Bütün xəbərlər
"Təhsildə ən ciddi problem müəllimlərlə bağlıdır"- Misir Mərdanov
Tarix: 20-09-2022 21:59 | Bölmə: Müsahibə



Artıq bir neçə gündür ki, 2022-2023-cü tədris ilinə start verilib.
 Yeni tədris ilinə ölkə təhsili bir sıra problemlərlə qədəm qoyur.
 Lakin bu problemlərin hər biri müxtəlif şəxslər üçün fərqli xarakter daşıyır və onlar bu kimi halları fərqli baxış bucaqlarından görürlər.
 
AzEdu.az-a danışan Azərbaycan Milli Elmlər Akademiyasının Riyaziyyat və Mexanika İnstitutunun Baş direktoru, sabiq təhsil naziri Misir Mərdanov yeni tədris ilinə  müəllim problemi ilə qədəm qoyduğumuzu vurğulayır:
 Düşünürəm ki, bütövlükdə həm ümumi orta, həm də  ali təhsil sistemində ən ciddi problemlərdən biri  müəllimlərlə bağlıdır. Bu probleminin həlli istiqamətində çox ciddi işlərin görülməsinə ehtiyac var. İlk növbədə onların peşəkar şəkildə hazırlanması ilə bağlı tədbirlər həyata keçirilməlidir. Bu işi  ölkəmizdə ali təhsil müəssisələri həyata keçirir. Universitetlərimiz müəllim hazırlığı məsələsinə çox ciddi fikir verməlidilər. Bu kimi nüanslara əvvəllər təkmilləşdirmə və ixtisasartırma  deyirdilər. Hazırda təhsil işçilərinin ixtisaslarının artırılmasına və müasir texnologiyalara yiyələnməsi məsələsinə  ciddi ehtiyac var. Müəllimlərin  seçilməsi və onların yerləşdirilməsinə də  vacib fikir verilməlidir. Mənə elə gəlir ki, təhsildə  ən ciddi problem müəllimlərin peşəkar inkişafı ilə bağlı olan məsələdir. Düşünürəm ki, biz yeni tədris ilinə müəllim problemi ilə qədəm qoyuruq. Çünki  müəllim yerində olmasa,  təhsilin inkişafından danışmaq olmaz”.
 
O, qeyd edir ki, son zamanlar bu problemin həlli istiqamətində bir sıra işlər görülüb:
 
Bu problemin həlli ilə bağlı xeyli işlər görülüb. Cənab Prezident İlham Əliyev  müəllimlərin əməkhaqqılarının  artırılması ilə bağlı qərar verib. Yaxın zamanlarda məktəb direktorlarının  əməkhaqqının artırılması haqqında qərar qəbul edildi. Bunların hamısı təhsil işçilərinin peşəkar inkişafının formalaşması istiqamətində atılmış çox ciddi addımlar sırasındadır. Ancaq  bəzi məsələləri nəzərə almaq lazımdır, hər adamı  məktəbə və ali təhsil müəssisəsinə müəllim kimi götürmək olmaz. Dünyanın hər yerində belədir ki, müəllim olmaq üçün xüsusi pillələrdən, imtahan və sorğulardan mütləq keçmək lazımdır. Bu baxımdan sertifikasiyanın davamlılığı çox vacibdir. Çünki müəllim məktəb və təhsildə əsas simadır.  2022-2023-cü tədris ilinin əsas məsələsi  məktəblərdə müəllimlərin inkişafının artırılması olmalıdır”.
 
 


Baxış sayı: 431


Bölməyə aid digər xəbərlər