Bütün xəbərlər
Akademik Musiqili Teatrın kollektivi Məryəm Əlizadəni 70 illik yubileyi münasibəti ilə təbrik etdi
Tarix: 18-04-2020 18:46 | Bölmə: Mədəniyyət

     
       

Əməkdar İncəsənət Xadimi, professor, ən əsası, adının qarşısında BÖYÜK İNSAN kəlmələrini ürəklə və fəxarətlə işlətdiyimiz, nadir şəxsiyyət – Məryəm Əlizadənin 70 yaşı tamam olur.
Şərəfli yubileyi münasibətilə Məryəm xanımı ən sevimli tələbələrindən biri — tanınmış rejissor, Azərbaycan Dövlət Akademik Musiqili Teatrının direktoru, Əməkdar incəsənət xadimi, sənətşünaslıq üzrə fəlsəfə doktoru, Əliqismət Lalayev başda olmaqla, Akademik Musiqili Teatrın bütün əməkdaşları təbrik edir, “Yaşın mübarək olsun!” - deyirlər.
Hamı tərəfindən sevilmək, rəğbətlə qarşılanmaq hər kəsə nəsib olmur. O, təkcə Azərbaycan teatrşünaslıq elminin inkişafında əvəzsiz xidmətləri ilə deyil, xeyirxahlığı, insanlara sonsuz sevgisi və mərhəməti, duyğusal, həssas davranışları ilə hamının rəğbətini qazanıb, böyük bir aləmin – teatr cameəsinin sevimlisinə, doğmasına çevrilib. O, nüfuzlu ictimai xadim, böyuk elm adamı və pedaqoqdur. Onun yetirmələrinin fikirlərini, ürək sözlərini dinlədikcə Məryəm xanıma heyranlığımızı gizlədə bilmirik. Yaxşı müəllim olmaq mümkündür, yaxşı insan olmaq isə hər kəsə məxsus xarakter deyil. 
Əliqismət Lalayev də sevimli müəlliminə ürək sözlərini belə ünvanladı:
“Demək olar ki, Məryəm xanım ölkə teatrlarında çalışan yüzlərlə incəsənət adamının müəllimi olub. Məryəm xanım, siz, milli mədəniyyətimizin, incəsənətimizin təkrarsız, nadir incisisiniz. Ən çətin məqamlarda, ən xoş anlarımızda həmişə bizim yanımızda olmusunuz. Gecə-gündüz, səhər-axşam, vaxt-bivaxt sizi narahat edib dəyərli məsləhətlərinizi almaqdan heç zaman çəkinməmişik. Gözəl çıxışlarınızla, elmi məqalələrinizlə, araşdırmalarınızla həmişə bizə nələri isə öyrətməyə çalışmısınız. Və bu gün biz sizdən öyrəndiklərimizi tətbiq edirik. Şəxsən mən — Əliqismət Lalayev — teatr aləmində müəyyən yeri olan bir insan kimi, hər zaman sizə ehtiyac duyuram. Bu gün musiqili teatrda işləyənlərin demək olar ki, çoxu sizin tələbələrinizdir. Bununla fəxr etməyə dəyər. Siz bizim uğurlarımıza hər zaman uşaq kimi sevinirsiniz, müəyyən çətinliklərimiz olanda bizdən çox siz narahat olursunuz… Dünyanın harasında olmağımızdan asılı olmayaraq, bizimlə birlikdə sərhədləri keçib adlayan doğma adlar içərisində siz də varsınız və ön sıralardasınız. Deməyə o qədər sözüm var ki, yetməz! Çox təəssüf edirəm ki, sizin yubileyiniz belə bir vaxta düşdü. İnanıram ki, tezliklə bu bəla ölkəmizin başı üzərindən çəkiləcək və biz sizə söz verdiyimiz yubileyinizi mutləq yüksək səviyyədə qeyd edəcəyik. Bax onda tələbələriniz ətrafınızda sıx toplaşacaq, hər birimiz ondan qürur duyacağıq ki, siz hər zaman olduğu kimi, yene də bizimlə – tələbələrinizlə bir yerdə olacaqsınız.
Ömrünüz uzun olsun, sizə sağlam və gözəl həyat arzulayıram, sizi bağrıma basıram. Siz mənə dünyalar qədər əzizsiniz. Mən söz tapa bilmirəm ki, bu hislərimi sizə çatdırım. Sizə olan duyğularımı ifadə etməyə sözlər yetmir. Sağ olun, sağlam olun. Həmişə bizimlə olun!”



Baxış sayı: 484


Bölməyə aid digər xəbərlər
23-03-2024, 13:08 Emindən ilk - Reaksiya