Azərbaycan koronavirusun yayılmağa başladığı ilk günlərdən ona qarşı ən səmərəli mübarizə aparan ölkələrdən olub. İndiyədək ölkəmiz bu istiqamətdə bir sıra vacib və dəyərli təşəbbüslərlə çıxış edib, dünya güclərini həmrəyliyə çağırıb. Məhz Prezident İlham Əliyevin təşəbbüsü ilə BMT Baş Assambleyasının pandemiya ilə mübarizə mövzusunda dövlət və hökumət başçıları səviyyəsində Xüsusi Sessiyasının uğurla keçirilməsi, təşkilatın vaksinasiya ilə əlaqədar qətnamə qəbul etməsi Azərbaycanın beynəlxalq ictimaiyyətin əlaqələndirilmiş fəaliyyətinə böyük töhfələridir.
Sabaha-inamla.az AZƏRTAC-a istinadən xəbər verir ki, bu fikirləri Milli Məclisin deputatı Anar Məmmədov bildirib.
Deputat qeyd edib ki, Azərbaycan pandemiyaya qarşı ölkə daxilində ardıcıl mübarizə tədbirləri gördüyü kimi, beynəlxalq miqyasda da özünü məsuliyyətli dövlət kimi aparması ilə böyük rəğbət qazanıb, qlobal həmrəyliyin möhkəmlənməsinə fəal dəstək nümayiş etdirir. Bununla yanaşı, Azərbaycan beynəlxalq məsuliyyətinə sadiq olaraq Ümumdünya Səhiyyə Təşkilatına könüllü şəkildə 10 milyon ABŞ dolları həcmində, eləcə də 30-dan çox ölkəyə koronavirusla mübarizədə birbaşa humanitar və maliyyə yardımı ayırıb. Hətta Azərbaycanın pandemiya ilə uğurlu mübarizəsi ÜST tərəfindən dəfələrlə vurğulanıb və o, digər ölkələrə nümunə göstərilib.
“Ümumdünya Səhiyyə Assambleyasının “Pandemiyaya son qoyaraq növbəti pandemiya təhlükəsinin qarşısının alınması: birlikdə daha sağlam, təhlükəsiz və ədalətli dünyanın qurulması” mövzusuna həsr edilmiş 74-cü sessiyasında Prezident İlham Əliyevin xüsusi qonaq qismində iştirakı ölkəmizi nüfuzundan xəbər verir. Dövlətimizin başçısının sessiyada çıxışı Azərbaycanın məsuliyyətli və bəşəri dəyərlərin fəal müdafiəçisi kimi statusunu da gücləndirdiyinin dünya ictimaiyyətinin diqqətinə çatdırılması istiqamətində mühüm rol oynayır.
Prezident İlham Əliyev sessiyada Ümumdünya Səhiyyə Təşkilatının pandemiyaya qarşı qlobal mübarizəsini yüksək qiymətləndirərək, 2021-ci ilin "Səhiyyə işçiləri ili" elan olunmasını təqdir edib və bu ilin əvvəlindən Azərbaycan dövləti tərəfindən həyata keçirilən koronavirusla mübarizə tədbirlərinin səmərəliliyi sayəsində ölkəmizdə yoluxma hallarının sayının minimuma endirilməsi, görülən işlər nəticəsində istər iqtisadiyyatın, istərsə də əhalinin pandemiyanın dağıdıcı təsirinə daha az məruz qaldığını qeyd edib.
A.Məmmədov bildirib ki, davam edən “peyvənd millətçiliyi”, peyvəndlərə çıxışla bağlı getdikcə dərinləşən qeyri-bərabərlikdən bir daha narahatlığını ifadə edərək inkişaf etmiş ölkələri və donor təşkilatlarını inkişaf etməkdə olan, xüsusilə ən az inkişaf etmiş ölkələrə dəstək verməyə çağıran dövlətimizin başçısı bununla əlaqədar ölkəmizin birmənalı mövqeyini də ortaya qoydu. Çünki pandemiyaya ölkələr milli səviyyədə deyil, beynəlxalq səviyyədə, birlikdə mübarizə apararaq qalib gələ bilərlər.
Deputat vurğulayıb ki, Azərbaycan bu təşəbbüslə artıq bir neçə dəfə çıxış edib. Prezidentin təşəbbüsü ilə Qoşulmama Hərəkatının sədri qismində təşkilatın koronavirusla mübarizəyə həsr edilmiş Zirvə toplantısı keçirilib. Həmçinin yenə də dövlətimizin başçısının təşəbbüsü ilə ötən ilin dekabrında BMT Baş Assambleyasının dövlət və hökumət başçıları səviyyəsində Xüsusi Sessiyası keçirilib. Bütün bunlar onu deməyə əsas verir ki, Azərbaycan koronavirusla mübarizədə nümunəvi addımları ilə diqqət çəkməyi bacardı.