Azərbaycan Milli Elmlər Akademiyasının A.Bakıxanov adına Tarix İnstitutunda Azərbaycan Atabəyləri dövlətinin yaranmasının 885 illiyinə həsr olunan dəyirmi masa keçirilib.
Bu barədə AZƏRTAC-a Tarix İnstitutundan məlumat verilib.
İnstitutun icraçı direktoru tarix üzrə fəlsəfə doktoru Cəbi Bəhramov diqqətə çatdırıb ki, Azərbaycan Atabəyləri dövlətinin ölkəmizin tarixində müstəsna yeri var. Azərbaycan Atabəyləri dövlətinin tarixi milli tarixşünaslıq elmində ilk dəfə akademik Ziya Bünyadov tərəfindən tədqiq olunub.
Tarixçi alim qeyd edib ki, milli dövlətçilik tariximizin araşdırılması, o cümlədən tarixi Azərbaycan ərazilərində müxtəlif dövrlərdə mövcud olmuş dövlətlərin tarixlərinin tədqiq edilməsi bu gün mühüm əhəmiyyət kəsb edir.
Tədbirdə institutun Orta əsrlər tarixi şöbəsinin aparıcı elmi işçisi, tarix üzrə fəlsəfə doktoru Rəşad Mustafanın “Azərbaycan Atabəyləri dövlətinin Azərbaycan milli dövlətçilik tarixində yeri” mövzusunda məruzəsi dinlənilib.