"Məscid, kilsə, sinaqoq və ziyarətgahlarda ibadətlər müvəqqəti olaraq dayandırılır"
Tarix: 18-03-2020 15:53 | Bölmə: Müsahibə
Bunu Sabaha-inamla.az saytına açıqlamasında Qafqaz Müsəlmanları İdarəsinin əməkdaşı Samid Quliyev bildirib: “Qafqaz Müsəlmanları İdarəsinin Qazılar Şurası, səlahiyyətli nümayəndələrinin və ölkəmizdəki dini konfessiya rəhbərlərinin Azərbaycan Respublikası Nazirlər Kabinetinin müvafiq qərarının müzakirəsinə həsr olunduğu 17 mart 2020-ci il tarixli birgə iclasında koronovirusun bilavasitə təmaslar vasitəsilə yoluxaraq insan həyatına ciddi təhlükə yaratdığını və bununla əlaqədar ölkə ərazisində bütün kütləvi tədbirlərin ləğv olunduğunu nəzərə alaraq, eyni zamanda, təxirəsalınmaz sanitar-epidemioloji tədbirlər görülməsi məqsədilə məscid, kilsə, sinaqoq və ziyarətgahlarda ibadətlər müvəqqəti olaraq dayandırılır. Dindarlardan bu qərara əməl etmələri tələb olunur. Qafqaz Müsəlmanları İdarəsi bu müvəqqəti çətinlik dönəmində dindarlarımıza tövsiyə edir ki, həkimlərin məsləhətlərinə ciddi şəkildə riayət olunsun, məscidlər, ziyarətgahlar, dini tədris müəssisələri və Quran kurslarında dezinfeksiya işlərinin aparılması üçün müvafiq dövlət tibbi-sanitariya müəssisələrinə müraciət edilsin, ələlxüsus namaz zalları, dəstəmazxana, meyitxana və sanitar qovşaqlarının təmizlənməsinə xüsusi diqqət yetirilsin. Qafqaz Müsəlmanları İdarəsi əmin olduğunu bildirir ki, dindarlarımız cəmiyyətimiz və ailələrimiz üçün təhlükəli olan məqamda təlaş və vəsvəsəyə qapılmadan tibbi-profilaktik tədbirlərə riayət edəcək, vacib saydığımız tövsiyələri anlayışla qarşılayacaqlar. Bu müvəqqəti çətinlik dövrümüzdə tövsiyələrimizi nəzərə almayanlar, təəssüf ki, mövcud vəziyyətin məsuliyyətini dərk edə bilməyənlərdir. Ümid edirik ki, Allah-təala tezliklə xalqımızın üzərindən bu bəlanı dəf edəcək, səbat və rifahımız bərqərar olacaqdır, inşallah. Allah köməyimiz olsun!”
Sabaha-inamla.Az


Baxış sayı: 935


Bölməyə aid digər xəbərlər