22:20 / 15-05-2022
Tramp tviterə qayıtmayacaq
16:05 / 15-05-2022
Renat İbrahimov vəfat edib
Üç dəfə Kraliça Sofiya tərəfindən mükafat alan Kamran... - Fotolar
Tarix: 08-01-2022 14:36 | Bölmə: Mədəniyyət

                  Üç dəfə Kraliça Sofiya tərəfindən mükafat alan Kamran...



27 yaşlı azərbaycanlı skripkaçı Kamran Ömərli Avropanın ən prestijli təhsil ocaqlarından biri – İspaniyanın Madrid şəhərində yerləşən Kraliça Sofiya adına Ali Musiqi Akademiyasının ən uğurlu və istedadlı tələbələrindən biridir. Onun bu nailiyyətlərini ispan mətbuatı da işıqlandırıb.
Qazandığı uğurlarla bağlı “Qafqazinfo”ya müsahibə verən həmyerlimiz Azərbaycandakı fəaliyyəti, Madridə köçməsi və oradakı uğurlarından söz açıb.
- Bildiyimizə görə, əslən Xaçmazdansınız.
- Bəli, 1994-cü ildə Xaçmaz şəhərində anadan olmuşam. 7 yaşımdan musiqi ilə məşğul olmağa başlamışam. Bakıdakı Leopold və Mstislav Rostropoviçlər adına 21 nömrəli Onbirillik Musiqi Məktəbinin məzunuyam. Orada təhsil aldığım müddətdə bir neçə dəfə respublika müsabiqələrində qalib olmuşam. Konsert və festivallarda çıxış etmişəm.



- Necə oldu ki, skripkanızın səsi Madriddən gəldi?
Xaricə səfərlərim 2010-cu ildən başlayıb. İlk dəfə Litvada keçirilən festivala dəvət almışam. 2011-ci ildə nüfuzlu skripka müsabiqələrindən biri olan Beynəlxalq Henrik Venyavski adına müsabiqəsinə qatılan ilk azərbaycanlı olmuşam və xüsusi mükafla təltif olunmuşam. Elə o müsabiqədə dünya şöhrətli professor Zaxar Bronla tanış oldum və o, məni öz sinfində təhsil almağa dəvət etdi. Düşünmədən dəvətini qəbul etdim.
Həmin il Bakıda musiqi məktəbini də bitirməli idim və Bakı Musiqi Akademiyasına hazırlaşırdım. Bu təklifi aldıqdan sonra Kraliça Sofiya adına Ali Musiqi Akademiyasına qəbul imtahanlarına qatıldım və 2012-2021-ci illərdə professor Zaxar Bronun sinfində təhsil aldım. Bu illər ərzində bakalavr və magistr pillələrini uğurla başa vurdum. Hazırda isə Beynəlxalq Kamera Musiqisi İnstitunda Günter Pixlerin sinfində təhsil alıram, eyni zamanda San-Sebastyan şəhərindəki Basklar Ölkəsi Dövlət Sinfonik Orkestrində çalışıram.



- Təhsil aldığınız müddətdə daha hansı uğurlarınız olub?
- Madriddə oxuduğum illər ərzində 2014-cü ildə üzvü olduğum simli kvartetlə Kraliça Sofiyanın əlindən “İlin ən yaxşı kamera ansamblı” mükafatını qazanmışam. Ondan sonra 2015-ci ildə Bolqarıstanın Sofiya şəhərində Beynəlxalq Skripka yarışmasında qalib oldum. 2016-cı ildə yenidən Kraliça Sofiyadan şəxsi mükafat aldım. Bu dəfə artıq “Akademiyanın ən yaxşı skripkaçısı” nominasiyası üzrə. 2018-ci ildə piano triomla İspaniyanın Arnuero şəhərində keçirilən Beynəlxalq Kamera Musiqisi müsabiqəsinə qatıldıq və orada bütün mükafatları qazandıq. Yarışmanın həm də ən yaxşı skripkaçısı olaraq, “Jesús de Monasterio” mükafatını da ilk dəfə mən qazandım. Madridə dönəndə artıq üçüncü dəfə Kraliça Sofiya tərəfindən “İlin ən yaxşı triosu” diplomuna layiq görüldük. Beləliklə, düz 3 dəfə Kraliça Sofiya tərəfindən mükafatlara layiq görülmüşəm. Bununla yanaşı, İspaniya dövlət radio və televiziyasında dəfələrlə çıxış etmişəm.
- Azərbaycanda konsert verməyi planlaşdırırsınızmı?
- Çox istərdim ki, fəaliyyətimi Avropada daha da genişləndirim. Eyni zamanda, Azərbaycana dönüb konsert və ustad dərsləri ilə çıxış etməyi çox istərdim. Burada qazandığım təcrübəni öz həmvətənlərimlə bölüşmək mənim üçün ən vacib və lazımlı missiyalardan biridir.


Baxış sayı: 108


Bölməyə aid digər xəbərlər
16-04-2022, 20:22 Aynurla Niyam evlənir