Sosial şəbəkələrdə söyüş, təhqir yazanlara - DİN-dən müraciət
Tarix: 28-06-2020 15:11 | Bölmə: Gündəm

                Sosial şəbəkələrdə söyüş, təhqir yazanlara


Daxili İşlər Nazirliyi bir qrup gənc müğənnini, bəzi deputat və ziyalıları təhqir edənlərin tutulmasından sonra sosial şəbəkələrdə polisin onu tənqid edən insanları fikirlərinə görə cəzalandırması iddialarına münasibət bildirib.
DİN-in Mətbuat Xidmətinin rəisi Ehsan Zahidov bununla bağlı “Qafqazinfo”ya açıqlamasında deyib:
“Bu iddiaların hamısı əssasızdır və qərəzdən irəli gəlir. O cür düşünənləri sosial şəbəkələrdə söysələr, təhqir etsələr, dözərlərmi? Əlbəttə ki, yox. Təhqirlə tənqidi qarışdırmayaq. Biz hamımız sağlam, fakta söykənən tənqidin tərəfdarıyıq və belə tənqidi fikirlər səsləndirən hər kəsi alqışlayırıq. Çünki tənqid hansısa bir nöqsanın, problemin həllinə səbəb olan fikirdir. Amma KİV-də, sosial şəbəkələrdə kimisə təhqir etmək, onun şərəf və ləyaqətini alçaltmaq bu artıq tənqid deyil, yolverilməz bir qanunsuz hərəkətdir. Bu cür təhqir yazmaqla məşğul olduqları üçün saxlanılanlarla aparılan izahedici və profilaktik söhbətlərdən sonra onların özləri də səmimi olaraq etiraf edirlər ki, böyük xətaya, səhvə yol veriblər, gec də olsa, hamıdan üzr istəyirlər. Ona görə də bir daha deyirəm, sağlam tənqidi fikri, yazını, şərhi hamı nəinki alqışlayır, eyni zamanda gözləyir də. Amma heç kim təhqir edilmək istəmir və istəməz də. Ona görə də KİV-də, sosial şəbəkələrdə kimisə təhqir etmək, onun şərəf və ləyaqətini alçaltmaq dünyanın ən demokratik dövlətlərində olduğu kimi, bizdə də məsuliyyət yaradır.
Bir daha xahiş və tələb edirik ki, kiməsə ünvanlanmış təhqiramiz yazılar, şərhlər, statuslar yazan və yazmaq fikrində olanlar belə ikrah doğuran hərəkətlərinə son qoysunlar, əl çəksinlər. Kimsə fikirləşməsin ki, monitorun önündə oturub istədiyim şəxsi təhqir edəcəm və məni heç kim tanımayacaq və görməyəcək. Əgər belələri varsa, yanlış düşünürlər. İndiki müasir texniki imkanlar sayəsində hətta uydurma ad altında sosial şəbəkələrdən istifadə edənin şəxsiyyətini müəyyən etmək olur. Ona görə də, başqasını təhqir edən gec, ya tez müəyyən edilərək məsuliyyətə cəlb olunacaq”.


Baxış sayı: 388


Bölməyə aid digər xəbərlər
17-05-2020, 13:22 Baş Nazirdən yeni qərar