Bütün xəbərlər
ŞƏHİD VƏ QAZİ ÖVLADLARININ FƏRDİ İNKİŞAFINA DƏSTƏK- ƏMANƏT LAYİHƏSİNİN ÜÇ YAŞI TAMAM OLDU
Tarix: 16-11-2023 21:44 | Bölmə: Sosial

Əmanət layihəsinin yaranmasının üçüncü ili münasibətilə 12 noyabr Bakıda Nizami kinoteatrında möhtəşəm tədbir təşkil olundu. Tədbirin özəl qonaqları əziz və hörmətli Qazilərimiz və Şəhid ailələri idi.
Tədbir başlanan zaman ilk öncə Azərbaycanın Dövlət Himni səsləndi və Şəhidlərimizin müqəddəs xatirəsi bir dəqiqəlik sükutla yad edildi.
Tədbir aparıcısı aktyor Kamil Yaşar ilk öncə tədbirin gözəlliyinə rəng qataraq şəhid övladlarına söz verdi, şerlər səsləndirildi. Şəhid ailələri və Qazilərimizin ürək sözləri dinlənildi.
Layihə rəhbəri Sərxan Bağırlı üç il ərzində gecə gündüz fədakarcasına çalışan Əmanət layihəsinin müəllim kollektivi heyyətinin yüksək mənəvi dəyərlərə xidmət edən fəaliyyətindən danışdı. Əmanət layihəsinin üç illik fəaliyyətini əhatə edən kiçik video çarxlar nümayiş olunduqdan sonra layihənin fəaliyyətinə uyğun "9+1 addımında uşaq tərbiyəsi" adlı möhtəşəm seminar təlim keçirildi.
Seminar uzun illər Rusiyada təhsil almış və peşəkar fəaliyyət göstərmiş psixoloq yazıçı İlqar Kamilin təqdimatında keçirildi.
Uşaq tərbiyəsi üsullarının incəliyinə toxunularaq ;
Tərbiyədə interpretasiya, əminlik.
Ekspozisiya metodu.
İbni Sina üsulu.
Radio effekti.
Sosial muraciət fenomeni, göz təması və s. bölümlərdən danışıldı. Seminara uyğun film nümayiş olundu
Qeyd edim ki, İlqar Kamil seminara yazıçı Həmid Herisçinin şeirindən misralarla başladı.

Uşaqlar ağlarsa, ağlasın
Onların gözündə su var,
Gözyaşı hələ ki, yoxdur....


Seminarı həmin misralarla da tamamladı.
Əmanət ailəsi təbəssüm dolu şirin və manalı gələcəyi müəmmalı sirrlərlə dolu uşaqları kəşf etmək, gələcək dünyamızı uğura doğru aparan layihə çərçivəsində müqəddəs misyalar həyata keçirir. Əmanət layihəsinin zəhmətkeş və fədakar həmtəsisçi rəhbərləri Turan Hüseynov və Sərxan Bağırlının birliyi ilə 150- yə yaxın müxtəlif fənlərin peşəkar təlim və tədris nümunələri müəllim kollektivi fəaliyyət göstərir. Şəhid və Qazi övladları üçün təkmilləşdirmə dil kursları. Şəhid və Qazi həyat yoldaşları üçün inkişaf proqramları. Master kurslar, Düşərgələr, İnfoturlar təşkil olunur. Şəhid və Qazi ailələrinə ziyarətlər təşkil edir. Qeyd edim ki, layihənin fəaliyyətləri ianələr hesabına həyata keçirilir. Hazırda layihənin dəstəyi ilə 250- dən artıq şəhid və Qazi övladları və eyni zamanda həyat yoldaşları təhsil alır.
Şəhid və Qazi övladlarının gələcəyini düşünən zaman layihə rəhbərləri o qədər ali və müqəddəs bir ad seçiblər ki, uca Allahın pak və münəzzəh nurundan doğan ƏMANƏT adı. Pak və müqəddəs bir nur.
Şəhidlər vətəni var eyləyən haqq səsi, azadlıq nurundan doğaraq əbədi dirilik kürsüsünə ucalan uca asimanın sönməyən parlaq ulduzlarıdır. Onların yer üzündə bizlərə bəxş olunan ən qiymətli və müqəddəs varlıq nişanələri isə övladları və əzizləridir. Həmin kəslərin əməlisaleh xəzinədarları isə yüksək əqidə və amalları uğrunda ömürlərini uğurlu gələcəyimizə həsr edərək gecə gündüz fədakarcasına çalışan yüksək mədəniyyət, təlim, tərbiyə və ali nüfuz sahibi ziya mənbəyi müəllimlərimizdir.
Hz. Məhəmməd ( ə. s) tərəfindən bizlərə iki mühüm və ağır əmanət qalıb Müqəddəs kitabımız Qurani-Kərimin və Əhli beyt. Dünya dörd ünsür üzərində qurulub. Düşünürəm üçüncü əmanət şəhid övladları və onların simasında uğurlu və xoşbəxt gələcəyə addım atan uşaqlardır. Dördüncü əmanətimiz isə onların sağlam təhsil, təlim və tərbiyə yüksək mədəniyyətinin xəzinədarı ali nüfuz sahibi müəllimlərimizdir. Fürsətdən istifadə edib Əmanət layihəsinin kollektivinin simasında vətənimizin hər bir bölgəsində fəaliyyət göstərən bütün müəllimlərimizə, şagird və tələbələrimizə müvəffəqiyyətlər diləyirəm.

İnsanı meraca çəkən bir qüvvə,
İnsanı insan tək yapan o zirvə,
İlahi hikmətdən doğan o zirvə,
Səadət çırağı nurdu müəllim.

Sirlər aləminə giriş açarım,
Tükənməz sərvətim xəzinədarım,
Ədəbim, ərkanım düzgün qərarım,
Bir idrak mayağı nurdu müəllim.

Üstündə əməyi uca haqq olan,
Valideyin qədər qayğına qalan,
Zülmətdən, rövnəqə cığır iz salan,
Bir idrak mayağı nurdu müəllim.

Cənnət qapısının hikmət tövhəsi,
Behişti andırar izahlı səsi,
Yaqutdur, incidir hər bir kəlməsi,
Səadət çırağı nurdu müəllim.

Çətin müşgüllərin aqili loğman,
Şəfaət, imamət nurundan doğan,
Elm bağçasına bar verən bağban,
Zəka beşiyinin yurdu müəllim.

O, ali Ustaddı Alahdan sonra,
Yox başqa bir nemət axtar və ara,
Ata- ana ilə bir yerə vara,
Tən ölçü mizanda durdu müəllim.

Zəkiyyə, ödənməz haqqı Ustadın,
Qarşısında baş əy o, Ulu adın!..
Xeyir-duasıdır arzu, muradın,
Xoşbəxtlik növrağı nurdu müəllim.

Qeyd edim ki, ƏMANƏT LAYİHƏSİNİN üç yaşı münasibətilə həmin tədbirə mən də Şəhid Yusifov Mehman Musa oğlunun bacısı olaraq layihənin təsisçi rəhbəri əziz və hörmətli Turan Hüseynov tərəfindən xüsusi dəvət almışdım. Qürur və iftixar dolu hisslərimi sizlərlə bölüşdüyüm üçün hər birinizə təşəkkür edirəm. Əziz və dəyərli Əmanət ailəsi Şəhid əzizləri və qəhrəman Qazilərimiz. Hər birinizi əzəmətli və Uca Rəbbim qorusun Amin!

Zəkiyyə Musaqızı







Baxış sayı: 416


Bölməyə aid digər xəbərlər