Qarabağ haqqında iki kitabın müəllifiyəm və növbəti – “Hərbdə və sülhün təmin olunmasında Liderin rolu” tədqiqat əsərimi Azərbaycan Prezidenti İlham Əliyevə həsr edəcəyəm.
Bu sözləri AZƏRTAC-ın xüsusi müxbirinə müsahibəsində “Qarabağ: Sülhə aparan yol” və “Dəmir yumruq...2020-ci ilin Qarabağ müharibəsi” adlı kitabların müəllifi, Qafqaz və Mərkəzi Asiya regionu üzrə tədqiqatçı Əhməd Əbdo Tərabik söyləyib. O deyib: “2017-ci ildə Bakıda keçirilən Beynəlxalq Humanitar Forumda iştirak edirdim və mənə birinci kitabımı Prezident İlham Əliyevə təqdim etmək xoşbəxtliyi nəsib oldu. Həmin tədqiqat əsərim 2016-cı ildə ərəbcədən Azərbaycan dilinə tərcümə olunub. Azərbaycanın dövlət başçısı olduqca səmimi və mehriban insandır. Kitabı aldı və mənə təşəkkür etdi. İlham Əliyevin siyasi fəaliyyəti və bir lider kimi yüksək keyfiyyətləri haqqında müxtəlif məqalələr və kitablar çox oxumuşam, həmçinin Azərbaycandakı dostlarım onun təvazökarlığı, insanlarla xoş rəftarı haqqında çox həvəslə bəhs ediblər. Bu cür lideri olan xalq xoşbəxtdir. Prezident İlham Əliyevin bir çox ölkələrin rəhbərlərinə örnək ola biləcək xidmətlərinin bir neçəsini saymaq kifayətdir; iqtisadi tərəqqini və ictimai-siyasi sabitliyi təmin etmək, əhalinin sosial rifahını durmadan yüksəltmək, yüksək diplomatik və siyasi istedadı sayəsində Azərbaycanın beynəlxalq nüfuzunu artırmaq və nəhayət, 30 ilə yaxın işğal altında olan torpaqları azad edərək ərazi bütövlüyünü bərpa etmək bu qəbildəndir. Müharibədə şanlı Ordunun Qələbəsini təmin edən dövlət başçısı, indi Ermənistan silahlı qüvvələrinin dağıtdığı infrastruktur obyektlərinin, tarixi mədəniyyət və dini abidələrin bərpası prosesinə uğurla rəhbərlik edir”.
Ə.Tərabik sonda söyləyib: “Görkəmli siyasət adamı, bütün dünyada, o cümlədən Misirdə və ərəb ölkələrində böyük nüfuza malik olan Prezident İlham Əliyev 60 illik yubileyini qeyd edir. Biz, Azərbaycan xalqı ilə birlikdə bu əlamətdar gündə ona öz ölkəsinin və bütövlükdə regionun tərəqqisi, sülhün və təhlükəsizliyin təmin edilməsi naminə fəaliyyətində yeni uğurlar arzulayırıq. Cənab Prezident, arzumuz budur ki, Sizin yeni qələbələriniz diplomatiya sahəsində nailiyyətlərlə, sülh şəraitində yeni layihələrin həyata keçirilməsi ilə müşayiət olunsun”.