Bütün xəbərlər
XOCALI SOYQIRIMI-QAFAROV ƏDALƏT İZZƏT OĞLU (ƏROĞLU)
Tarix: 26-02-2021 22:41 | Bölmə: Cəmiyyət

Bildiyiniz kimi 1992-ci il fevralın 25-dən 26-na keçən gecə erməni silahlı dəstələri SSRİ dövründə Xankəndi (Stepanakert) şəhərində yerləşdirilmiş 366-cı motoatıcı alayının zirehli texnikası və hərbi heyətinin köməkliyi ilə Xocalı şəhərini zəbt etərək əli yalın, dinc əhalimizin üzərinə qəflətən hücuma keçmişdilər.
Dinc əhalinin xəbəri olmada fevralın 25-i axşam çağından şəhər toplardan və ağır zirehli texnikadan şiddətli atəşə tutulmağa başlamışdır. Nəticədə şəhərdə yanğınlar baş vermiş və fevralın 26-ı səhər saat 5 radələrində şəhər tam alova bürünmüşdür. Belə bir vəziyyətdə, erməni əhatəsində olan şəhərdə qalmış təqribən 2500 nəfər əhali yaxınlıqdakı azərbaycanlılar məskunlaşmış Ağdam rayonunun mərkəzinə çatmaq ümidi ilə şəhəri tərk etməyə məcbur olmuşdur.
Ancaq bu niyyət baş tutmadı. Şəhəri yerlə yeksan etmiş erməni silahlı dəstələri və motoatıcı alayın hərbiçiləri dinc əhaliyə divan tutdular.
Bu qırğının nəticəsində 613 nəfər həlak olmuşdur, onlardan:
uşaqlar - 63 nəfər;
qadınlar - 106 nəfər;
qocalar - 70 nəfər.
8 ailə tamamilə məhv edilmişdir.
25 uşaq hər iki valideynini itirmişdir.
130 uşaq valideynlərindən birini itirmişdir
487 nəfər yaralanmışdır, onlardan:
uşaqlar - 76 nəfər;
1275 nəfər əsir götürülmüşdür.
150 nəfər itkin düşmüşdür.
Dövlətin və əhalinin əmlakına 01.04.1992-ci il tarixinə olan qiymətlərlə 5 mlrd. rubl dəyərində ziyan vurulmuşdur.
Bu rəqəmlər Ermənistan SSR-in dəstəyi və SSRİ rəhbərliyinin səhlənkarlığı ilə 1988-ci ildə başlamış və Azərbaycan SSR-in tərkib hissəsi olan Dağlıq Qarabağ Muxtar Vilayətinin Ermənistana birləşdirilməsi iddiasının gerçəkləşdirilməsi əsasında yaranmış Ermənistan-Azərbaycan, Dağlıq Qarabağ münaqişəsinin ən dəhşətli, qanlı faciəsindən xəbər verir.
AJB-nin üzvü, Hüquqşünas-şair olaraq bildirəm ki, bu günə kimi Xocalı soyqırımına dolğun qiymət verilməməsi, əllərini millətimin qanına batırmış xain, iblis olan cinayətkar daşnak partiyası, ermənilər hələ də qanun qarşısında cəzalandırılmamış, əksinə bu yaramaz, şərəfsiz millətə havadarlıq edənlər də tapılmışdır. İnanıram ki, tezliklə düşmənlər bir daha layiqli cəzalarını alacaq, dünya xalqaları arasında haqqımız öz yerini taparaq düşmənlər layiqli cəzalarını alacaqdır.

XOCALI FACİƏSİ
(Xocalı rayonunun Meşəli kəndində valideyinləri və iki qardaşı Şəhid olmuş Quliyev İbrahim Qənimət oğluna ithaf edirəm.)

Meşəli kəndinin meşəsi yandı,
Meşəli kəndində neçəsi yandı,
Meşəli kəndinin çeşməsi qandı,
Halına dözməyir şair ürəyi.

İbrahim, necə də qəmli baxırsan?
Yandırıb özünü oda yaxırsan,
Acı göz yaşıma dönüb axırsan,
Halına dözməyir şair ürəyi.

Xocalı atəşi yanır içimdə,
Neçə arzularım donur içimdə,
Şuşam od içində, alov içində,
Halına dözməyir şair ürəyi.

Vətənin yolunda igidlər getdi,
Gör neçə insanın taleyi bitdi,
Elimi, Obamı, tar-mar etdi,
Halına dözməyir şair ürəyi.

Ay Haray, Qarabağ yanır, amandır,
Bağlıdır yollarım xeyli zamandır,
Düşməni əzməyin vaxtı tamamdır,
Halına dözməyir şair ürəyi.

ALLAH BÜTÜN ŞƏHİDLƏRİMİZƏ RƏHMƏT ELƏSİN, MƏKANI CƏNNƏT OLSUN.

Ə S İ R L Ə R Ə
(Vətənimizin ərazi bütövlüyü uğrunda itgin düşmüş və əsirlikdə qalan əsirlərimizə itihaf edirəm)

Qollarım qoynumda qalıbdı bağlı,
Bu ürək yaralı, sinəm də dağlı.
Əsirlər zülmətdə, yolları bağlı,
Səsinə səs verək biz əsirlərin.

Yağı düşmən torpağıma göz dikdi,
Vətənimə Araz çayla səd çəkdi.
Bu sənədə imzasını yad çəkdi.
Səsinə səs verək biz əsirlərin.

Günlər keçir, illər gedir ömürdən,
Əsirlərim qolu bağlı dəmirdən,
Ürəyim qısılır bu səs-səmirdən,
Səsinə səs verək biz əsirlərin.

Qara yaylıq bağladılar analar,
Başsız qalıb görün neçə balalr.
Dağılıbdı Qarababağda qalalar.
Səsinə səs verək biz əsirlərin.

Mənim ürəyimdə asılıbdı daş,
Çəkməyir ürəyim, ağırdır bu daş,
Əsirlikdə qalan axıtmasın yaş,
Səsinə səs verək biz əsirlərin.

Dözəmmirəm, bu ocağa, bu oda,
Kül olmuşam, sovruluram havada.
Ordumuz da qalib gəlsin davada,
Səsinə səs verək biz əsirlərin.

Göz yaşını axıtmadım de harda?
Solub gözüm, ağarıbdı qara da.
Ədalətin gözləri intizarda,
Səsinə səs verək biz əsirlərin.

QAFAROV ƏDALƏT İZZƏT OĞLU (ƏROĞLU)
Hüquqşünas, şair



Baxış sayı: 646


Bölməyə aid digər xəbərlər