09:48 / 25-10-2021
Nizami Muradoğlu vəfat etdi
“AS Group Investment” şirkəti şəhid ailəsinə üçotaqlı mənzil hədiyyə etdi
Tarix: 31-08-2021 16:22 | Bölmə: Sosial

                   “AS Group Investment” şirkəti şəhid ailəsinə üçotaqlı mənzil hədiyyə etdi



“AS Group Investment” ölkə başçısının şəhid ailələri və qazilərə dəstək olmaq siyasətini, eyni zamanda özünün dövlətimiz və cəmiyyətimiz qarşısında sosial məsuliyyətini əsas tutaraq Vətən müharibəsində qəhrəmanlıq göstərərək şəhid olan polkovnik- leytenant Mehman Qənbərovun Binəqədi qəsəbəsində kirayə evdə yaşayan ailəsinə mənzil hədiyyə edib.
“Qafqazinfo” xəbər verir ki, avqustun 31-i “AS Group Investment” şirkətinin əməkdaşları şəhid ailəsi ilə görüşərək qəhrəman şəhidimizin həyat yoldaşı Xuraman Qənbərovaya yeni mənzilin sənədlərini təqdim ediblər. Onlar üçün gözlənilməz və ani olan bu xəbər illərlə mənzil həsrəti ilə yaşayan ailənin hər bir üzvündə inanılmaz sevinc hissi yaradıb.  
“AS Group Investment” şirkətinin şəhid polkovnik- leytenant Mehman Qənbərovun ailəsinə hədiyyə etdiyi 3 otaqlı mənzil şirkətin özünün inşa etdiyi Göl-Park Yaşayış Kompleksində yerləşir.
“AS Group Investment” uzun illər evsizlikdən əziyyət çəkən şəhid ailəsinə hədiyyə etdiyi yeni mənzilin tam təmiri və lazımi əşyalarla təchiz edilməsini də öz üzərinə götürüb.   
Mehman Qənbərov hələ 2016-cı il aprel döyüşlərində qəhrəmanlığı ilə seçilib. O, polkovnik-leytenant rütbəsini də məhz Talış kəndi istiqamətində gedən şiddətli döyüşlərdə xüsusi qəhrəmanlıq göstərdiyi üçün qazanıb. Ağdam rayonunda doğulub Birinci Qarabağ Müharibəsi nəticəsində uşaq ikən məcburi köçkün həyatını yaşamış şəhidimizin ən böyük arzusu doğma torpaqların işğaldan azad edilməsi idi. İkinci Qarabağ müharibəsinə yollanan zaman onun ailəsinə dediyi son cümlələri belə olub: “Həyatdır, hər şey ola bilər. Mən geri qayıtmaya da bilərəm. Əsas odur torpaqlarımızı azad edək!”  
Sentyabrın 27-də döyüşlərə qatılan şəhid Qənbərov bir neçə kəndin azad edilməsində xüsusi qəhrəmanlıq göstərib. Sentyabrın 30-da o, Füzuli ərazisində düşmənin üzük halqası kimi əhatəyə aldığı döyüş yoldaşlarını mühasirədən çıxararaq qəhrəmancasına şəhid olub. Ölümündən sonra şəhid Qənbərov “Vətən uğrunda”, “Füzulinin azad edilməsi uğrunda” medalları və “Qarabağ” ordeni ilə təltif edilib.  
Qeyd edək ki, “AS Group Investment” şirkəti bu ilin mart ayında Mingəçevir şəhidi çavuş Niyazi İsgəndərovun ailəsinə də özünün orada inşa etdiyi “Park Residence” yaşayış binasından mənzil hədiyyə edib. 
 









Baxış sayı: 64


Bölməyə aid digər xəbərlər