Əsgərlikdən qayıdan kimi ilk şəhid qardaşını ziyarət etdi - Videoreportaj
Tarix: 13-07-2021 11:08 | Bölmə: Reportaj

                      Əsgərlikdən qayıdan kimi ilk şəhid qardaşını ziyarət etdi



Ötən ilin iyulunda Ağstafanın Kolxəlfəli kəndinə gedəndə böyük izdihamla qarşılaşmışdıq. Kəndə şəhid xəbəri gəlmişdi. İyulun 16-da bu kənddən olan MAXE əsgər Nazim İsmayılov Azərbaycan-Ermənistan dövlət sərhədinin Tovuz rayonu istiqamətində düşmən təxribatının qarşısını alarkən 24 yaşında şəhid olmuşdu.
Artıq o gündən bir il keçir. Ötən bir il İsmayılovlar ailəsi üçün çox çətin olub. Çünki Tovuz döyüşlərinin 12 şəhidindən biri olan Nazim vətən uğrunda canından keçəndə, ailənin kiçik oğlu İsmayıl da əsgərlikdə idi.
Şəhid qardaşının dəfninə xüsusi icazə ilə qatılan və tabutun üzərindəki üçrəngli bayrağı bağrına basan İsmayıl İsmayılovun hərbi xidmət müddəti bu ilin yanvarında başa çatsa da, Vətən müharibəsi ilə əlaqədar 6 ay gec tərxis olunub.



Bu müddət ərzində İsmayılın anası ilə atası oğlunun Vətən müharibəsində qızğın döyüşlərdə iştirak etməsindən xəbərsiz olub. Bu ayın 1-də isə İsmayıl evinə qayıtdı, özü də “Suqovuşanın azad olunmasına görə” medalı ilə...
Fotoda şəhidin qardaşı İsmayıl İsmayılov


“Qafqazinfo”nun əməkdaşları bu dəfə də Kolxəlfəliyə yollanaraq şəhid ailəsinə baş çəkib, onlarla söhbət edib. 
Şəhid anası Sevda Əhmədova Nazimin şəkillərinə baxanda göz yaşlarını saxlaya bilmir. Nazimin atası Əfqan İsmayılov isə oğlunun şəhid olduğu gündən sonra onun otağına bir dəfə də olsun girmədiyini deyir.



Şəhid bacısı Şamama İsmayılova da təsəllini kiçik qardaşının hərbi xidmətdən sağ-salamat qayıtmasında, torpaqlarımızın azad olunması ilə şəhid qardaşının qisasının alınmasında görür.









Baxış sayı: 127


Bölməyə aid digər xəbərlər