Daşkəsəndə Vətən müharibəsi şəhidi Elməddin Vəkilovun xatirəsi anılıb
Tarix: 28-07-2022 17:09 | Bölmə: Cəmiyyət



İyulun 28-də Daşkəsən rayon Şəhidlər xiyabanında Vətən müharibəsi şəhidi baş əsgər Elməddin Vəkilovun doğum günündə əziz xatirəsi anılıb. Şəhidin 34-cü doğum günü məzarı önündə qeyd olunub.
Rayon icra hakimiyyətindən AZƏRTAC-ın bölgə müxbirinə verilən məlumata görə, əvvəlcə şəhidin ruhuna dualar oxunub, məzarına gül dəstələri düzülüb.
Mərasimdə Daşkəsən Rayon İcra Hakimiyyətinin başçısı Əhəd Abıyev, Dövlət Təhlükəsizlik Xidməti rayon şöbəsinin rəisi Natiq Musayev, rayon prokuroru Şahin İmanov, Səfərbərlik və Hərbi Xidmətə Çağırış üzrə Dövlət Xidməti rayon bölməsinin rəisi Mirqasım Abbasov, Qafqaz Müsəlmanlar İdarəsinin Qazılar Şurasının üzvü hacı Sədi Axundzadə, rayonun idarə, müəssisə və təşkilatlarının rəhbərləri, şəhidin yaxınları, qazilər və ictimaiyyət nümayəndələri iştirak ediblər.
Daşkəsən Rayon İcra Hakimiyyətinin başçısı Əhəd Abıyev şəhidin ailəsinə bir daha dərin hüznlə başsağlığı verib. O, 2020-ci il sentyabrın 27-də Müzəffər Ali Baş Komandan İlham Əliyevin rəhbərliyi altında başlayan 44 günlük Vətən müharibəsində qanları ilə tarix yazan şəhidlərimizin, həmçinin şəhid Elməddin Vəkilovun döyüş meydanında göstərdiyi qəhrəmanlıqlardan söz açıb. İcra başçısı bu şanlı Qələbəni bizə bəxş edən oğullarımızın heç zaman unudulmayacağını vurğulayıb, parlaq tarixi Zəfərimizin müəllifi Müzəffər Ali Baş Komandan İlham Əliyevə, hərbçilərimizə, şəhidlərimizə, qazilərimizə borclu və minnətdar olduğumuzu bildirib. İkinci Qarabağ müharibəsində Daşkəsən rayonundan 32 nəfər igid Vətən oğlunun müqəddəs şəhidlik zirvəsinə ucaldığını, ölümündən sonra "Vətən uğrunda", "Kəlbəcərin azad olunmasına görə” və “Şücaətə görə” medalları ilə təltif edilmiş baş əsgər Elməddin Vəlikovun uca şəhidlik məqamına yüksəldiyini deyib.
Digər çıxış edənlər şəhid Elməddin Vəkilovun şərəfli ömür yolundan danışıblar. Qeyd ediblər ki, o, uzun illər ordu sıralarında şərəfli hərbi xidmət yolu keçib. Elməddin Vəkilov Vətən müharibəsində göstərdiyi şücaətləri ilə xüsusən fərqlənib. Bir sıra döyüşlərdə düşmənin canlı qüvvəsinin məhv edilməsində, parlaq qələbələrin qazanılmasında yaxından iştirak edib, şəxsi igidlik nümunələri göstərib. Elməddin Vəkilov Vətən müharibəsinin ilk günlərində Murovdağ istiqamətində gedən ağır döyüşlərdə qəhrəmancasına müqəddəs şəhidlik zirvəsinə ucalıb.
Şəhidin anası Nərgiz Vəkilova çıxış edərək hər zaman ailəsinə göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya minnətdarlığını bildirib.






Baxış sayı: 94


Bölməyə aid digər xəbərlər
14-07-2022, 00:02 Abid Qafarov həbs edildi