Bütün xəbərlər
XTQ-nın şəhid gizirinin anası: "Bala dərdi çox çətindir"-VİDEO+FOTOLAR
Tarix: 24-10-2022 00:22 | Bölmə: Gündəm
Baş redaktor Namiq MƏMMƏDLİ


"Düşmənlər bizi Ağdamdan qovanda Şəhriyarın iki yaşı varıydı"

 Sumqayıtda şəhidlik zirvəsinə ucalmış XTQ-nın giziri Şəhriyar Quliyevin şəhid olmasının ikinci ildönümü keçirilib. Tədbirdə şəhid ailələri, qazilər,Sumqayıt şəhər İcra Hakimiyyətinin məsul şəxsləri, ictimayyət nümayəndələri iştirak ediblər.




    "Qarabağ" ordenli şəhid gizir Şəhriyar Quliyevin anası Xalidə xanım Sabaha-inamla.az-a müsahibəsində belə deyib:
"Bu iki il Şəhriyarsız yaşamaq mənim üçün çox çətindir.Çünki bizim ürək parçamız gedib, canımızdan bir can ayrılıb. Düzdür biz sevinirik ki, torpaqlarımızı aldılar, bala dərdi də çox çətindir. Bizi Qarabağdan qovanda Şəhriyarın iki yaşı varıydı. Bir ana kimi mən öz balamla, şəhidlərimizlə fəxr eləyirəm.Yaşasın Azərbaycan, yaşasın Qarabağ".


                         
 
    Şəhriyar Quliyev 1990-cı il mayın 25-də Ağdam rayonunun Cinli kəndində anadan olub.1997-2008-ci illərdə Sumqayıt şəhərində M. Füzuli adına 15 nömrəli tam orta məktəbdə təhsil alıb. Ailəli idi. 2 oğlu yadigar qaldı.
    Şəhriyar Quliyev 2008-2009-cu illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. 2009-cu ildən isə Xüsusi Təyinatlı Qüvvələrin sıralarında müddətdən artıq həqiqi hərbi xidmət qulluqçusu olub. 2016-cı ilin 2-6 aprelində baş verən Aprel döyüşlərində savaşıb.




Azərbaycan Ordusunun giziri olan Şəhriyar Quliyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Cəbrayılın, Hadrut qəsəbəsinin, Füzulinin və Qubadlının azadlığı uğrunda gedən döyüşlərdə savaşıb.150-ə yaxın erməni əsgər və zabitini məhv edib. Məhv edilənlər arasında polkovnik də olub. Şəhriyar Quliyev oktyabrın 23-də Qubadlı döyüşləri zamanı şəhid olub. Sumqayıt şəhərinin Şəhidlər Xiyabanında dəfn olunub.




     Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Prezidenti İlham Əliyevin 09.12.2020-ci il tarixli Sərəncamına əsasən Şəhriyar Quliyev "Qarabağ" ordeni ilə təltif edildi.
   Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Şəhriyar Quliyev ölümündən sonra "Vətən uğrunda" medalı ilə təltif edildi.



Azərbaycanın Cəbrayıl rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.12.2020-ci il tarixli Sərəncamına əsasən Şəhriyar Quliyev ölümündən sonra "Cəbrayılın azad olunmasına görə" medalı ilə təltif edildi.
   Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən Şəhriyar Quliyev ölümündən sonra "Füzulinin azad olunmasına görə" medalı ilə təltif edildi.
   


    Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən Şəhriyar Quliyev ölümündən sonra "Xocavəndin azad olunmasına görə" medalı ilə təltif edildi.

Namiq MƏMMƏDLİ
Sabaha-inamla.az






Baxış sayı: 241


Bölməyə aid digər xəbərlər