Bütün xəbərlər
Zəfər Günü Azərbaycan tarixinin qəhrəmanlıq salnaməsidir-Şahin İsmayılov
Tarix: 08-11-2022 23:07 | Bölmə: Gündəm

Zəfər günü Azərbaycan xalqı üçün ən əziz günlərdən biridir. 44 günlük Vətən müharibəsi qələbə ilə nəticələnməklə gücümüzü bütün dünyaya göstərdi. 30 ilə yaxın müddət ərzində heç bir haqqlı tələbimizə və beynəlxalq hüquqa məhəl qoymadan torpaqlarımızı işğal altında saxlayan Ermənistan dövləti və onun siyasi rəhbərliyi məğlubiyyətə duçar oldu. Nəhayət ki, Azərbaycan haqq savaşında düşməni məğlub edərək qalib dövlətə çevrildi. Zəfər Günü Azərbaycan tarixinin qəhrəmanlıq salnamədir.
Şanlı qələbəni qazandıran bir neçə amili səciyyələndirmək olar: Azərbaycan ordusunun gücü, diplomatiya, sosial-iqtisadi inkişaf, Ulu Öndər Heydər Əliyevin uzaqgörən siyasəti, Müzəffər Ali Baş Komandan İlham Əliyevin qətiyyətli mövqeyi və liderliyi, Xalqın qələbə əzmi və dövlət-xalq-ordu birliyi. Müstəqilliyimizi əldə etdikdən sonrakı dövrü analiz etdikdə görürük ki, Ümumilli Lider Heydər Əliyevin rəhbərliyi altında Azərbaycanda ordu quruculuğu sahəsində görülən işlər sürətlə həyata keçirildi. Bu sahəyə göstərilən xüsusi qayğı və diqqət ordumuzun güclənməsini təmin etdi. İndi Azərbaycan ordusunun döyüş taktikası dünyanın diqqətini cəlb edir. Təbii ki, hərb sahəsinin inkişafı ölkə iqtisadiyyatı ilə də sıx bağlıdır. Diplomatik sahədə görülən işlər də daxil olmaqla bütün istiqamətlərdə paralel işlər görülmüşdür. Bu işlər Ulu Öndərin dəsti xətti ilə onun siyasi məktəbinin parlaq nümayəndəsi olan cənab İlham Əliyev tərəfindən uğurla həyata keçirilib. Azərbaycan xalqı da bu siyasəti hər zaman dəstəkləmişdir. Dövlət-xalq-ordu birliyi 44 günlük müharibədə aydın şəkildə hiss edildi. Müharibədə ordu sıralarında peşəkarlaşan hərbiçilərlə yanaşı könüllü şəkildə döyüşə qatılan çox sayda vətəndaşlarımız var idi. Bu ilk növbədə vətənpərvərlik ruhunun yüksək səviyyədə olmasından xəbər verirdi.
Azərbaycan dövləti postmüharibə dövründə iqtisadi gücünü bir daha göstərdi. Böyük qayıdış üçün görülən quruculuq işləri miqyas və keyfiyyətinə görə kifayət qədər uğurludur. Bu işlər hələ müharibə bitməmiş başlamışdı. Müharibədən sonra daha da sürətlənən abadlıq-quruculuq işləri hər bir Azərbaycan vətəndaşını qürurlandırır. Düşmənin işğal müddətində məhv etdiyi torpaqlara əsl sahibi tərəfindən yenidən nəfəs verilir. Vətən həsrəti çəkən azərbaycanlılar artıq öz yurdlarına qayıdır. Böyük qayıdış artıq başlanıb. Yaxın müddət ərzində doğma el obalarından didərgin düşən vətəndaşlarımızın hamısı bu sevinci yaşayacaq. Nə işğal altında olarkən yaşayış məskənlərinin dağıdılması, nə də mənfur düşmənin basdırdığı minalar böyük qayıdışa mane ola bilməz.
Fürsətdən istifadə edərək xalqımızı Zəfər günü münasibətilə təbrik edir, ölkəmizə əmin-amanlıq arzulayır və qələbədə payı olan hər kəsə minnətdarlığımı bildirirəm.Azərbaycan xalqı bizə bu qələbəni yaşadan qəhrəman övladlarımızı heç vaxt unutmayacaq və Şəhidlərimizin xatirəsini daim yaşadacaq. Bir daha Allahdan bütün Şəhidlərimizə rəhmət, qazilərimizə can sağlığı arzulayıram.

Şahin İsmayılov,
Milli Məclisin deputatı,
YAP İdarə Heyətinin üzvü


Baxış sayı: 104


Bölməyə aid digər xəbərlər