Bütün xəbərlər
Vəhdət təəssübkeşi-Samid Quliyev
Tarix: 29-02-2020 20:55 | Bölmə: Cəmiyyət
Qafqaz Müsəlmanlar İdarəsi təşəkkül tapdığı gündən bölgədə dini sahədə əhəmiyyətli dəyişiklər baş verib, məzhəblərarası yaxınlaşmada nəaliyyətlər əldə edilib. İslam dünyasının yaşadığı hazırkı bu çətin mərhələdə də İdarə öz tarixi ənənəsinə sadiq qalaraq məzhəblər arasında təfriqə yarada biləcək amillərin ortadan qaldırıması istiqamətində davamlı işlər aparmaqdadır. Bu işdə fədakarlıq göstərənlərdən biri də Qafqaz Müsəlmanları İdarəsi sədrinin I müavini, Müfti Salman Musayevdir. Salman Musa oğlu Musayev 1958-ci ildə Gürcüstanın Dmanisi rayonunun Hamamlı kəndində zəhmətkeş dəmirçi ailəsində anadan olub. İbtidai dini təhsilini yerli ruhanilərdən alan Salman əfəndi həmyaşıdlarından dərin hafizəsi ilə seçilirdi. Orta məktəbi bitirdikdən sonra 1974-cü ildə Zaqafqaziya Müsəlmanları Ruhani İdarəsinin göndərişiylə Özbəkistanın Buxara şəhərindəki “Mir Ərəb” mədrəsəsinə daxil olub. 1978-82-ci illərdə Daşkənd İslam İnstitutunda ali dini təhsil alıb. İnstitutu fərqlənmə diplomu ilə bitirdikdən sonra Tbilisidəki “Cümə” məscidində imam-xətib kimi fəaliyyət göstərib. İmam-xətib kimi işlədiyi qısa müddətdə etdiyi xütbə və moizələrlə inanclı insanların dərin rəğbətini qazanıb. 1982-ci ildə Şeyxülislam Allahşükür Paşazadənin dəvətiylə Qafqaz Müsəlmanları İdarəsində işə başlayan Salman Musayev İdarənin xarici əlaqələr şöbəsində referent vəzifəsində çalışıb. 1984-1986-ci illərdə Liviya “İslama dəvət” Universitetinin ilahiyyat fakültəsində təhsil alıb. O, 1987-ci ildə Qafqaz Müsəlmanları İdarəsinin sədr müavini və Müfti təyin edilir. 1989-cu il iyulun 25-də keçirilən Zaqafqaziya Müsəlmanlarının IX Qurultayında isə Müfti dini rütbəsi təsdiq edilir. Müfti Hacı Salman Əfəndi müsəlmanlar arasında böyük hörmətə malikdir. Dünyanın əksər müsəlman ölkələrində keçirilən ali məclislərin iştirakçısı olub. Qazandığı hörmət və nüfuzuna görə, uzun müddət “Hacı Əjdərbəy” məscidinin imam-xətib vəzifəsi ona həvalə olunub. Müfti Hacı Salman Əfəndi hazırda da bu vəzifəni icra edir. Müfti Hacı Salman həm də Şeyxülislam həzrətlərinin təqdimatı ilə İctimai Televiziya və Radio Yayımları Şirkəti yaradılarkən Yayım Şurasının üzvü seçilmiş və bu günə qədər həmin Şurada dini konfessiyaları bu günədək layiqincə təmsil edir. Şeyxülislam Allahşükür Paşazadə həzrətlərinin göstərdiyi əvəzsiz xidmətləri nəticəsində bu gün Azərbaycan məscidləri şiə və sünni vəhdətinin simvoluna çevrilib. Bütün məscidlərdə məzhəblərarası müvazinətin qorunması yüksək səviyyədə qorunmaqdadır. Bu işdə Şeyxülislam Allahşükür Paşazadə həzrətləri ilə yanaşı Müfti Hacı Salman əfəndinin də böyük xidmətləri vardır. Göstərdiyi xidmətlərinə görə 1988-ci ildə Hindistanın “Bombey” ordeninə, 2002-ci ildə Gürcüstan Respublikasının “Şərəf” Ordeni, 2006-cı ildə Ümumrusiya Patriarxının “Nümunəvi” Ordeni, 2008-ci ildə Azərbaycan Respublikasının “Şöhrət” Ordeni ilə təltif edilmişdir. İlk kitabı “İslamda sülh və dözümlülük konsepsiyaları” 2005-ci ildə çap edilmiş, 2017-ci ərəb dilinə tərcümə olunub.
Samid Quliyev, AJB-nin üzvü


Baxış sayı: 1 784


Bölməyə aid digər xəbərlər