Bütün xəbərlər
17 MAY ŞƏHİD RÖYAL ASLANOVUN MÖVLUD GÜNÜDÜR!-Zəkiyyə Musaqızı
Tarix: 17-05-2023 20:27 | Bölmə: Gündəm


Aslanov Röyal Elzar oğlu 17 may 2001- ci ildə Tovuz rayon Abulbəyli kəndində anadan olub. 2008-2013- cü illərdə Nəsrəddin Tusi adına Tovuz rayon tam orta məktəbində təhsil alıb. 2013- cü ildə ailəsi ilə birlikdə Rusiya Federasiyasının Tumen vilayətinin Nadım şəhərinə məskunlaşıb və orada Panqodi qəsəbəsində yerləşən 1- saylı məktəbdə orta təhsilini davam etdirib. O, kiçik yaşlarından idmanla məşğul olub. Rusiya Federasiyasında təhsil aldığı müddətdə dəfələrlə boks və güləş üzrə yüksək nailiyyətlər əldə edərək fəxri yerlər tutub. Xarici ölkədə vətənimizin adını layiqincə təmsil edərək şanlı bayrağımızı fəxr və qürur hissi ilə zirvələrdə dalğalandırıb.





Anası İlhamə xanım ürək yanğısıyla söyləyir ki, - " Röyalın içində dünyaya sığmayan vətən və bayraq sevgisi vardı. Məhz bu vətən və bayraq sevgisinin coşğusu sayəsində 2017- ci ildə boks üzrə şəhər və vilayət yarışlarında ikinci yerə, 1018- ci ilin may ayında birinci yerə çıxıb. Röyal əsgəri xidmətə çağırılmağı səbirsizliklə gözləyirdi. Həqiqi hərbi xidmətə çağırış vərəqəsini aldığı zaman sevincinin həddi-hüdudu yox idi. Əsgəri xidmətə yollanmadan öncə Röyalın sosial şəbəkələrdə paylaşığı son şüarı belə olub:"Ya Qarabağ, ya ölüm". Röyal əsgəri xidmətə çağırıldığı zamandan birdəfəlik vətənə dönməyi qərara aldıq. Röyal 2019- cu ildə müddətli həqiqi hərbi xidmətə yola düşdü. II Vətən müharibəsi başlayana qədər Azərbaycan Respublikasının Silahlı Qüvvələrinin Goranboy rayonunda yerləşən N sayı hərbi hissədə xidmət göstərib. Fizulinin azadlığı uğrunda gedən döyüşlərdə 2020- il 29 sentyabr tarixində son damla qanına qədər vuruşaraq şəhidlik zirvəsinə ucaldı. Röyal balam mənfur düşmən gülləsinə tuş gəldiyi zaman onun son kəlməsi belə olub:"Cənab komandir, məni tut, qoyma qolumdakı müqəddəs bayraq nişanım torpağa dəysin. Çünki mən müqəddəs Bayrağımızı zirvələrə sancmaq üçün yaranmışam. Mənim vücüdumu ağrıdan düşmənin açdığı güllə yarası yox, müqəddəs üçrəngli bayrağımın torpağa toxunmasıdır !" Mənim gözlərimdə bu vətənin hər qarışı, hər bucağı daha müqəddəs və ucadır. Çünki iftixarla deyə bilərəm ki, oğlum vətən qarşısında olan borcunu layiqincə yerinə yetirərək qələbə imzası çəkənlərin cərgəsində yer tutaraq başımızı sonsuza qədər uca edib".
Canını vətən torpağımızın azadlığı uğrunda fəda edən mərd və qüdrətli Azərbaycan əsgəri Aslanov Röyal Elzar oğlu 30 sentyabr 2020- ci il tarixində minlərlə insanın iştirakı ilə dərin hüzn və yüksək ehtiramla Tovuz rayon şəhər qəbiristanlığında dəfn olunub. Şəhidliyindən sonra vətənimizin azadlığı uğrunda gedən döyüşlərdə göstərdiyi igidlik və qəhrəmanlıqlarına görə Dövlət və Müdafiə Nazirliyi tərəfindən aşağıdakı medallarla təltif olunub:
" Suqovuşanın azad olunmasına görə" medalı.
" Laçının azad olunmasına görə" medalı.
" Vətən uğrunda" medalı.
" İgidliyinə görə" medalı.
Əgər bu gün həyata sağ olsaydı şəhidlərimizin 22 yaşı tamam olardı. Cənnətdəki Mövludun mübarək olsun, şəhidim!

Vətən qucaqlayıb bağrına basıb,
Cənnət dünyasında uyutmaq üçün.
Başını söykəyib məzar daşına,
Ana layla çalır oyatmaq üçün.

Axan göz yaşıyla, gül yağışında,
Dəniz ləpələnib, dalğalanarmış.
Şəhid məzarının sinə daşında,
Nur, behişt qoxulu ümman yaranmış.

Süzülən qanının hər damlasında,
Bir arzu, bir murad işığı yanır,
Qarabağ yurdunun hər qayasında,
Bir şəhid istəyi durur, dayanır.


Ey, vətənimin qəhrəman oğulları, müqəddəs şəhidlərimiz, Vətən torpağının adını müqəddəs və uca edən sizlərin üç rəngli bayrağımız və azadlığımız uğurunda axıdılan al qanlarınızdır! Vətən uğrunda canlarından keçən qəhrəman oğullarımızın, müqəddəs şəhidlərimizin adını daima hörmətlə anırıq. Hər bir şəhidin müqəddəs ruhu mənim üçün canım qardaşım Mehmanım qədər ali və ucadır. Hər bir şəhid mənim qardaşımdır. Cəmi şəhidlərimizin müqəddəs ruhu qarşısında dərin hörmət və ehtiramla baş əyirəm. Ruhları şad olsun. AMİN!

Yusifova Zəkiyyə Musaqızı
Sabaha-inamla.az





Baxış sayı: 436


Bölməyə aid digər xəbərlər
7-02-2024, 19:00 Səsvermə başa çatdı