19:48 / 19-05-2022
Yoluxanların sayı artdı
Altı ay komada qalandan sonra şəhidlik zirvəsinə ucalan qəhrəman döyüşçü
Tarix: 05-01-2022 17:10 | Bölmə: Reportaj


Vətən müharibəsi şəhidi Səbuhi Hüseynlinin döyüş yolu Cəbrayıldan Şuşayadək davam edib. Ağır yaralanan qəhrəman əsgər altı ay komada qaldıqdan sonra şəhidlik zirvəsinə ucalıb. Döyüşlərdə göstərdiyi şücaətə görə ölümündən sonra 4 medalla təltif edilib.
AZƏRTAC-ın bölgə müxbiri xəbər verir ki, Səbuhi Babək oğlu Hüseynli 1997-ci il mayın 2-də Xaçmaz rayonunun Maqsudkənd kəndində dünyaya göz açıb. Ailədə bir qardaş, bir bacı olublar.
Səbuhi altıncı sinfədək Ömər Ayatov adına Maqsudkənd kənd ümumi orta məktəbində, sonra isə Xudat şəhər 4 nömrəli texniki-fənlər təmayüllü məktəbdə təhsil alıb. 2014-cü ildə məktəbi bitirdikdən sonra əsgərliyə yollanan Səbuhi Ağdam və Tərtər rayonlarında hərbi xidmət keçib. 2016-cı ildə Aprel döyüşlərində fəal iştirak edib. Talış kəndi istiqamətində döyüşlərdə göstərdiyi şücaətə və nümunəvi xidmətinə görə fəxri fərmanlarla təltif edilib.
Hərb sənətinə bağlı olan Səbuhi 2020-ci ilin may ayından Azərbaycan Silahlı Qüvvələrinin sıralarında müddətdən artıq həqiqi hərbi xidmət qulluqçusu kimi fəaliyyət göstərib. O, Qusar rayonunda yerləşən hərbi hissədə xidmət edib. Səbuhi Hüseynli Vətən müharibəsi başlayanda düşmən üzərinə atılan ilk həmlə qruplarında yer alıb. Qorxmaz döyüşçü Cəbrayılın, Füzulinin, Xocavəndin və Şuşanın yaşayış məntəqələrinin azad olunmasında fəal iştirak edib.
“2019-cu ilin noyabr ayında Səbuhiyə toy etmişdik. Sevdiyi qızla evləndi. 2020-ci ilin yanvar ayında hərbçi olmaq üçün kurslara yazıldı. Üç ay sonra müraciəti müsbət cavablandı və işləməyə başladı. Vətən müharibəsində döyüşlərə Füzulidən başlamışdı. Bir dəfə telefonla danışanda dedi ki, ana çox pisəm. 11 nəfər döyüş yoldaşı şəhid olmuşdu. Ən yaxın dostu - Xaçmazın Nərəcan kəndindən olan Qürbət adlı dostu da şəhid olmuşdu. Ondan sonra Səbuhidə düşmənə nifrət daha da artmışdı”, - deyə şəhidin anası Samirə Əhmədxanova söyləyib.
Səbuhi Hüseynli oktyabrın 26-da Xocavənd-Şuşa istiqamətində döyüşdə baş-beyin nahiyəsindən ağır qəlpə yarası alıb. Qəhrəman döyüşçü cərrahi əməliyyatdan sonra komaya düşüb. Altı ay komada qalan Səbuhi Hüseynli 2021-ci il aprelin 15-də müalicə aldığı xəstəxanada şəhidlik zirvəsinə ucalıb.
Şəhidimiz Xaçmaz rayonunun Maqsudkənd kəndində dəfn olunub.
23 yaşında şəhidlik zirvəsinə ucalan Səbuhi Hüseynli ailəli idi. Bir oğul övladı yadigar qalıb.
Şəhidin bacısı Səidə Biyabani deyib: “Mən qardaşımdan 3 yaş böyüyəm. Eyni məktəbdə oxumuşuq. Məktəbdə onu həmişə qorumuşam. Amma döyüşdə yaralanandan sonra qardaşımı qoruya bilmədim. Babək adlı oğlu bizə əmanət qalıb. O, da böyüyüb atası kimi qəhrəman olacaq. Mən bir qəhrəmanın bacısı olduğum üçün fəxr edirəm. Şəhidlərimiz Vətənimizin bütöv olması üçün canlarını qurban verdilər. Allah onlara qəni-qəni rəhmət eləsin”.
Döyüşlərdə göstərdiyi şücaətə görə Səbuhi Hüseynli ölümündən sonra "Vətən uğrunda", "Cəbrayılın azad olunmasına görə", "Xocavəndin azad olunmasına görə" və "Şuşanın azad olunmasına görə" medalları ilə təltif edilib.















Baxış sayı: 186


Bölməyə aid digər xəbərlər