Sumqayıtda 15 iyun – “Milli Qurtuluş günü”nə həsr edilmiş voleybol yarışı keçirildi
Tarix: 12-06-2021 12:15 | Bölmə: Reportaj

Sumqayıt şəhər Gənclər və İdman Baş İdarəsi, Gənclərin İnkişaf və Karyera Mərkəzinin Sumqayıt nümayəndəliyi və Sumqayıt regional “ASAN xidmət” mərkəzinin birgə təşkilatçılığı ilə 09-10 iyun tarixlərində Nəsimi adına mədəniyyət və istirahət parkında yerləşən İdman Sağlamlıq Zonasında 15 iyun – “Milli Qurtuluş günü”nə həsr edilmiş gənclər təşkilatları arasında voleybol yarışı keçirilmişdir. Yarışda ümumilikdə 6 komanda qalib adı uğrunda mübarizə aparmışdır. Tədbirin bağlanış mərasimində çıxış edən Milli Məclisin üzvü Müşviq Məmmədli yarış iştirakçılarını salamlayaraq, Pandemiya səbəbindən idman yarışlarının keçirilməsinə qoyulan məhdudiyyətlərin tədricən aradan qaldırıldığını, artıq bu cür yarışların mütəmadi hal alacağına və gənclərimizin də bundan səmərəli istifadə edə biləcəyinə ümid etdiyini bildirdi. Natiq tarixə qızıl hərflərlə düşmüş, cənab Ali Baş Komandan İlham Əliyevin sərkərdəliyi ilə “44 günlük Vətən Müharibəsi”ndə xalqımızın qazandığı möhtəşəm qələbədən danışaraq gənclərimizin bu müharibədə xüsusi payı olduğunu qeyd etdi. Sonra çıxış edənlər Baş İdarənin rəisi Elgün Hümbətov, Gənclərin İnkişaf və Karyera Mərkəzinin Sumqayıt nümayəndəliyinin direktoru Sevinc Qasımova, Sumqayıt regional “ASAN xidmət” mərkəzinin direktor müavini Əjdər Quluzadə və YAP Sumqayıt şəhər təşkilatının Gənclər Birliyinin sədri Fəridə Qafarova bu cür yarışların keçirilməsinin əhəmiyyətindən danışdılar. Bildirildi ki, məqsəd “Azərbaycan gəncliyi 2017 – 2021-ci illərdə” Dövlət Proqramından irəli gələn vəzifələrin icrası, gənclərin hərtərəfli inkişafına nail olmaq, sağlamlıqlarını möhkəmləndirmək, asudə vaxtlarının səmərəli təşkili və həmçinin fiziki potensialının üzə çıxarılmasıdır. Daha sonra Vətən müharibəsi qazisi Bağıri Bəhruz keçdikləri şərəfli döyüş yolu, rəşadətli Azərbaycan ordusunun ən mürəkkəb şəraitdə həyata keçirdiyi uğurlu əməliyyatlar, göstərdikləri şücaətdən, vətən uğrunda qəhrəmancasına döyüşərək canını fəda edib şəhidlik zirvəsinə yüksələn əsgər yoldaşları ilə bağlı xatirələrini danışdı. Gərgin keçən yarışmanın yekun nəticəsinə əsasən I yerə YAP Sumqayıt şəhər təşkilatının Gənclər Birliyinin, II yerə Sumqayıt regional “ASAN xidmət” mərkəzinin, III yerə isə Gənclərin İnkişaf və Karyera Mərkəzinin Sumqayıt nümayəndəliyinin komandaları layiq görülmüşdür. Qalib komandalar Baş İdarənin və Gənclərin İnkişaf və Karyera Mərkəzinin Sumqayıt nümayəndəliyinin diplom, kubok, medal və hədiyyələri ilə mükafatlandırılmışdır.


Sabaha-inamla.az







Baxış sayı: 87


Bölməyə aid digər xəbərlər