Deputat: Ermənistanın radikal qüvvələri müharibədən nəticə çıxarmalıdırlar
Tarix: 29-07-2021 11:54 | Bölmə: Siyasət



Sentyabrın 27-də başlanan və 44 gün davam edən Vətən müharibəsində Azərbaycan Ordusu təcavüzkar Ermənistanı məğlub edərək onun işğal siyasətinə son qoydu. Bu müharibə Prezident, Müzəffər Ali Baş Komandan İlham Əliyevin şərtləri ilə düşmənin kapitulyasiyası ilə başa çatdı. Prezident İlham Əliyevin “Dəmir yumruq” əməliyyatı ilə Azərbaycan Ordusu erməni faşizmi üzərində qəti qələbə çalaraq ərazi bütövlüyümüzü bərpa etdi, düşməni torpaqlarımızdan qovaraq BMT Təhlükəsizlik Şurasının 27 il idi ki, kağız üzərində qalan qətnamələrini yerinə yetirdi.
Bunu AZƏRTAC-a açıqlamasında Milli Məclisin deputatı Anar Məmmədov deyib.
Deputat bildirib ki, şanlı Ordumuzun düşmən üzərində qazandığı tarixi və parlaq qələbə, regionda, o cümlədən Vətənimizdə yeni siyasi, iqtisadi, hərbi reallıqlarla yanaşı, bölgədə yeni təhlükəsizlik, əməkdaşlıq formatına zəmin yaratdı: "İkinci Qarabağ müharibəsinin davam etdiyi 44 gündə baş verənlər dövlətimizin başçısı İlham Əliyevin 30 ilin imitasiya naminə danışıqlarına son qoyub döyüş meydanında ədaləti bərpa etməsinin mahiyyətini daha dərindən dərk etməyə geniş imkan yaratdı. Azərbaycana dünyanın müxtəlif güc mərkəzlərindən göstərilən təzyiqlərə baxmayaraq, ölkə rəhbərliyi böyük qətiyyət, cəsarət və siyasi iradə nümayiş etdirdi və ərazi bütövlüyümüzün bərpası kimi əsas vəzifənin öhdəsindən layiqincə gəldi".
A.Məmmədov qeyd edib ki, son zamanlar Azərbaycanın bölgədə yaratdığı yeni reallıqlarla, tarixi ədalətlə barışmaq istəməyən, xarici havadarlarına sığınaraq 30 ildir torpaqlarımızı işğal altında saxlayan, hələ ondan da illər əvvəl yenə havadarları sayəsində əzəli yurdumuz Zəngəzura yiyələnmələrini beyinlərinə yerləşdirən işğalçı başqalarının yurd-yuvasına tamah salmaq iştahanın eyforiyasından ayılmaq istəmir".
Deputat vurğulayıb ki, Prezident İlham Əliyev aylardır Ermənistanı yeni reallıqları qəbul etməyə çağırır və bəyan edir ki, artıq "Dağlıq Qarabağ" adlı ərazi yoxdur: "
Azərbaycan bu gün 44 günlük Vətən müharibəsində qazandığı təcrübədən irəli gələrək öz ordusunun peşəkarlığını daha da artırır. Ermənilər onu da bilməlidirlər ki, Azərbaycan 44 günlük Vətən müharibəsində hərbi potensialının yalnız bir hissəsini istifadə etdi. Ermənistan ölkədə tam səfərbərlik elan etdiyi halda, Azərbaycan qismən səfərbərlik elan etdi, hətta çağırılanların da hamısı döyüş əməliyyatlarına cəlb edilmədi, yəni ehtiyac olmadı. Hərbi texnikanın da yalnız bir hissəsi döyüş əməliyyatlarında istifadə olundu. Yəni Azərbaycan Ordusunu qismən cəlb etməklə Ermənistan ordusunu məhv etdi".
Deputatın sözlərinə görə, bu baxımdan Ermənistanın radikal qüvvələri müharibədən nəticə çıxarmalıdırlar. Onlar bir qarış torpağımızı belə silah gücünə zəbt etmək fikrinə düşsələr, bu dəfə daha ağır zərbə alacaqlar. Prezident İlham Əliyevin qeyd etdiyi kimi, heç vaxt imkan verə bilmərik ki, erməni faşizmi bir daha başını qaldırsın. Bu o deməkdir ki, erməni radikalları, faşistləri nəinki bir şəhərimizi, kəndimizi, hətta bir metr ərazimizi belə silah gücünə işğal etmək niyyətinə düşsələr, bu dəfə "Dəmir yumruq" onları birdəfəlik məhv edəcək. "Çünki Azərbaycan Ordusu Qafqazın ən güclü ordularından biri olduğunu 44 günlük müharibədə sübut etdi". Buna görə də ermənilər təxribatlarından əl çəkərək məğlubiyyətləri ilə barışmalı, bütün regionda sülhə və sabitliyə mənfi təsir göstərən, vəziyyəti gərginləşdirən təxribatçı əməllərinə son qoymalıdırlar", - deyə A.Məmmədov qeyd edib.



Baxış sayı: 100


Bölməyə aid digər xəbərlər