Bütün xəbərlər
Qənirə Paşayeva Mədəniyyət İşçiləri Həmkarlar İttifaqı Gəncə şəhər Komitəsinin sədri Sahib İbrahimli ilə görüşüb
Tarix: 24-09-2022 22:04 | Bölmə: Mədəniyyət

Millət vəkili, Milli Məclisin Mədəniyyət komitəsinin sədri Qənirə Paşayeva Əməkdar mədəniyyət işçisi, Mədəniyyət İşçiləri Həmkarlar İttifaqı Gəncə şəhər Komitəsinin sədri Sahib İbrahimli ilə görüşüb.
Milli Məclisdə baş tutan görüşdə, Komitə sədri bu il 70 yaşı tamam olmuş tanınmış ziyalını təbrik edib, ona ictimai və yaradıcı fəaliyyətdə yeni uğurlar, möhkəm cansağlığı diləyib, ürək sözlərini bölüşüb. S.İbrahimoğlu Komitə sədrinə yeni yaradıcılıq uğurlarından, o cümlədən Ağdam Dövlət Dram Teatrının 100-cü teatr mövsümünü onun “Azad Şuşa” əsəri ilə açmasından danışıb, qəbul və isti sözlər üçün təşəkkür edib. Q.Paşayeva S.İbrahimoğluna xatirə hədiyyəsi bağışlayıb. Qeyd edək ki, Sahib İbrahimli (Sahib İbrahim oğlu Axundov; 1952, Gəncə) - şair, dramaturq, yazıçı, ədəbiyyatşünas alim, filologiya üzrə fəlsəfə doktorudur. Sahib İbrahimli 1995-ci ilin iyun ayında Mədəniyyət İşçiləri Həmkarlar İttifaqı Gəncə Şəhər Komitəsinin sədri seçilib. Şeirləri Türkiyə, Özbəkistan, Ukrayna və İranda dərc olunub. Prezident təqaüdçüsü olub (2015-2016). Azərbaycan Həmkarlar İttifaqları Konfederasiyasının bir qrup əməkdaşına “Əməkdar mədəniyyət işçisi” fəxri adının verilməsi haqqında Azərbaycan Respublikası Prezidentinin 04 fevral 2013-ci il tarixli Sərəncamına əsasən “Əməkdar mədəniyyət işçisi” fəxri adını alıb. Sahib İbrahimlinin 12 kitabı işıq üzü görüb. 5 elmi monoqrafiyanın, 36 səhnə əsərinin, uşaqlar üçün yazılmış 32 poemanın, 2 povestin, çoxlu sayda şeir və hekayələrin müəllifidir. Əsərləri Gəncə, Mingəçevir, Ağdam, Füzuli Dövlət Dram Teatrlarının, Şahbuz Xalq Teatrının, habelə Gəncə Dövlət Kukla Teatrının səhnəsində tamaşaya qoyulub. Artıq vurğulandığı kimi, Ağdam Dövlət Dram Teatrı özünün 100-cü teatr mövsümünü Sahib İbrahimlinin “Azad Şuşa” əsəri ilə açıb (13 sentyabr 2022-ci il). Sözügedən tamaşa müəllifin Ağdam teatrsevərləri ilə sayca 3-cü görüşüdür. Şəhid ailələrinin, qazilərin və rayon ictimaiyyəti nümayəndələrinin iştirakı ilə keçirilən bu tamaşa səhnədə Azərbaycan əsgərinin mərdlik və yenilməzliyinin dolğun şəkidə canlandırılması ilə yadda qalıb. Tamaşanın quruluşçu rejissoru, tanınmış səhnə ustası, Prezident mükafatçısı Kərim Həsənov dramaturji materialı həssaslıqla duyub, Qarabağ uğrunda gedən ölüm-dirim savaşında qəhrəman oğul və qızlarımızın göstərdiyi rəşadəti səhnə dili ilə yüksək peşəkarlıqla ifadə etməyi bacarıb. Onun aktyorlarla apardığı gərgin və səmərli yaradıcılıq işi öz müsbət bəhrəsini verib. K.Həsənovun özünün də rol aldığı “Azad Şuşa”da aktyorlardan E.Hümbətovun, F.Fərhadzadənin və X.Xudadatovanın ifaları teatrsevərlər tərəfindən xüsusi alqışlarla qarşılanıb. Tamaşanın quruluşçu rəssamı M.Qarayev, musiqi tərtibatçısı E.Cəfərov, teatrın direktoru Məhəmməd Hüseynovdur.
Sabaha-inamla.az



Baxış sayı: 85


Bölməyə aid digər xəbərlər