirin qəbulu zamanı Prezident İlham Əliyev istər Tokio-2020 Yay Olimpiya Oyunlarında, istərsə də digər nüfuzlu yarışlarda uğursuz çıxışlara diqqət çəkdi və federasiyaların fəaliyyətini tənqid etdi.
"Qafqazinfo" xəbər verir ki, təyinatdan sonra Fərid Qayıbov da işinə federasiyalara səfər etməklə başladı. O, əvvəlcə AFFA-nın işi ilə tanış oldu. Qurumun rəsmi səhifəsində yayılan xəbərdə nazirə hesabatlar təqdim olunduğu yer alırdı.
Lakin Azərbaycan futbolunun nəticələri bu gün daha önəmlidir. Futbolumuzun güzgüsü olan milli komandaya nəzər salsaq, hər şey ortadadır. DÇ-2022-nin seçmə mərhələsində qələbə üzünə həsrət qalan, sonuncu ev qələbəsini 2018-ci ildə qazanan yığmanın nəticələri naziri də bu istiqamətdəki işlərə kökləməlidir.




Futbolumuzun ən böyük problemi bu gün çempionatda “Keşlə”, “Səbail” kimi kiçik komandaların mübarizə aparması, Premyer Liqada çıxış etməli olan “Turan”, “Kəpəz” və digər bölgələri təmsil edən komandaların birinci divizionda oynamasıdır.
Uşaq futbolu ilə bağlı durum isə daha vahiməlidir. İstər klubların, istərsə də milli komandaların aşağı yaş qruplarının durumu ürəkaçan deyil. “Qəbələ”ni çıxsaq, digər komandaların akademiyalarında futbolçu yetişməsi üçün şərait çox bərbaddır. Hətta bəzi komandalarda azyaşlılara formaların verilməsində belə çətinliklər var.
Əcnəbi məşqçiləri əlcək kimi dəyişən federasiya, əslində, həqiqi səbəbləri araşdırmalıdır. Üstəlik, bu gün millinin əsas bəlalarından biri milliləşdirmədir. İrandan “Sumqayıt” klubuna gətirilib sonra milliləşdirilən Höccət Haqverdi, Əli Qurbani, Peyman Babayi və başqaları kimi effektsiz futbolçuların da dəvət olunduğu yığma komanda futbolumuzun əsl simasını Avropada göstərməyə davam edir. 



Azərbaycan idmanının ən çox uğur qazandığı növ isə güləşdir ki, nazir bu federasiyanın da apardığı işlərlə tanış oldu. Lakin Olimpiadaya və ondan əvvəlki dövrdə baş tutan böyük yarışlara nəzər salsaq, heç də ürəkaçan mənzərə ilə qarşılaşmırıq. El dili ilə desək, dədə-babadan yadigar qalan sərbəst güləş üzrə yığmanın uğursuz çıxışları hər kəsi narahat edir.
Norveçin paytaxtı Osloda keçirilən son dünya çempionatında da komandamız cəmi iki bürünc medalla yadda qaldı. Diqqətimizi çəkən daha bir məqam isə bu medalların milliləşdirilmiş dağıstanlılar tərəfindən qazanılmasıdır. Abubakr Abubakarov və Osman Nurməhəmmədov yarışı ilk üçlükdə başa vura bilmişdilər.
Güləş Federasiyasında maddi problemlərlə birlikdə kütləvi milliləşdirmənin qarşısı da alınmalıdır. Maraqlıdır ki, gənclərdən ibarət milli komandalarda da dağıstanlı legionerlərə rast gəlirik.
Fazil Məmmədovun Azərbaycan Güləş Federasiyasının Prezidenti vəzifəsindən getməsindən sonra rəhbərlik arasında baş verən problemlər də xüsusi nəzarətə götürülməlidir.



Son Olimpiya Oyunlarında yalnız İrina Kindzerska sayəsində bir bürünc medal qazanan cüdo yığmamızın fiaskosunun səbəbi barədə hələ də ictimaiyyətə açıqlama verilməyib. Rəhbərlik isə idmançıların maaşlarını azaldıb, məşqçiləri qovmaqla kifayətləndi.
Rio-de-Janeyro 2016 Yay Olimpiya Oyunlarında Rüstəm Orucov, Elmar Qasımov kimi idmançılar gümüş medallar əldə etmişdi. Lakin Yaponiyada ilk dəfə tam heyətlə təmsil olunsaq da, final üzü belə görmədik.
Bir neçə müddət öncə cüdo millimizin üzvlərindən olan Davud Məmmədsoyun şikayətlərini nəzərə alsaq, ölkənin ən titullu cüdoçularından olan Elmar Qasımovun “Tik-tok” fenomeni olmasına diqqət yetirsək, federasiyada ciddi problemlərin olduğunu deyə bilərik. Görünən odur ki, durumdan narazı olan idmançılar yığmadan uzaqlaşırlar.



Kəmaləddin Heydərovun rəhbəri olduğu Taekvondo və Boks Federasiyasında da ciddi problemlər mövcuddur. Taekvondoda son zamanlar titullu idmançılar narazılıqlarını ifadə ediblər. Radik İsayev və Milad Harçeqani maddi problemlərdən şikayətlənib. Bakıda keçirilən Avropa Oyunlarında adından söz etdirən Ayxan Tağızadə isə demək olar ki, görünmür. Rio-de-Janeyroda Olimpiya yığmamıza qızıl qazandıran Radik İsayevin Tokio-2020-yə lisenziya qazana bilməməsi isə biabırçı nəticə sayıla bilərdi.



Vaxtilə boks üzrə milli komandamız bütün turnirlərdə favoritlərdən sayılırdı. İstər Sidney, istər Afina və digər Olimpiadalarda boksçularımız medalçılar sırasına namizədlər idi. Lakin son illərdə, demək olar ki, turnirlərdə Azərbaycan boksçuları heç də əsas siyahıda yer almırlar.
Düzdür, Tokioda Alfonso Domingez medal qazandı, amma onun da milliləşdirilmiş idmançı olduğunu nəzərə alsaq, vəziyyətin ürəkaçan olmadığını görərik. Son illərdə boks yığmamızda yalnız üç idmançı – Tayfur Əliyev, Lorenzo Sotomayor və Alfonso Domingezin kiçik uğurları olub. Bu idmançılardan ikisi isə boks ölkəsi sayılan Kubanın yetirməsidir. Milliləşdirmək əvəzinə yerli idmançıların yetişdirilməsi üçün isə ciddi addımlar atılmır.



omanda idman növlərində nəticələr aşağı-yuxarı futbolla eyni, hətta ondan da aşağıdır. Həndbol və basketbol Azərbaycanda, demək olar ki, getdikcə yoxa çıxır. Ölkə çempionatlarının olmaması bir yana, milli komandalar da iflic vəziyyətdədir. Son günlərdə həndbol komandamızda olan əcnəbilər də heyətdən göndərilib və artıq maddi problemlərin ağuşunda bu komanda idmandan silinmə mərhələsinə keçib.



Bir zaman “Azərreyl”in ifasında ölkəyə sevinc bəxş edən, “Rabitə” ilə tarix yazılan voleybol da canüstədir. Elə iki gün öncə “Rabitə”nin klublararası dünya çempionatında “Vakıfbank”a qalib gələrək, qızıl medallara sahib çıxmasından 10 il ötürdü. Hazırda isə nə qadınlar, nə də kişilər arasında ölkə çempionatından səs-səmir yoxdur. İdmançıların bəziləri kuryer, bəziləri taksi sürücüsü işləyir. Milliləşdirilmiş qadın top ustalarımız da xaricdə özlərinə klublar tapmağa çalışır. Federasiyanın vitse-prezidenti Faiq Qarayev bir neçə dəfə voleybolla bağlı müraciət etsə də, danışıqlar getdiyini desə də, hələ işıq ucu görünmür.



Dopinq içində boğulan ağır atletikanın durumu da faciəvidir. Tofiq Heydərovun istefasından sonra vəziyyət bir az da çətinləşib. Dopinqin qarşısını ala bilməyən federasiyanın məşqçiləri, idmançıları da artıq çarəsiz durumdadır. Federasiyanın Prezidenti Cahangir Əsgərov bir müddət öncə dəyişikliklərə əl atsa da, hələlik hansı tədbirlərin görüləcəyi, hansı addımların atılacağı barədə xəbərlər yoxdur.




Baxış sayı: 41


Bölməyə aid digər xəbərlər