13:19 / 22-06-2024
İki uşaq kanalda boğulub
Bütün xəbərlər
XTQ HEYƏTİNİN YARANMASININ 25 İLİ TAMAM OLUR
Tarix: 30-04-2024 22:12 | Bölmə: Gündəm

30 aprel 1999- cu il Azərbaycan tarixinin şanlı səhifəsinə qızıl hərflərlə yazılaraq XÜSUSİ TƏYİNATLI QÜVVƏLƏRİN yaranması günü kimi tarixə düşüb. Fiziki kamillik, mənəvi zənginlik və yüksək siyasi idarəçiliyə, sarsılmaz əqidəyə malik olan Heydər Əliyevin uzaqgörən müdrik və ali siyasəti nəticəsində Azərbaycan Respublikasının Silahlı Qüvvələrinin tərkibində XTQ-nin yaradılması qərara alınaraq I Qarabağ müharibəsi iştirakçıları olmuş zabit və gizirlərin iştirakı ilə Türkiyə Silahlı Qüvvələrinin peşəkar təlimçiləri tərəfindən Azərbaycan Ordusunun tərkibində gərgin əmək və qüsursuz təlimlər nəticəsində böyük bir heyyət yaradıldı. Beləliklə Azərbaycan Silahı Qoşunlarının Xüsusi Təyinatlı Qüvvələri daha mükəmməl şəkildə təkmilləşdirilərək XTQ-yə general leytenant Hikmət Mirzəyev rəhbər təyin edildi. Vətənimizin azadlıq və bütövlüyü uğrunda indiyə qədər gedən bütün döyüşlərdə XTQ heyətinin göstərdiyi cəsarəti, çevikliyi, igidlik və qəhrəmanlıqları misilsizdir. İstər 2016 cı ilin aprel hadisələri olsun, istərsə də 2020-ci il 27 sentyabr Qəhrəmanlıq səlnaməsinin bariz nümunəsi olan II Qarabağ döyüşləri, istərsə də 2022-2023 sentyabr antiterror əməliyyatları zamanı XTQ heyətinin mənsubunda olan əsgər və zabitlərimiz düşməni layiqli cavabı ilə susduraraq Qələbə, Zəfər müjdəsi ilə dövlətimə və millətimə xoş müjdələr ərməgan etmişdir. 30 ildən sonra artıq düşmən tapdağı altında olan torpaqlarımız azaddır. Şah İsmayıl Xətai, Nadir şahdan üzü bəri keşməkeşli tarixləri ötüb keçən Azərbaycan xalqı nəhayət 100 illərin şərəf və qürur hissi olan Zəfər, Qələbə Paradının sevincini yaşamağa nail ola bildi. Artıq üç rəngli Azərbaycan bayrağı Şuşada, Xankəndidə qürurla dalğalanır. Bu bizlər üçün ən böyük uğur və şərəf hissidir. Vətəndaşlarımız azad və firavan bir şəkildə işğaldan azad olunmuş torpaqlarımıza, doğma yurd-yuvalarına üz tutaraq səyahət edib, gəzib dolaşa bilirlər.
Bir ovuc torpağı ovucumuza alıb sıxdığımız zaman barmaqlarımızın arasından torpaq əvəzinə qan damlalarının necə süzülüb axdığını qəlbində və ruhunda vətənpərvərlik hissi olan hər kəs hiss edib duya bilər. Şübhəsiz ki, illər sonra möhtəşəm və əzəmətli bir qələbəni Azərbaycan xalqına yaşadanların ən böyük payı müqəddəs şəhidlərimizin və sağlamlığını vətənə fəda edən qazilərimizin payına düşür. O qanlı-qadalı döyüşlər getdiyi zaman Qarabağ yurdunda hər qaya daşı bir səngər, yamacları qan oldu. Xarı bülbüllər və əsrarəngiz gül-çiçəklər bitirən Qarabağ yurdunun hər qarış torpağı savaş meydanında al qanla suvarılaraq azadlığına qovuşdu. Məhz vətəni vətən yapan torpağa süzülüb axan o müqəddəs qanlardır. Cəmi şəhidlərimizin ruhu qarşısında dərin hörmət və ehtiramla baş əyir, qazilərimizə Allahdan şəfa diləyirəm.
Bu gün XTQ heyətinin yaranmasının 25 ili tamam olur. İçimdə dünyaya sığmayan bir sevinc qürur və iftixar hissi hökm sürür. Sevindirici haldır ki, Azərbaycan xalqının uğurlu gələcəyini işıqlı sabahlara doğru çəkərək azadlıq və bütövlüyünü şərəf və ləyaqətlə qoruyan güclü Ordumuz var və günü-gündən yüksək səviyyədə elmli, ali dəyərlərə sahib olan vətənpərvər gənclərimizin sayı çoxalır. Bir millət bir dövlət olaraq bu bizlər üçün ən böyük qürur və iftixar mənbəyidir. Belə qeyrətli və vətənpərvər ruhda tərbiyə alan gənclərimizin sayı çoxaldıqca inanıram ki, XTQ şəhidi qardaşım Yusifov Mehman Musa oğlunun simasında cəmi şəhidlərimizin müqəddəs və pak ruhları gülümsəyir. Çünki onların yarımçıq qalan arzularını həyata keçirəcək qəhrəman və qeyrətli igidlərimiz daima müqəddəs və pak amal uğrunda gecə- gündüz dayanmadan vətənimizin keşiyində dururlar.
Qeyd edim ki, 44 günlük Vətən Müharibəsi şəhidi qardaşım Yusifov Mehman Musa oğlu 41 illik ömrünün 22 ilini vətənə həsr edərək XTQ heyətinin mənsubunda qüsursuz xidmət edərək şərəf və ləyaqətlə son damla qanına qədər düşmənlə vuruşaraq şəhadətə yüksəlmişdir. Qardaşım şəhid Mehman Musa oğlunun simasında bir daha dərin hörmət və ehtiramla cəmi şəhidlərimizin müqəddəs ruhu qarşısında baş əyirəm. Bu günkü əzəmətli və möhtəşəm gün münasibətilə XTQ heyətinin mənsubunda fəaliyyət göstərən bütün əsgər və zabitlərimizi ürəkdən təbrik edirəm. Xoşbəxtəm ki, mən də bu vətənin vətəndaşıyam və qüsursuz və şərəfli xidmətləri ilə XTQ-nin mənsubunda neçə illər fəaliyyət göstərən Mehman kimi bir qardaşın bacısıyam. Fürsətdən istifadə edib dövlətimin və millətimin azad və firavan yaşaması üçün gecə-gündüz şərəf və ləyaqətlə vətənimə xidmət edən XTQ heyətinin hər bir nümayəndəsini bu günkü möhtəşəm və əzəmətli gün münasibətilə ürək təbrik edirəm. Bayramınız mübarək olsun əzizlərim!
Hər birinizi əzəmətli və Uca Rəbbim qorusun Amin. İNŞALLAH!
Zəkiyyə Musaqızı












Baxış sayı: 702


Bölməyə aid digər xəbərlər