Vətən müharibəsi şəhidi Mənsur Ağayevin xatirəsi anılıb
Tarix: 30-07-2022 00:30 | Bölmə: Reportaj


Hacıqabul rayonunda Vətən müharibəsi şəhidi Mənsur Ağayevin doğum günündə xatirəsi anılıb.
AZƏRTAC-ın bölgə müxbiri xəbər verir ki, anım günündə şəhidin ailə üzvləri, Yeni Azərbaycan Partiyası Hacıqabul rayon təşkilatının sədri Elnur Əmiraslanov, rayon icra hakimiyyətinin əməkdaşları, şəhidin yaxınları və dostları iştirak ediblər.
Mərasimdə şəhidin məzarı ziyarət olunub, ruhuna dualar oxunub.
Şəhidlərimizin xatirəsinin yad olunmasından sonra çıxış edənlər Mənsurun həyat yolundan, Vətən sevgisindən söhbət açıblar. Bildirilib ki, Ağayev Mənsur Ağa oğlu 1994-cü il iyulun 29-da Hacıqabul rayonunun Padar qəsəbəsində dünyaya göz açıb. Hələ uşaq yaşlarından vətənpərvərliyi ilə seçilib. 2020-ci il sentyabrın 27-də düşmən təxribatına qarşı başlanan əks-həmlə əməliyyatı zamanı Mənsur könüllü olaraq cəbhəyə yollanıb. Vətən müharibəsində Xocavənd və Şuşa istiqamətində gedən döyüşlərdə Mənsur xüsusi şücaət göstərib, bir çox yaşayış yerlərinin və strateji yüksəkliklərin azad olunmasında iştirak edib. Müharibənin sonuncu günündə Şuşa uğrunda gərgin döyüşlər zamanı Mənsur qəhrəmancasına döyüşərək şəhidlik zirvəsinə ucalıb. O, ata yurdu olan Kürdəmir rayonunun Sığırlı kənd qəbiristanlığında dəfn olunub.
Ağayev Mənsur Ağa oğlu döyüşlərdə göstərdiyi şücaətə görə ölümündən sonra “Vətən uğrunda”, “Xocavəndin azad olunmasına görə” medalları ilə təltif edilib.








Baxış sayı: 170


Bölməyə aid digər xəbərlər