Bütün xəbərlər
Sevdalı dostuma təbrik
Tarix: 09-05-2020 02:29 | Bölmə: Cəmiyyət
“Sevda, ey mənim sevdalı dostum, Ey könül həmdəmim, vəfalı dostum” Əziz bir dostumun (Mükafat Hüseynov) söhbəti, sözü, Sən idin... Deyərdi, Sevda, sev də... (Qardaşxan) Bu misraların sənə ünvanlandığı vaxtdan 45 il kecir. Və o vaxtı şair dostumuzun bir arzusu da vardı: bütün dostlarının yaşaya biləcəyi böyük bir ev tikmək və bütün sevdiklərinioraya yığmaq. O vaxtlar yaşadığımız Bayıldakı yüksəklikdə... Bir igidin ömründən də uzun 45 ili nə tez arxada qoyduq... Və bu 45 ildə gəldiyimiz qatara minənlər də, düsənlər də çox oldu. Təkcə sən qaldın. Sabir Rüstəmxanlının təbiriycə desək, “Ömrümüz o illərdən gələn qatardı. Bircə kupesi var sənin adına”.
Zakirə Allahverdiyevanın Sevda Əlibəyliyə həsr etdiyi "Lalələr" yağlı boya ilə

Şair dostunun dediyi kimi sən axı həm də sevdalıydın-ədəbiyyata, sənətə, sözə, sevdiyin oğlana. Bir də səni  çox- çox istəyən dostlarına. Ədəbiyyata, sözə, sənətə sevgi sənə həm də ensiklopedik bilikli, ədəbiyyat aşiqi Bəhram atadan qalmışdı. Mən sənin tərcümeyi-halından,ayrı-ayrı ömürlərə işiq saldığın kitablarından, məqalələrindən, “Bəyaz gecənin qızları” adlı hekayələr toplundan danışıb oxucuları yormaq istəmirəm. Çünki xeyli peşəkar yazarlar, alimlər və başqaları bu barədə deyib və yazıblar. “Söz” birinci, Toğrul ikinci övladimdir dediyin “Söz”dən də danışmaq istəmirəm.Səni tanıyanlar onsuz da yaxsı bilir Şəkər Aslanın yadigarı “Söz üstdə necə əsdiyini. Hər dəfə onu araya-ərsəyə gətimək üçün nələr çəkdiyini... Şəkər Aslanın ədəbi-bədii irsini ortaya qoymaq üçün sözün həqiqi mənasında vəfalı bir övlad kimi  çalışdığın da hamımızın gözü önündə. Mən isə öz Sevdamdan daşmaq istəyirəm. O Sevda ki, doğmadan doğma, əzizdən əzizdir biz dostlar ücün. Sədaqətindən deməsəm olmaz. İllərnən görüşmədiyin, bəlkə də ürəyində incidiyin birisi çıxa qarsına, sən onu hec nə olmamış kimi yenidən bağrına basarsan. Türklər demiş, heç kəsi eliştirmədən, olub-keçəni belə üzünə vurmadan. Hər kəsi olduğu kimi qəbul etmək sənin uca olan insanlığının xəbərçisidir. Çox sevdiyimiz ustad Məmməd Arazın diliylə desək “Bir yol deməzsən ki, hanı xoş günün, bir yol deməzsən ki, bunsuz gələsən. Bəlkə də deyərsən buna da da şükür. Kaş ki, mən axtaran,mən sayan olum,bəlkə də ömürlük hazırsan belə. Bir insan ömrünün qəm mütərcimi”. Axı mən sənə ad günü təbriki yazmaqdan ötrü keçmişdim masa arxasına. Onsuz da Şuşamız “alınmış qala” olandan sən ad günü kecirmirsən. Bu il yubiley yasındı deyə, səni gücnən dilə tutmuşduq. O ad günü olacaqdı, olmalıydı. İkimizə bir ad günü. Mənim 60-ım Lalə anamı itirdiyim ilə düşdü. Arzum sənin ad günündə dostlarla birgə yığışmaq idi. Amma sən saydığını say. Yenə bir ana itkisi bizi qəlbimizdən vurdu. Sizi min əzaba dözərək, kipriyiylə od göturüb atasız boya-başa çatdıran Humra anamız dünyasını dəyişdi. Ananın 40-ı çıxmamış “Tək otaqlı mənzilimiz olan Dünyamızı” (Rafiq Tağı) koronavirus ağusuna aldı. Ya vəlvələdən, ya zəlzələdən yenə yığışa bilmirik. Eybi yox, Allah Məmməd əminin ruhunu şad eyləsin: Biz ki, gələcəyə inam sarıdan Dünyanın ən xoşbəxt adamlarıyıq. İnşallah Toğrulumuzun toyunda bütün keçirmədiyin ad günlərinin əvəzini çıxarıq. Yeni yubiley yaşın yeni sevinclərinin, uğurlarının başlanğıcı olsun. Darıxma, qocalmamışıq. Bəlkə indi əvvəlkindən də... Hələ də 15-17 yaşlarındayıq...
Nurlan Umud


Baxış sayı: 849


Bölməyə aid digər xəbərlər