Deputat məzarını ziyarət etdiyi atasından yazdı
Tarix: 19-04-2022 12:42 | Bölmə: Gündəm


Milli Məclisin Komitə sədri Hicran Hüseynova atası-Azərbaycanın görkəmli ictimai-siyasi və dövlət xadimi, "Şöhrət" ordeni laureatı Kamran Əsəd oğlu Hüseynovun məzarını ziyarət edib. Və anım günü olan atasıhaqqında yazı yazıb.
Sabaha-inamla.az həmin yazını diqqətə çatdırır:

Hicran Hüseynova: Qubadlının işğaldan azad edilməsi təkcə bu həsrətlə yaşayanları deyil, həm də bu arzu ilə dünyadan köçən narahat ruhları da sevindirir"

   "Bu gün əziz atam, Azərbaycanın görkəmli ictimai-siyasi və dövlət xadimi, "Şöhrət" ordeni laureatı Kamran Hüseynovun ədəbiyyətə qovuşmasından 16 il ötür. O tək valideyn kimi yox, müəllim kimi bizi daim istiqamətləndirir, məsləhətlər verərdi.
   Ulu Öndər Heydər Əliyev dəfələrlə deyirdi ki, “Xalq yalnız iqtisadiyyatı, maddi sərvətləri, tarixi, mədəniyyəti ilə deyil, həm də adət-ənənəsi ilə seçilir. Hər bir dövlətin gücü onun xalqına, adət-ənənəsinə, milli dəyərlərinə sadiq olması ilə ölçülür”. Əsası Ümummilli Lider Heydər Əliyev tərəfindən qoyulan və cənab Prezident İlham Əliyevin uğurla davam etdirdiyi dövlət quruculuğu siyasəti Azərbaycanın çikəklənməsinə, inkişaf etməsi və iqtisadi cəhətdən güclənməsinə, regionun lider dövlətə çevrilməsinə gətirib çıxarmışdır. Müxtəlif mərhələlərdə bu siyasətin həyata keçirilməsində böyük rolu olan görkəmli ictimai - siyasi xadimlər, tanınmış və nüfuzlu şəxsiyyətlər öz humanizmi, vətənpərvərliyi, tarixi keçmişimizə, milli adət-ənənələrimizə bağlılıqları ilə sözün əsl mənasında vətəndaşlıq nümunəsinə çevrilmişlər. Bu insanlar xalqın dəyərlərinə arxalanaraq, ondan güc alaraq Azərbaycanın dünyada tanınmasında müstəsna xidmətlər göstərmişlər. Xalq isə onları hər zaman yad edir, xatirələrdə yaşadır.
   Belə bir dünyagörüşünə əsaslanan və hörmətlə yanaşan atam Kamran Hüseynovun həyat fəlsəfəsində iki əsas istiqamət var idi. Və bu istiqamətlərin biri digərini tamamlayırdı. O deyirdi ki, “Həmişə yaxşılıq etməyə tələsin!”. Özünü isə belə qiymətləndirirdi: “Mən özümü daim bal arısı hesab etmişəm. Arı bal verir, ilan ağu. Mənim həyat fəlsəfəm budur.”
Nəcib bir ailədə dünyaya göz açmış Kamran Hüseynovun ömür yolu həyatını namusla, dürüstlüklə yaşamaq istəyənlər üçün bir örnəkdir. O, həyatda atdığı ilk addımı ilə halallığa könül vermiş, 9-10 yaşından əkin-biçində çalışmış, atasını erkən itirdiyindən və evin böyük oğlu olduğundan çox çətinliklərə sinə gərmişdir. Ailəyə kömək üçün Bakıya gəlib neft sənayesində fəhləlik etmiş, burada təhsil almış, istehsalatda fərqlənmişdir. Onun zəngin bioqrafiyası göstərir ki, yaratmaq, tikmək, qurmaq bu nadir insanın həyat amalı olmuşdur. Respublikada dövlət idarəçiliyi və iqtisadiyyatın müxtəlif sahələrində səmərəli fəaliyyət göstərmiş, uzun illər ərzində təqdirəlayiq xidmətləri ilə ölkənin ictimai-siyasi həyatına layiqli töhfələr vermiş Kamran Əsəd bəy oğlu Hüseynov 1913-cü il dekabrın 15-də Zəngəzur qəzasının (indiki Qubadlı rayonunun) Çərəli kəndində anadan olmuşdur. Əmək fəaliyyətinə gənc yaşlarından başlamış, 1934-cü ildən etibarən isə Bakının neft sənayesində müxtəlif vəzifələrdə çalışmışdır. 1938-1940-cı illərdə Xarkov İnşaat Mühəndisləri İnstitutunda, 1940-1941-ci illərdə Azərbaycan Sənaye İnstitutunda təhsil almışdır. 1949-cu ildə Azərbaycan Dövlət Pedaqoji İnstitutunun tarix fakültəsini və respublika Ali Partiya Məktəbini bitirmişdir.
   O, çalışdığı bütün sahələrdə yüksək peşəkarlıq, təşkilatçılıq qabiliyyəti nümayiş etdirmişdir. Sumqayıt, Mingəçevir, Naftalan kimi yeni yaşayış məntəqələrinin salınmasında, onların iri yaşayış, sənaye-mədəniyyət mərkəzlərinə çevrilməsində Kamran Hüseynovun səmərəli xidmətləri olmuşdur. O, 1970-80-ci illərdə Ulu Öndər Heydər Əliyevin rəhbərliyi altında respublikamızda başlanmış geniş quruculuq işlərində yaxından iştirak etmişdir.
    Kamran Hüseynov sovet və Azərbaycan nümayəndə heyətlərinin rəhbəri kimi dünyanın bir çox ölkələrində keçirilən müxtəlif tədbirlərdə iştirak etmişdir. O, Azərbaycan Ağsaqqallar Şurası İdarə heyətinin üzvü kimi gənc nəslin Vətənə, müstəqil dövlətçiliyimizə məhəbbət ruhunda tərbiyəsi üçün öz dəyərli məsləhətlərini əsirgəməmişdir. Kamran Hüseynovun hələ sağlığında yazıb çap etdirdiyi "Bir ömrün salnaməsi" və "Quruculuğa həsr olunmuş ömür" kitabları son illər yazılıb ortaya çıxarılmış xatirə ədəbiyyatımızın ən yaxşı nümunələrindəndir.
   Kamran Hüseynov respublika hökumətində təhsil, mədəniyyət sahələrinə rəhbərlik etdiyi 13 ildə ziyalıların ən böyük dostlarından olmuşdu. Ona ən böyük dəyəri də təkcə Azərbaycan dövləti yox, həm də elə bu işıqlı düşüncəli aydınlar vermişdi. Xalq şairi Bəxtiyar Vahabzadə bu ictimai xadim haqqında belə deyidi: «Sən öz ədalətin və həqiqətsevərliyinlə, xeyirxahlığın və alicənablığınla, işlədiyin bölgələrdə qurduğun fabrik və zavodlarla, mədəniyyət sarayları və xəstəxanalarla, məktəb və uşaq bağçaları ilə özünə abidə ucaltmısan. Sənin bu əməllərin dərin hörmətini qazandığın xalqının yaddaşında əbədi yaşayacaq. Çünki sən xalqının böyük oğlu, Vətənin əsil vətəndaşısan.» Bəli, o, dövlətinə, Prezidentinə, millətinə, ənənələrinə, xalqına sadiq vətəndaş olmuşdur. Mən və ailəmiz həmişə fəxr edirik ki, atamıza həm xalq, həm də dövlət yüksək qiymət verir və dəyərləndirir.
   Atam Kamran Hüseynov, dövrünün tanınmış ictimai –siyasi xadimi olmaqla yanaşı, şerə, sənətə böyük önəm verirdi. Qubadlıya, onun bərəkətli torpağına, saf suyuna, təravətli çiçəklərinə o qədər vurğun idi ki, şerlər yazır, fəlsəfi düşüncələrini qələmə alırdı. O, doğma yurdunun təbiətinə, dağına, gülünə o qədər vurğun idi ki, həyatında ilk və son şerini də məhz Qubadlının Hərtiz dağına həsr etmişdi. Bu kəndin, təbiətin həsrətinə dözməyən Kamran müəllim yazırdı ki,Səndən ayrıldığım xeyli müddətdir,Vətən ayrılığı nə böyük dərddir.
   Bəli, Vətən həsrəti çox çətindir. Bir an belə ruhdan düşmürdü, inanırdı ki, Vətəninə qovuşacaq. Elə bu niyyətlə “Zəngəzur ”cəmiyyəti yaratdı. Gənclərimiz yaddan çıxarmasın, tariximizi unutmasınlar deyə, böyük təbliğat işləri aparırdı. 2020-ci il oktyabrın 25-də Qubadlı işğaldan azad edildi. Əlbəttə, bu xəbər hər kəsi sevindirdi. Qubadlının işğaldan azad edilməsi təkcə bu həsrətlə yaşayanları deyil, həm də bu arzu ilə dünyadan köçən narahat ruhları da sevindirir. Bu gün mənim atamın, nənəmin də ruhu şaddır. Artıq torpaqlarımız düşmən tapdağından azad olunub, nəfəs alır, sanki biz də yenidən cavanlaşırıq, Yeni arzular, yeni planlarla yaşayırıq! Bizə bu möhtəşəm hissləri yaşadan başda Ali Baş Komandan İlham Əliyev olmaqla, hər bir əsgərimizə, zabitimizə təşəkkür edirik! Şəhidlərimizin qarşısında baş əyirik! Qazilərimizə Allahdan şəfa diləyirik!
Bu gün Kamran Hüseynov ocağının nümayəndələri, onun övladları, nəvələri fəxr edir ki, o, vətənə, xalqa layiqli xidmət edən, şərəfli ömür yaşayan bir insan və ictimai-xadim kimi xatirələrdə əbədi yaşayacaq!"

Sabaha-inamla.az



Baxış sayı: 90


Bölməyə aid digər xəbərlər