Bütün xəbərlər
Naxçıvan Muxtar Respublikasının Ədliyyə Nazirliyində müşavirə keçirilib
Tarix: 18-08-2020 12:57 | Bölmə: Reportaj

Hər il olduğu kimi, payız mövsümündə Naxçıvan Muxtar Respublikasının Ədliyyə Nazirliyinin sisteminə daxil olan inzibati binalardakı qazanxanalar və kombi sistemləri nəzarətdən keçirilir, su xətləri, nasoslar, digər texniki vasitələrin işlək vəziyyətdə olması yoxlanılır. Hazırda nazirliyin balansına daxil olan inzibati binaların qızdırılması üçün məhkəmələr üzrə 8, tabe qurum üzrə 7 qazanxana, 2 kombi sistemi quraşdırılıb istifadəyə verilib.
AZƏRTAC-ın Naxçıvan bürosu xəbər verir ki, bu barədə Naxçıvan Muxtar Respublikasının Ədliyyə Nazirliyinin payız-qış mövsümünə hazırlığın vəziyyətinə həsr olunmuş müşavirəsində danışılıb.
Muxtar respublikanın Ədliyyə naziri, baş ədliyyə müşaviri Daşqın Rəhimov müşavirədə çıxış edərək bildirib ki, bu il avqustun 12-də Naxçıvan Muxtar Respublikası Ali Məclisində keçirilən müşavirədə növbəti mövsümə hazırlıqla əlaqədar dövlət orqanlarına müvafiq tapşırıqlar verib. Ədliyyə Nazirliyinin Penitensiar Xidmətinin də üzərinə mühüm vəzifə qoyulub.
“Payız-qış mövsümündə cəzaçəkmə müəssisələrinin fasiləsiz istiliklə təmin olunması, məhkumların isti geyim və ərzaqla təminatı diqqətdə saxlanılmalı, zəruri ehtiyat yaradılmalıdır”, – deyən nazir diqqətə çatdırıb ki, cəzaçəkmə müəssisələrinin bütün tələbatları nəzərə alınaraq, məhkumların geyim və ərzaqla təminatı sahəsində ehtiyac üzrə sifarişlər verilərək təyinatı istifadəsi diqqət mərkəzində saxlanılır. Həmçinin şəxsi heyət qış mövsümünə uyğun geyim dəstləri ilə təmin olunmalı, onların vaxtında xidmət yerinə gediş-gəlişi üçün avtobus saz vəziyyətdə olmalıdır.
Vurğulanıb ki, məhkumların sağlamlığı da diqqətdə saxlanılır. Saxlanma məntəqəsinin tibb-sanitar hissəsində lazımi dərman preparatlarının alınması, məhkumların mütəmadi olaraq həkim müayinəsindən keçirilməsi, qış mövsümü xəstəliklərinin müalicəsi üçün nəzərdə tutulan dərmanların sifariş verilməsi təmin edilir. Pandemiya ilə əlaqədar olaraq cəzaçəkmə müəssisələrinin giriş və çıxışlarına nəzarət gücləndirilib, kompleks dezinfeksiya tədbirləri davam et davam etdirilir.
Sonda məruzə ətrafında çıxışlar olub.



Baxış sayı: 657


Bölməyə aid digər xəbərlər