Azərbaycan və Qazaxıstan parlamentlərarası dostluq qruplarının onlayn görüşü keçirilib
Tarix: 15-06-2021 12:19 | Bölmə: Reportaj


İyunun 14-də Azərbaycan və Qazaxıstan parlamentlərarası dostluq qrupları arasında onlayn görüş keçirilib.
Parlamentin Mətbuat və ictimaiyyətlə əlaqələr şöbəsindən AZƏRTAC-a bildiriblər ki, görüşdə Milli Məclis sədrinin müavini, Azərbaycan-Qazaxıstan parlamentlərarası əlaqələr üzrə işçi qrupunun rəhbəri Adil Əliyev ölkələrimiz arasındakı münasibətlərdən danışaraq, ümummilli lider Heydər Əliyevlə Qazaxıstanın birinci Prezidenti Nursultan Nazarbayev arasında mövcud olmuş şəxsi dostluq münasibətlərinin bu əlaqələrin inkişafına mühüm töhfə verdiyini bildirib.
Adil Əliyev 2015-ci ildən Azərbaycan-Qazaxıstan parlamentlərarası əlaqələr üzrə işçi qrupuna rəhbərlik etdiyini diqqətə çatdıraraq, qarşılıqlı təcrübə mübadiləsi, habelə beynəlxalq təşkilatlarda əməkdaşlıq baxımından qarşılıqlı səfərlərin əhəmiyyətini qeyd edib. Milli Məclis sədrinin müavini Qazaxıstanda keçirilmiş parlament seçkiləri münasibətilə təbriklərini çatdırıb, deputatlara fəaliyyətlərində uğurlar arzulayıb.
Sonra Adil Əliyev qeyd edib ki, 2020-ci ilin 10 noyabr tarixi Azərbaycanda Zəfər Günü olaraq yadda qaldı. Tariximizdə mühüm yer tutan bu böyük hadisə Ermənistanın 30 ilə yaxın davam edən təcavüzünə son qoydu. Beləliklə, Azərbaycan BMT Təhlükəsizlik Şurasının 4 qətnaməsini özü icra etdi.
Sədr müavini diqqətə çatdırıb ki, hazırda müharibə başa çatsa da, Ermənistan humanitar cinayətlər törətməyə davam edir və minalanmış sahələrin tam xəritələrini verməkdən imtina edir. Nəticədə hərbçilərlə yanaşı, mülki şəxslər də həmin minaların partlaması nəticəsində həlak olur. Bu günlərdə isə çəkiliş üçün Kəlbəcərə səfər edən jurnalistlərimizin ikisi növbəti belə mina partlamasının qurbanı oldu.
Onlayn görüşdə çıxış edən Qazaxıstan Respublikası Parlament Məclisi sədrinin müavini, Qazaxıstan-Azərbaycan parlamentlərarası dostluq qrupunun rəhbəri Balaim Kesebayeva ölkəsinin həmişə Azərbaycanla münasibətlərin inkişafına böyük önəm verdiyini diqqətə çatdırıb. Qazaxıstanlı vitse-spiker parlamentlərarası əlaqələrin dərinləşdirilməsi, beynəlxalq parlament təşkilatlarında əməkdaşlığın inkişaf etdirilməsi barədə fikirlərini bölüşüb.
Söhbət zamanı tərəfləri maraqlandıran digər mövzularda da fikir mübadiləsi aparılıb.
Görüşdə Azərbaycan-Qazaxıstan parlamentlərarası əlaqələr üzrə işçi qrupunun üzvləri, Milli Məclisin deputatları Etibar Əliyev, Ülviyyə Ağayeva, Anar Məmmədov, Eldəniz Səlimov, Naqif Həmzəyev və Qazaxıstan parlamentinin bir qrup deputatı da iştirak ediblər.



Baxış sayı: 73


Bölməyə aid digər xəbərlər