Qənirə Paşayeva şəhid Eltac Azadlının xanımı Gülər Azadlı ilə görüşüb
Tarix: 22-09-2022 17:50 | Bölmə: Cəmiyyət

     Millət vəkili, Milli Məclisin Mədəniyyət komitəsinin sədri Qənirə Paşayeva Azərbaycan Vətən Müharibəsinin şəhidi Eltac Azadlının xanımı Gülər Sədrəddin qızı Azadlı ilə görüşüb.
     Milli Məclisdə vətəndaş qəbulu günündə baş tutan görüşdə, şəhid ailəsinin qayğıları, şəhid əsgərin həyat yoldaşının ürək sözləri dinlənilib.
Komitə sədri Azərbaycan dövlətinin ali rəhbərliyinin şəhid ailələrinə diqqət-qayğısından danışıb, həmin diqqət-qayğını hər bir Azərbaycan vətəndaşı, o cümlədən Millət vəkilləri üçün örnək təşkil etdiyini vurğulayıb. O, şəhidlərin ailə üzvləri ilə hər bir görüşün onunçün doğma, əziz olduğunu deyib, şəhidin əziz ruhuna dərin sayğılarını bildirib.
    Q.Paşayeva şəhid əsgərin xanımına Qarabağ motivli xatirə hədiyyəsi təqdim edib.
    Qeyd edək ki,Azərbaycan Silahlı Qüvvələrinin əsgəri, Vətən müharibəsi şəhidi Eltac Sədrəddin oğlu Azadlı (22.03.1992, Dünyamalılar, Beyləqan r. – 31.10.2020, Füzuli r.) 1999-2010-cu illərdə Beyləqan rayon Əlibaba Şirinov adına Dünyamalılar kənd 1 saylı məktəbdə təhsil alıb. Hələ uşaqlıqdan məktəb yoldaşlarının və müəllimlərinin sevgisini qazanıb.
Eltac Azadlı 2010-2012-ci illərdə Azərbaycan Silahlı Qüvvələrinin sıralarında müddətli həqiqi hərbi xidmət qulluqçusu olub. Gəncə şəhərində yerləşən “N” saylı hərbi hissədə özüyeriyen artilleriya tağımında xidmət edib.
     Eltac Azadlı 2020-ci il sentyabrın 27-də başlanan Vətən müharibəsində könüllü olaraq iştirak edib, Füzuli, Xocavənd və Qubadlının azadlığı uğrunda gedən döyüşlərdə top komandiri kimi vuruşub. Eltac Azadlı döyüşlərin 35-ci günü döyüş tapşırığını yerinə yetirərkən şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yetirən əsgər Eltac Azadlı Azərbaycan Prezidenti İlham Əliyevin 15.12.2020-ci il tarixli Sərəncamı ilə “Vətən uğrunda” medalı ilə təltif edilib. Şəhid əsgərimiz həmçinin
“Füzulinin azad olunmasına görə” (25.12.2020), “Cəsur döyüşçü” (24.06.2021), “Xocavəndin azad olunmasına görə” (24.06.2021) medalları ilə təltif edilib.
    Ruhu şad olsun!

Sabaha-inamla.az



Baxış sayı: 39


Bölməyə aid digər xəbərlər
29-09-2022, 22:18 Nərminə dəstək olaq!