Bütün xəbərlər
Gimnaziyada şəhidin doğum gününə həsr olunmuş "YAŞAYANLAR YAŞADANLARI YAŞADACAQLAR!" adlı tədbir keçirildi
Tarix: 25-02-2023 20:12 | Bölmə: Reportaj


     Bu gün Seyid Cəfər Pişəvəri adına Respublika Humanitar Fənlər Gimnaziyasının Şəhid məzunu leytenant Teymur Abbasovun doğum günüdür.
    Bu məqsədlə həmin təhsil ocağında keçirilən "YAŞAYANLAR YAŞADANLARI YAŞADACAQLAR!" adlı anım tədbiri Azərbaycanın ərazi bütövlüyü uğrunda canından keçən şəhidlərimizin əziz xatirəsini bir dəqiqə sükutla yad etməklə başladı.
   Sabaha-inamla.az xəbər verir ki, bu barədə Giminaziyanın direktoru İlqar Talıbov sosial şəbəkədə məlumat yayıb.
     Bütün yüksəkliklərdən ucada dayanan bir zirvə var. Bu zirvəyə qalxmaq hər kəsə nəsib olmur. Yalnız müqəddəs amallar uğrunda çarpışan, qorxu nə olduğunu bilməyən,vətən və xalq yolunda canını fəda etməkdən çəkinməyən cəsarətli, ləyaqətli insanlar yüksələ bilərlər bu uca zirvəyə.Bu yüksəkliyə ucalan insanlar ölmürlər, əksinə ölümləri ilə bir əbədilik qazanırlar. 44 gün davam edən şiddətli döyüşlərdə igidlərimiz əsl qəhramanlıq dastanı yaratdılar, yeni tariximizin şanlı səhifələrini yazdılar. Bu döyüşlərdə mərdliklə vuruşub şəhidlik zirvəsinə ucalanlarımız, canını vətənin ərazi bütövlüyü uğrunda fəda edənlərimiz də oldu. Onlardan biri də ehtiyatda olan leytenant Teymur Feyruz oğlu Abbasovdur.
Teymur Abbasovun anası Başxanım ana deyirdi ki, müharibəyə gülə-gülə getdi. Torpaqların qaytarılmasını səbirizliklə gözləyirdi. Teymurla bağlı arzularım böyük idi. Mənə 2 bala qoyub getdi. Teymuru atasız böyütmüşdüm. İndi balalarını atasız böyütmək qismət oldu. “ Şəhidlər xiyabanına gedəndə Teymuru ağlamağa utanıram. Şəhidlərin hamısı gözəldir. Mənə Teymurdan 2 bala qalıb. Balası olmayanlar nə etsin?! “
    Azərbaycan qadınlarının bir özəlliyi ondan ibarətdir ki, onlar bütün dünya xalqlarının qadınlarından fərqlənir sədaqəti ilə, etibarı ilə, ailəcanlılığı ilə, ocağa, övlada, yoldaşa bağlılığı ilə. Məhz bu mənada Teymurun Sonasının sözlərini həyəcansız və kövrəlmədən dinləmək olmur.
"Mən şəhid xanımıyam! Övladlarım isə şəhid övladlarıdır. Bir ömür göz yaşı, həsrət, nisgil, nisgil ilə bərabər gələn fəxarət hissidir bizimki. Ağırlığı qədər məsuliyyəti var bu adın. Hər addımda, hər nəfəsdə, hər toxunuşda, hər gülüşdə daim bizə yoldaş olan, kədərimizi bükülən belimizdə, yaş olan gözlərimizdə yox, qürurdan dikilən qamətimizdə, fəxarətdən gülən gözlərimizdə gizlətməliyik, çünki mən bir qəhramanın xanımıyam! Çünki biz şəhid ailəsiyik! " Bax budur mərd Azərbaycan qadını.!
Cənab leytenant ! Müharibə gələcək nəsillərə qalmadı. Sizin kimi qəhrəmanların sayəsində zəfər çaldıq. Hətta övladların arzularını da reallaşdırıblar. Şuşada Gövhərağa məscidini də ziyarət ediblər.
Cənab leytenant ! cənnətdəki doğum gününüz mübarək ! Allah sizə rəhmət eləsin Ruhunuz şad məkanınız cənnət olsun.
   Anım tədbirində şəhidin ailə üzvləri, doğmaları, Nərimanov rayon Ağsaqqallar Şurasının sədri Arif Hümbətov, şəhid ailələri, gimnaziyanın rəhbərliyi, İcma nümayəndələri, müəllim və şagirdlər iştirak edirdi.

Sabaha-inamla.az














Baxış sayı: 355


Bölməyə aid digər xəbərlər