“Naxçıvanda rəssamlıq sənətinin inkişafı” mövzusunda elmi konfrans
Tarix: 21-04-2021 22:23 | Bölmə: Mədəniyyət

    AMEA Naxçıvan Bölməsində Naxçıvan Muxtar Respublikası Rəssamlar Birliyinin və muxtar respublikanın ali təhsil müəssisələrinin birgə təşkilatçılığı ilə “Naxçıvanda rəssamlıq sənətinin inkişafı” mövzusunda elmi konfrans keçirilib.
    AMEA Naxçıvan Bölməsinin mətbuat xidmətindən Sabaha-inamla.az-a verilən məlumata görə Naxçıvan Muxtar Respublikası Ali Məclisi Sədrinin “Naxçıvan Muxtar Respublikası Rəssamlar Birliyinin 50 illik yubileyinin keçirilməsi ilə əlaqədar” 2 mart 2021-ci il tarixdə təsdiq etdiyi Tədbirlər Planına uyğun olaraq keçirilən konfransı giriş sözü ilə AMEA Naxçıvan Bölməsinin sədri, akademik İsmayıl Hacıyev açıb. Bildirib ki, Naxçıvan rəssamlıq məktəbinin nümayəndələri istər ölkəmizdə, istərsə də ölkə hüdudlarından kənarda daima uğurla təmsil olunmuş, gözoxşayan əsərlərlə diqqəti cəlb etmişlər. İstedadlı rəssamlarımızın yaratdıqları sənət əsərləri tarixi abidələrimiz, etnoqrafiyamız, adət-ənənələrimiz, mədəniyyətimiz və qan yaddaşımızla bağlı reallıqları gələcək nəsillərə çatdıran ən təsirli vasitədir.
   
    Alim çıxışında Naxçıvan Muxtar Respublikası Rəssamlar Birliyinin yaranması və keçdiyi inkişaf yoluna nəzər salıb. Qeyd edib ki, fəaliyyətinin bütün dövrlərində elmin, təhsilin, mədəniyyətin inkişafına xüsusi qayğı ilə yanaşan Ulu öndər Heydər Əliyev Naxçıvan rəssamlığına da əsl hamilik etmişdir. Bölmə sədri muxtar respublikada rəssamlıq sənətinə göstərilən dövlət qayğısından bəhs edərək vurğulayıb ki, Naxçıvan Muxtar Respublikası Rəssamlar Birliyi üzvlərinin zövqlə dizayn edilmiş yeni inzibati bina və emalatxana ilə təmin edilməsi, Naxçıvan şəhərində Bəhruz Kəngərli Muzeyinin, Rəssamlar Parkının salınması məhz göstərilən diqqət və qayğının ən bariz nümunəsidir. Hazırda Birliyin 40-dan artıq üzvünün səmərəli fəaliyyəti üçün hərtərəfli şərait yaradılmışdır. Naxçıvan Muxtar Respublikası Ali Məclisi Sədrinin Naxçıvan Muxtar Respublikası Rəssamlar Birliyinin 50 illik yubileyinin keçirilməsi ilə bağlı Sərəncam imzalaması və bu Sərəncamla əlaqədar Tədbirlər Planını təsdiq etməsi çağdaş Naxçıvan rəssamlığına verilən ən böyük töhvədir. Akademik göstərilən diqqət və qayğıya görə Naxçıvan Muxtar Respublikası Ali Məclisinin Sədrinə minnətdarlığını bildirib, Naxçıvan rəssamlarını bu əlamətdar gün münasibətilə təbrik edib, onlara yaradıcılıq uğurları arzulayıb.
    Konfransda Naxçıvan Muxtar Respublikası Rəssamlar Birliyinin sədri, Azərbaycan Respublikasının Əməkdar rəssamı Ülviyyə Həmzəyeva “Naxçıvan Muxtar Respublikası Rəssamlar Birliyinin yaranması və dövlət qayğısı” mövzusunda məruzə edib. Bildirilib ki, başlanğıcını Gəmiqaya təsvirlərindən götürən, XII əsr Naxçıvan memarlıq məktəbinin təsiri ilə inkişafın yeni mərhələsinə qədəm qoyan Naxçıvan rəssamlıq sənəti olduqca zəngin tarixə malikdir.
    XX əsrin əvvəllərində Azərbaycan realist rəssamlığının banisi Bəhruz Kəngərli Naxçıvan rəssamlıq məktəbinə yeni ictimai məzmun qazandırmış, onu forma və təsvir vasitələri ilə zənginləşdirmişdir. Sovet hakimiyyəti dövründə diqqətdən kənarda qalan Naxçıvan rəssamlığı yalnız dahi lider Heydər Əliyevin Azərbaycanda hakimiyyətə gəlməsindən sonra inkişafın yeni mərhələsinə qədəm qoymuşdur. Məhz Ümummilli liderin təşəbbüsü ilə 1971-ci ildə Azərbaycan Rəssamlar İttifaqının Naxçıvan Təşkilatı, 2000-ci ildə isə həmin təşkilat əsasında Naxçıvan Muxtar Respublikası Rəssamlar Birliyi yaradılmışdır.
     Məruzədə Naxçıvan rəssamlıq məktəbinin zəngin tarixinə nəzər salınmış, Naxçıvan Muxtar Respublikası Rəssamlar Birliyinin fəaliyyəti, muxtar respublika rəssamları qarşısında açılan geniş üfüqlərdən, dövlət qayğısından bəhs olunmuşdur.
     Daha sonra Naxçıvan Dövlət Universitetinin professoru, Azərbaycan Respublikasının Xalq rəssamı Hüseynqulu Əliyevin Naxçıvanlı rəssamların yaradıcılığı haqqında, Naxçıvan Müəllimlər
İnstitutunun kafedra müdiri, sənətşünaslıq üzrə fəlsəfə doktoru Həbibə Allahverdiyevanın gənc rəssam kadrların hazırlanmasında Naxçıvan Muxtar Respublikası Rəssamlar Birliyinin rolu və AMEA Naxçıvan Bölməsi İncəsənət, Dil və Ədəbiyyat İnstitutunun əməkdaşı Şəmsiyyə Zalovanın müasir Naxçıvan rəssamlıq sənətində üslub və xüsusiyyətlərlə bağlı məruzələri dinlənilib. Məruzə edənlər Bəhruz Kəngərli, İbrahim Səfiyev, Şəmil Qazıyev və Naxçıvan rəssamlıq sənətinin başqa nümayəndələri, onların yaradıcılığı, üslub xüsusiyyətləri,muxtar respublikada fəaliyyət göstərən ali təhsil müəssisələrində müvafiq ixtisasların fəaliyyəti, gənc rəssamlarla keçirilən görüşlər, reallaşdırılan layihələr və digər mövzularla bağlı fikir bildiriblər.
     Məruzə edənlər vurğulayıb ki, yaradılan hərtərəfli şərait muxtar respublika rəssamlarına daha böyük şövqlə yaratmağa stimul verir.

Sabaha-inamla.az


Baxış sayı: 113


Bölməyə aid digər xəbərlər
7-05-2021, 01:17 Arif Quliyev vəfat etdi