Dekabrın 21-də AMEA Nəsimi adına Dilçilik İnstitutunda Türkiyənin Fırat Universitetinin Çağdaş türk ləhcələri və ədəbiyyatı fakültəsinin dekan müavini, Xarici Tələbələrlə İş Mərkəzinin rəhbəri dosent Süleyman Kaan Yalçının “Çağdaş türk ləhcələrində saitlər”, “Cəfər Cabbarlı Övküləri. Aynaya yansıyanlar” və “Azərbaycan türkcəsi qrammeri” kitablarının müzakirəsi keçirilib.
Bu barədə AZƏRTAC-a Dilçilik İnstitutundan bildirilib. İclasda institutun baş direktoru professor Nadir Məmmədli Azərbaycan-Türkiyə qardaşlığının, dostluğunun dünya üçün nümunə olduğunu bildirib. Nadir Məmmədli Azərbaycan və Türkiyə müasir ədəbi dil əlaqələrin inkişafından danışıb. Qeyd olunub ki, tarixən Azərbaycan-Türkiyə dil əlaqələri müasir ədəbi əlaqələrin inkişafına zəmin yaradıb.
İnstitutun alimləri kitablar barədə fikirlərini bildiriblər. Vurğulanıb ki, Süleyman Kaan türkologiya sahəsində önəmli tədqiqatlar aparmış dəyərli alimlərdəndir.
Filologiya elmləri doktoru Mayıl Əsgərov qeyd edib ki, “Azərbaycan türkcəsi qrammeri” əsərində müasir türk dillərinin quruluşu müqayisə edilib, sözlər və qrammatik kateqoriyalar arasında ümumi və fərqli cəhətlər müəyyənləşdirilib. Kitabda qrammatik kateqoriyaların da şərhinə geniş yer verilib.
Dosent Aynel Məşədiyeva bildirib ki, alimin “Çağdaş türk ləhcələrində saitlər” kitabında müasir türk dillərinin fonetik, orfoqrafik və orfoepik quruluşu müqayisə edilir, fonoloji, fonomorfoloji xüsusiyyətləri, fonem dəyişmələrinin səbəbləri və qanunauyğunluqları araşdırılır.
Dosent Şəbnəm Həsənli Qəribova çıxışında qeyd edib ki, Cəfər Cabbarlının hekayələrində əsas mövzulardan biri də təhsil və maarifçilikdir. “Cəfər Cabbarlı Övküləri. Aynaya yansıyanlar” əsərində S.Kaan “Cocuq” hekayəsində maarifçiliyin yayılmasında təkcə fərdi yanaşmaların deyil, sistemdəki yanlış qərar və addımların da mühüm rol oynadığı nəzərə çatdırılır. Bu hekayədə gənc müəllimin timsalında sanki Cəfər Cabbarlının özü danışır və sistemdəki vəziyyəti o gəncin iki müəllimi simasında üzə çıxarır. C.Cabbarlı yaradıcılığının həm yüksək bədii səviyyəsi, həm də ideya-məzmunu ilə hər zaman dəyərini və aktuallığını qoruduğunu söyləyən Şəbnəm Həsənli vurğulayıb ki, onun milli və bəşəri dəyərləri ehtiva edən dramaturgiyası bu gün də Azərbaycan teatrının repertuarında mühüm yer tutur.
Tədbirdə Bakı Dövlət Universitetinin Türkoloji araşdırmalar elmi-tədqiqat laboratoriyasının elmi işçiləri filologiya üzrə fəlsəfə doktorları Pərvin Bayramov və Ramil Eyvazov bu kitabların müasir dövr üçün aktual olduğunu deyiblər.
Süleyman Kaan Yalçın Dilçilik İnstitutunun rəhbərliyinə və kollektivinə təşəkkür edib, bu cür elmi müzakirələrin hər iki ölkə arasında ədəbi, elmi, mədəni əlaqələrin inkişafına töhfə verəcəyi bildirib.
Sonda türkiyəli alim professor Nadir Məmmədli tərəfindən Azərbaycan dilçiliyinin inkişafında uğurlu fəaliyyətinə görə fəxri fərmanla təltif olunub.