Bütün xəbərlər
“Bir böyrəyim yoxdur, əlillik dərəcəmi kəsiblər” - Foto
Tarix: 25-11-2021 19:00 | Bölmə: Cəmiyyət

                    “Bir böyrəyim yoxdur, əlillik dərəcəmi kəsiblər”


“Bir böyrəyimi illər əvvəl aldığım travma nəticəsində kəsib götürüblər. O biri də qüsurludur, daş karxanasını xatırladır. 3 ildir stent qoyulub, amma imkansızlıqdan müalicə etdirə bilmirəm. Səhhətimdə ciddi ağrılar var. Bu vəziyyətdə II qrup əlil kimi aldığım pensiyanı da kəsiblər”.

Bu iddia ilə “Qafqazinfo”ya Biləsuvar rayon sakini Mirzəyev Mehman Bəyiş oğlu müraciət edib. Onun sözlərinə görə, 20 il Biləsuvarda Suvarma İdarəsində motorist işləyib və işdə travma alıb. Böyrəyi kəsiləndən sonra 2010-cu ildən ona II qrup əlillik təyin olunub: “Mənə qrup təyin olunduqdan sonra 20 il çalışdığım işimdən kənarlaşdırıldım. Bundan sonra ailəmin, 2 övladımın dolanışığı aldığım pensiyanın hesabına təmin olunub. Ailə ehtiyaclarının böyük olmasına görə öz səhhətimi tamamilə yaddan çıxarmışam. 2018-ci ildə böyrəyimdə olan narahatlıq bir az da artdı, Bakıda müayinələrdən sonra həkimlər qanda zəhərlənmənin miqdarının yüksək olduğunu bildirdilər. Böyrəyə stent qoydular, dedilər ki, zəhərlənmənin miqdarı azalsın, 15 gündən sonra yenidən müalicə üçün qayıdım. Lakin maddi çətinliklər səbəbindən o vaxtdan müalicəni davam etdirmək üçün geri qayıda bilməmişəm. Bu ilin martından isə əlillik pensiyamı dayandırdılar. TSEK sənədlərimə imtina verdi”.



Şikayətçi bildirir ki, bundan sonra bu il iyunun 2-də əyani baxış üçün sənədlərini Bakı şəhərində Tibbi Sosial Ekspert Komissiyasına təqdim edib. Ona bildirilib ki, Respublika Uroloji Xəstəxanasında müayinə olunub akt almalıdır. Sadalanan prosesdən sonra yenidən əlilliyin təyinatı ilə bağlı sənədlər alt sistemə daxil edilsə də, yenə ona imtina verilib: “Yenidən Bakıya – TSEK-ə gəldim, bu dəfə isə məni qəbul edən həkim komissiyasından mənə, ümumiyyətlə, pensiya düşmədiyini bildirdilər. Dedilər ki, böyrək çatışmazlığı olan xəstələrə pensiya təyinatı aparılır. Bəs bir böyrəkdə kifayət qədər fəsadların olmasını ixtisaslaşmış səhiyyə müəssisəsi təsdiqləyirsə, “böyrək çatışmazlığı” dedikdə TSEK nəyi nəzərdə tutur? Əgər doğrudan mən sağlamamsa, onda mənə sağlamlıq arayışı verilsin. Yenidən əvvəlki işimə qayıdıb işləməyə hazıram, heç olmasa ailəmin ehtiyaclarını ödəyə bilim”.
Şikayətlə bağlı Dövlət Tibbi Sosial Ekspertiza və Reabilitasiya Agentliyinə müraciət etdik. Agentliyin İctimaiyyətlə əlaqələr şöbəsinin müdiri Tural Qurbanov “Qafqazinfo”ya Mehman Mirzəyevin müraciətinin tibb müəsissəsi tərəfindən göndərilən göndəriş əsasında qiymətləndirildiyini bildirdi: “Göndərişdə qeyd edilən soltərəfli nefrektamiya diaqnozu üzrə əlillik təyinatının aparılması qanunvericilikdə nəzərdə tutulmayıb. Ona görə də M.Mirzəyevə əlillik təyin edilməsindən imtina qərarı verilib. Digər böyrəyinin funksional vəziyyəti də nəzərə alınmaqla əlilliyinin qiymətləndirilməsi üçün isə o, yenidən tibb müəssisəsinə müraciət etməli, həmin böyrəyin ağırlıq dərəcəsinin müəyyənləşdirilməsi də diaqnoza əlavə edilməklə e-sistemə yeni göndəriş daxil edilməlidir. Bu barədə ona məlumat verilib”.

                    


Baxış sayı: 265


Bölməyə aid digər xəbərlər