Aprelin 22-23-də Türk dünyasının mədəniyyət paytaxtı Şuşada Dünya Azərbaycanlılarının V Qurultayının – Zəfər Qurultayının keçirilməsi böyük əhəmiyyətə malikdir. Azərbaycan xalqı Vətən müharibəsində 30 il davam edən mənasız danışıqlar əvəzinə öz gücünü ortaya qoydu, ədaləti və beynəlxalq hüququ bərpa etdi. Bütün dünyaya sübut etdi ki, biz böyük xalqıq və Azərbaycan xalqı heç vaxt işğalla barışmaq fikrində deyil. 60-dan çox ölkədən gələn soydaşlarımız 30 il erməni işğalında qalan şəhərin necə talan olunduğunun, azərbaycanlıların izlərinin tamamilə yox edilməsinin, həmçinin işğaldan azad olunandan sonra Prezident İlham Əliyevin fərman və sərəncamları ilə dərhal başlayan quruculuq və bərpa işlərinin şahidi oldular.
Bu sözləri AZƏRTAC-ın Naxçıvan bürosuna müsahibəsində Milli Məclisin deputatı, Naxçıvan Muxtar Respublikası Gənclər Fondunun icraçı direktoru Cəbi Quliyev deyib.
O vurğulayıb ki, Prezident İlham Əliyevin Zəfər Qurultayında iştirakı və çıxışında verdiyi mesajlar bütövlükdə dünya azərbaycanlılarının ictimai-siyasi fəaliyyətlərində mühüm rol oynayacaq. Dövlətimizin başçısı çıxışında bildirdi ki, bundan sonra biz ancaq və ancaq güclənəcəyik: “Postmüharibə dövrü bunu bir daha göstərdi. Həm ərazilərin bərpası, həm də beynəlxalq müstəvidə bizim addımlarımız bizim gücümüzü göstərir. Çünki postmüharibə dövrü çox həssas bir dövrdür və artıq il yarım keçəndən sonra tam əminliklə demək olar ki, biz bu çətin sınaqdan da şərəflə çıxdıq. Aparıcı beynəlxalq təşkilatlar postmüharibə reallıqlarını qəbul etdilər. BMT hansı ki, Şuşada beynəlxalq tədbir keçirmişdir. Avropa İttifaqı - hazırda Azərbaycan-Ermənistan arasında normallaşma prosesində çox fəal iştirak edir. ATƏT - hansı ki, çox yaxşı başa düşür ki, Minsk qrupu artıq yoxdur. Mən düzdür, bir neçə ay bundan əvvəl hələ Rusiya-Ukrayna müharibəsindən əvvəl demişdim. Məndən soruşmuşdular ki, Minsk qrupu nə ilə məşğul olacaq. Dedim ki, 2022-ci ildə onların yaranmasının 30 illik yubileyidir. Yubiley keçirəcəklər, sonra pensiyaya gedəcəklər. Amma Rusiya-Ukrayna müharibəsi başlayandan sonra heç yubiley keçirməyə də onlarda fürsət olmadı”.
Milli Məclisin deputatı deyib ki, həqiqətən də bu gün hər birimiz – səfirliklər, diaspor təşkilatları, bütün fəallar yeni reallıqları dünya ictimaiyyətinə çatdırmalıdırlar. Xaricdə yaşayan azərbaycanlıların bu sahədə daha böyük imkanları var. Son illər ərzində bizim diaspor təşkilatlarımız çox fəallaşıb. Hətta erməni radikal qüvvələrinin fiziki hücumlarına baxmayaraq, azərbaycanlılar öz sözlərini demişlər, bunu bu gün də etmək lazımdır. Beynəlxalq təşkilatlar Ermənistanın işğalçılıq siyasətini pərdələmək və Azərbaycanı işğal faktı ilə barışdırmaq məqsədi güdürdü. 44 günlük müharibə zamanı dünya həm də Azərbaycan gənclərinin nə qədər vətənpərvər, elinə-obasına bağlı olduğunu gördü. Prezident İlham Əliyevin də dediyi kimi, biz sübut etmişik ki, ölümə getməyə hazırıq, öldü var, döndü yoxdur. Müstəqillik dövründə vətənpərvərlik ruhunda yetişən gənclərimiz bilərəkdən Vətən uğrunda ölümə gedirdilər. İkinci Qarabağ müharibəsində həlak olanların böyük əksəriyyəti gənc nəslin nümayəndələridir. Onların heç biri Qarabağda olmamışdı, bu diyarı görməmişdilər, amma qəlblərindəki milli ruh, ədalət və Vətən sevgisi hər şeydən üstün idi. Xaricdəki gənclərimiz Azərbaycan gəncinin qəhrəman obrazını qorumaq üçün əlindən gələni etməlidirlər. Nəzərə alsaq ki, xaricdə yaşayan azərbaycanlılar böyük qüvvədir, onların fəaliyyəti ölkəmiz üçün çox önəmlidir. Ümumiyyətlə, 44 günlük Vətən müharibəsində şanlı Qələbənin qazanılmasında və Zəfərimizin diplomatik müstəvidə möhkəmləndirilməsində milli həmrəyliyimizin müstəsna rolu oldu. Dünya azərbaycanlılarının, eləcə də diaspor təşkilatlarının sistemli fəaliyyəti bu prosesə böyük töhfələr verdi. Bütün bu nailiyyətlərin ciddi əsasları var. Belə ki, dünya azərbaycanlılarının milli birlik və həmrəyliyinin təmin olunmasında vacib faktorlardan biri də dövlətimiz tərəfindən həyata keçirilən uğurlu diaspor siyasətidir.
“Şuşada Qarabağ Zəfəri, milli həmrəylik, xalq-lider birliyi və Azərbaycanın qüdrəti nümayiş etdirilir”, - deyən Cəbi Quliyev vurğulayıb ki, bu, mənəvi-siyasi əhəmiyyətə, rəmzi mənaya malik olmaqla yanaşı, dövlətçilik tariximizin mühüm səhifələrindən birinə çevriləcək. Zəfər Qurultayı dünya azərbaycanlılarının birliyinin və gücünün göstəricisidir.