22:18 / 29-09-2022
Nərminə dəstək olaq!
Qənirə Paşayeva “Qarabağdan doğan Günəş və Ay – Xurşidbanu Natəvan və Fatimə xanım Kəminə” kitabının TÜRKSOY-da təqdimatında çıxış edib və Türk dünyasına çağırış səsləndirib
Tarix: 10-08-2022 19:18 | Bölmə: Mədəniyyət



MM Mədəniyyət komitəsinin sədri Qənirə Paşayeva “Qarabağdan doğan Günəş və Ay – Xurşidbanu Natəvan və Fatimə xanım Kəminə” kitabının TÜRKSOY-da təqdimatında çıxış edib və Türk dünyasına çağırış səsləndirib. Milli Məclisin Mədəniyyət komitəsinin sədri Qənirə Paşayeva “Qarabağdan doğan Günəş və Ay – Xurşidbanu Natəvan və Fatimə xanım Kəminə” adlı kitabın Ankarada, Beynəlxalq Türk Mədəniyyəti Təşki­latının – TÜRKSOY-un Mərkəzi qərargahında keçirilən ilk təqdima­tında çıxış edib. Şuşa şəhəri də daxil olmaqla, Qarabağın təkcə Azərbaycan və Türkiyəyə deyil, bütün Türk dünyasına görkəmli şəxsiyyətlər bəxş etdiyini diqqətə çatdıran Q.Paşayeva, bu kitabın ilk təqdimatının da, mədəniyyət diplomatiyası sahəsində uğurlu layihələr həyata keçirən TÜRKSOY-da baş tutmasını çox yerində və məntiqli hadisə kimi qiymətləndirib. Q.Paşayeva vurğulayıb ki, Dos.Dr. Faiq Ələkbərli ilə birgə hazırladığı kitabın Türkiyədə nəşri və TÜRKSOY-da təqdimatı Xurşidbanu Natəvan və Fatimə xanım Kəminə kimi görkəmli Azərbaycan şairlərinin yaradıcılığına verilən dəyərin ifadəsi olub, hər iki xanımın tarixi şəxsiyyət kimi ucalığını tərənnüm edir. Komitə sədri diqqətə çatdırıb ki, Müzəffər Ali Baş Komandan İlham Əliyevin başçılığı ilə qəhrəman Azərbaycan Ordusunun 44 günlük Azərbaycan Vətən müharibəsində qazandığı tarixi Zəfər sayəsində indi Şuşa ilə, Qarabağla bağlı tədbirlərimizi qürurla, fərəhlə keçiririk. Şuşanın, Qarabağın hər guşəsi bizim üçün dəyərli olduğu kimi tarixi şəxsiyyətlərin, mədəniyyət, sənət xadimlərinin irsi də bizimçün əzizdir. Q.Paşayeva Şuşanın Ermənistan silahlı qüvvələrinin işğalı altında olduğu illərdə mədəni irsə qarşı vandallıqlardan da söz açıb, Natəvanın heykəli daxil olmaqla, heykəllərin belə güllələndiyini bildirib. “Əgər qərinələr öncə Şuşada Xurşidbanu Natəvan, Fatma xanım Kəminə kimi tarixi şəxsiyyətlər yetişibsə, bu Şu­şadakı mədəni mühiti, Şuşada, Qarabağda, ümumən Azərbaycanda qadına bəslənən münasi­bəti ifadə edir. Və biz qürur hissi keçiririk ki, 1918-ci ildə Yaxın Şərqdə ilk, ümumən dünyada ilklərdən biri olaraq qadına seçmək, seçilmək hüququ verən Cümhuriyyətin Azərbay­canda qurulması təsadüfi olmayıb, bunun tarixi, mədəni əsasları, kökləri olub”. Q.Paşayeva TÜRKSOY rəhbərliyinə, təşkilatçı qurumların bütün mənsublarına, kitabın hazırlanmasında, nəşrində və təqdimatında zəhməti olan hər kəsə könül dolusu təşəkkür edib. Qeyd edək ki, Azərbaycan Respublikası Milli Məclisinin Mədəniyyət komitəsi, TÜRKSOY və Azərbaycanın Türkiyədəki səfirliyinin birgə təşkilatçılığı ilə keçirilən tədbirdə TÜRKSOY-un Baş katibi Sultan Rayev, Azərbaycanın Türkiyədəki Fövqəladə və səlahiyyətli səfiri Rəşad Məmmədov, Ankaranın Keçiörən rayon bələdiyyəsinin sədri Turqut Altınok, Türkiyə Cümhurbaşqanlığı yanında Təhlükəsizlik və Xarici Siyasət Şurasının üzvü, Türkiyə-Azərbaycan Dostluq, Əməkdaşlıq və Həmrəylik Fondunun (TADİV) rəhbəri Prof.Dr. Aygün Attar, kitabın nəşrinə dəstək göstərmiş qurumlardan biri - “UNİTY Company” şirkətinin təsisçisi Fikrət Əliyev, “UMAY– Türk dünyası qadınlarına dəstək” İB sədri Vəsilə Abulova, Yeganə Əliyeva, rejissor Elnurə Kazımlı və başqaları iştirak və çıxış edib, təqdim olunan kitabın önəmi barədə fikirlərini bölüşüb. “Qarabağdan doğan Günəş və Ay - Xurşidbanu Natəvan və Fatimə xanım Kəminə” kitabında şairələrin bioqrafiyaları və dünya görüşləri, eləcə də poeziya yaradıcılıqlarından nümunələr əksini tapıb. Sonda, MM-in komitə sədri Q.Paşayeva və tədbirdə iştirak edən Azərbaycanın nümayəndə heyəti üzvləri TÜRKSOY-a Azərbaycanın Xalq rəssamı, dünyaşöhrətli sənətkar Sakit Məmmədovun “Türk dünyası qadınlar tablosu” rəsmlərindən və Qarabağ motivli xatirə hədiyyələri təqdim ediblər. Tədbirin sonunda MM Mədəniyyət Komitəsinin sədri Q.Paşayeva, ölkəmizin Türkiyədəki Fövqəladə və səlahiyyətli səfiri Rəşad Məmmədov, Azərbaycan nümayəndə heyətinin üzvləri TÜRKSOY-un Baş katibi ilə görüşüb. Baş katiblə önəmli fikir mübadiləsi aparıb. MM Mədəniyyət komitəsi və Azərbaycan nümayəndə heyəti üzvləri adından TÜRKSOY-un bir qrup əməkdaşına da Qarabağ motivli hədiyyələr təqdim olunub.
Sabaha-inamla.az

              




















Baxış sayı: 90


Bölməyə aid digər xəbərlər
7-09-2022, 18:44 Fazil Əliyev vəfat etdi