Bütün xəbərlər
Vətən müharibəsi şəhidi Hüseyn Abbasovun xatirəsi anılıb
Tarix: 13-02-2022 21:41 | Bölmə: Reportaj



Vətən müharibəsi şəhidi Hüseyn Abbasovun doğum günündə xatirəsi anılıb. Şəhidin qəhrəmanlıq dolu həyat yolu bir daha yada salınıb.
Sabaha-inamla.az AZƏRTAC-a istinadən xəbər verir ki, anım günündə şəhidin ailə üzvləri ilə yanaşı, Hacıqabul Rayon İcra Hakimiyyətinin başçısı Rüstəm Xəlilov, YAP Hacıqabul rayon təşkilatının sədri Elnur Əmirəslanov, rayon hüquq-mühafizə orqanları və idarə-müəssisə rəhbərləri, partiya fəalları rayon Şəhidlər xiyabanında şəhidin məzarını ziyarət ediblər. Daha sonra anım tədbiri şəhidin təhsil aldığı Hacıqabul şəhər 5 nömrəli tam orta məktəbdə davam edib. Əvvəlcə şəhidlərin xatirəsi bir dəqiqəlik sükutla anılıb. Şəhid Hüseyn Abbasovun xatirəsini daşıyan tablo atasına təqdim edilib. Sonra şagirdlər tərəfindən vətənpərvərlik mövzusunda hazırlanan ədəbi-bədii kompozisiya nümayiş olunub.
Çıxışlarda Hüseyn Abbasovun ömür və döyüş yolundan danışılıb. Bildirilib ki, Hüseyn Əlizadə oğlu Abbasov 1993-cü il fevralın 13-də Hacıqabul rayonunda anadan olub. 1999 – 2010-cu illərdə Hacıqabul şəhər 5 nömrəli tam orta məktəbdə təhsil alıb. Orta məktəb illərində Hüseyn yaxşı oxumağı ilə yanaşı, vətənpərvərliyi ilə seçilib. 2010–2014–cü illərdə Azərbaycan Dövlət Texniki Universitetində ali təhsil alıb. 2014-cü ildə həqiqi hərbi xidmətə çağırılıb və bundan sonrakı həyatını hərbi xidmətə bağlayıb. Həqiqi hərbi xidmətini bitirməyə üç ay qalanda Hüseyn Xüsusi Təyinatlı Qüvvələrin kursuna daxil olub və kursu müvəffəqiyyətlə bitirərək kəşfiyyat bölməsində gizir olaraq xidmətini davam etdirib. 2016-cı il Aprel döyüşlərində fəal iştirak edən Hüseyn şücaəti ilə seçilib. Azərbaycan Ordusunun Xüsusi Təyinatlı Qüvvələrinin giziri olan Hüseyn Abbasov 2020-ci il sentyabrın 27-də başlanan Vətən müharibəsi zamanı Murovdağın və Suqovuşanın azadlığı uğrunda gedən döyüşlərdə iştirak edib. Hüseyn Abbasov oktyabrın 6-da Suqovuşan döyüşləri zamanı şəhid olub.
Hüseyn Abbasov döyüşlərdə göstərdiyi şücaətə görə ölümündən sonra "Vətən uğrunda", "Suqovuşanın azad olunmasına görə", "Kəlbəcərin azad olunmasına görə" medalları ilə təltif edilib.
















Baxış sayı: 530


Bölməyə aid digər xəbərlər