“Müharibədə cəbhə yoldaşlarını toyuna dəvət etmişdi”
Tarix: 22-05-2021 12:11 | Bölmə: Reportaj

                      “Müharibədə cəbhə yoldaşlarını toyuna dəvət etmişdi”


44 günlük Vətən müharibəsində canı, qanı bahasına torpaqlarımızın bütövlüyünü bizə bağışlayan oğullardan biri də Nahid Məmmədovdur. Bakıda doğulub-böyüyən 25 yaşlı qəhrəmanımız müharibənin ilk günlərindən ordu sıralarına qoşulmuşdu. Böyük arzuları, xəyalları var idi, amma Vətən, torpaq onların hamısından irəlidə gəlirdi.
“Qafqazinfo” şəhidin anası Səadət Məmmədova ilə həmsöhbət olub, Nahidlə bağlı xatirələrini vərəqləyib.
Şəhid anasının sözlərinə görə, oğlunun ön cəbhədə döyüşməsini şəhid xəbərini alanda öyrənib:
“Oğlum müharibənin ilk günlərindən könüllü olaraq ordu sıralarına qoşulub. Suqovuşan, Ağdərə istiqamətində döyüşlərdə iştirak edib. Ağdərəyə 1 kilometr qalmış bir neçə post alıblar. Döyüşə girməzdən əvvəl meşədə şəhid olan hərbçilərimizin cəsədlərini mühasirədən çıxarıblar. Bizim bunların heç birindən xəbərimiz olmayıb, sonradan cəbhə yoldaşları bizə danışıblar.
Müharibədə olanda hər gün danışırdıq. Bizə heç bir məlumat vermirdi. Deyirdi ki, məni Mingəçevirə aparıblar və ya Bərdədəyəm. Sakit yerdəyəm, narahat olmayın, burada heç nə yoxdur, tezliklə görüşəcəyik. Bizə demirdi ki, döyüşdəyəm, şəhid daşıyıram...”



S. Məmmədova deyir ki, Nahiddə sanitar çantası olub. Arxada iki yoldaşı yaralandığından qayıdıb ki, onlara kömək eləsin. Elə həmin vaxt düşmən gülləsinə tuş gəlib: “Balam 14 oktyabrda, bir qəlpə yarasından şəhid olub. Əyilib yaralıya kömək eləsin, arxada minomyot mərmisi partlayıb və qəlpə ürəyinə girib. Sağ olsun döyüş yoldaşları, onu orada qoymayıblar, döyüş meydanından çıxarıblar. Bizə oktyabrın 15-də Nahidin şəhid olduğunu xəbər verdilər”.
Nahid Məmmədov kəşfiyyatçı idi, döyüşdə öndə gedərdi. Bu səbəbdən özü ilə bərabər əksər cəbhə yoldaşları da şəhid olublar. Valideynləri şəhid övladları ilə bağlı xatirələrini sonralar, ailəni ziyarətə gələn az saylı silahdaşlarından öyrəniblər.
“Döyüş yoldaşlarının dediyinə görə, Nahid çox mübariz idi. Əslində, bunu onlar deməsələr də, mən özüm bilirəm. Nahid son tikəsini bölüşən yox, tam qarşısındakına verən oğul olub. Bir MAXE yoldaşı vardı, deyirdi ki, anadangəlmə xəstəliyi olub - soyuq olan kimi əlləri qıc olurmuş.
Nahid “qardaşın ölməyib hələ” deyərək öz əlcəklərini çıxararaq ona verib, özü soyuqda əlcəksiz döyüşüb. Sonra o qazi Nahiddən qalan yadigar kimi həmin əlcəkləri bizə bağışladı.
Nahidin döyüşdə bir rabitəçi dostu da olub. Onunla çox qısa zamanda bir-birini tanısalar da, Nahidi özünə qardaş hesab edirdi. O danışırdı ki, Nahid döyüşə girəndə öz çantasını həmin rabitəçi əsgərə verib və deyib ki, ola bilər mən qayıtmayım. Yəqin şəhid olacağını hiss edib. Çantasında da corab və geyimlər olub. Yoldaşları danışırdılar ki, kimə mayka, corab lazım olurdusa, çıxarıb çantasından verirdi. Nahid sanki hamıya humanitar yardım edirdi. Onları da yolda alıbmış, evdən aparmayıb. Hərbi xidməti Ağdamda keçmişdi, ona görə hazırlıqlı idi”.



Nahid Məmmədov Memarlıq və İnşaat Universitetinin nəzdində İnşaat Kollecini bitirib. Bakıda parfümeriya şirkətlərindən birində anbardar işinə düzələn qəhrəmanımız işlədiyi müddətdə çox böyük hörmət qazanıb. Anasının sözlərinə görə, onu tanıyanlar, müştərisi olanlar - hamısı onun haqqında xoş sözlər danışırlar.
Nişanlı idi, sentyabrın 26-da 6 ildir sevdiyi qıza nişan aparılacaqdı. 29-u müharibəyə getdi. Düşündük ki, gedib gəlsin, sonra nişanını edərik, qismət olmadı...
Arzuları çox idi. Hamısını da mənə deyirdi. Sevdiyi qızla evlənmək istəyirdi. Müharibəyə gedəndə də cəbhə yoldaşlarını toyuna dəvət etmişdi. Demişdi ki, müharibə bitəndən sonra özümə toy edəcəyəm.
Nahid müharibənin başlamasını çox istəyirdi. Hələ iyul döyüşlərində böyük oğlumla bərabər iki qardaş oturub müharibəni müzakirə edirdilər. Can atırdılar, Allaha yalvarırdılar ki, müharibə başlasın, döyüşə getsinlər. Mən bir ana kimi ağlayırdım və arzu edirdim ki, sülh olsun. Yenə də qismət...”
Şəhid Nahid Məmmədov ötən il oktyabrın 15-də Xəzər rayonu Binə qəsəbəsində Şəhidlər Xiyabanında torpağa tapşırılıb. Döyüşlərdə göstərdiyi şücaətə görə “Vətən uğrunda” və “Suqovuşanın azad edilməsinə görə” medalları ilə təltif edilib.

 








Baxış sayı: 138


Bölməyə aid digər xəbərlər