MM Mədəniyyət Komitəsinin dəstəyi ilə gənc rəssam Ramin Səfərlinin ilk fərdi sərgisi keçirilib
Tarix: 14-07-2022 17:08 | Bölmə: Mədəniyyət


   Milli Məclisin Mədəniyyət Komitəsinin sədri Qənirə Paşayeva fiziki imkanları məhdud, istedadlı gənc rəssam Ramin Səfərlinin Bakıda təşkil olunmuş ilk fərdi sərgisinin açılış mərasimində çıxış edib.
    Q.Paşayeva Raminin öz əzmi ilə fiziki imkanları məhdud gənclər üçün, ümumən gənclər üçün nümunə olduğunu bildirib, onun həyat yolu haqqında məlumat verib, ürək sözlərini bölüşüb: “Ramin Əslan oğlu Səfərli 1995-ci ildə Salyan rayon Ərəbqardaşbəyli kəndində doğulub. Doğma kəndin orta məktəbində oxuduqdan sonra, peşə təhsilini 1 saylı Gənc Əlillərin Peşə və Reabilitasiya Mərkəzində Rəssam ixtisası üzrə davam etdirib. Ali təhsilini Azərbaycan Dövlət Mədəniyyət və İncəsənət Univeristetinin Rəssamlıq fakültəsində Rəngkarlıq ixtisasi üzrə alan Raminin bu gün iIk fərdi sərgisinə yığışmışıq. Ramini təbrik edirəm! Ona böyük uğurlar diləyirəm!
    Raminin fiziki məhdudiyyəti olsa da, o, sənətin ənginliyini ifadə edib. Belə bir söz var, sənət hünərdir. Raminin yatadıcılığı bu deyimin təsdiqidir.
Bu gün burada sərgilənən əsərlər onun könül dünyasının üfüqlərini, o üfüqlərdən boylanan Günəşi aydın göstərir. Mən Ramini ilk fərdi sərgisi, gözəl əsərləri və sənətsevərlərin bura yığışması münasibəti ilə ürəkdən təbrik edirəm. Onu da vurğulayaq ki, Raminin ilk sərgisi satış sərgi tərzində təşkil olunub. Gənc rəssamımızı ilk fərdi sərgisində yalnız qoymayan və onun əsərlərini öz evləri, iş yerləri, habelə ölkəmizin mədəniyyət ocaqları üçün alacaq könül dostlarımıza, sizlərin hər birinizə təşəkkür edirəm. Var olun”!
     Gənc rəssamın ilk sərgisində onun müəllimi -ADPU nəzdindəki Pedoqoji Kollecin müəllimi, Rəssamlar İttifaqının üzvü, Qabaqcıl Təhsil işçisi Rəsmiyyə Mahmudova,“UMAY – Türk dünyası Qadınlarına Dəstək” İB sədri Vəsilə Abulova, RHİMİB sədri Arzu Bağırova və b. çıxış edərək, öz ürək sözlərini bölüşüb.
    Sərgidə aydınlar, QHT, KİV təmsilçiləri və b. iştirak edib.
MM Mədəniyyət Komitəsinin mənəvi dəstəyi, "Avrasiya Beynəlxalq Araşdırmalar İnstitutu" İB,“Regional Hüquqi və İqtisadi Maarifləndirmə” İB-nin təşkilatçılığı ilə keçirilən sərgidə Raminin 40-dan çox əsəri nümayiş olunub və tam əksəriyyəti sərgi iştirakçıları tərəfindən alınıb. Q.Paşayeva sonda bir daha çıxış edərək, Raminə dəstək duran könül dostlarına təşəkkür edib, onun uğurlarına sevindiyini, daha böyük uğurlar qazanacağına şübhə etmədiyini söyləyib.
     Sonda Ramin Səfərli təşkilatçılara, çıxışçılara, bütün iştirakçılara dərin minnətdarlığını bildirib, ilk fərdi sərgisinin sevincini
bölüşüb: "Bu sərgi, sizlərin qayğıkeşliyiniz və isti sözləriniz məni yeni yaradıcılıq uğurlarına həvəsləndirir. Çox sağ olun".

Sabaha-inamla.az

















Baxış sayı: 94


Bölməyə aid digər xəbərlər
7-09-2022, 18:44 Fazil Əliyev vəfat etdi