22:20 / 15-05-2022
Tramp tviterə qayıtmayacaq
16:05 / 15-05-2022
Renat İbrahimov vəfat edib
Döyüşçülərimizə “dil uzadanlar” ən ağır şəkildə cəzalanmalıdır - Rey Kərimoğlu
Tarix: 18-01-2022 01:19 | Bölmə: Cəmiyyət



“Son vaxtlar Azərbaycanda şəhidə, qaziyə, müharibə veteranına, hərbçilərə dil uzadanların olduğunu görürük. Onlara qarşı qanunla sərt cəzalar tətbiq olunmalıdır”.

Bu sözləri Bakupost.az -a “Qarabağ qaziləri” ictimai birliyinin mətbuat xidmətinin rəhbəri, qazi, jurnalist Rey Kərimoğlu sosial şəbəkələrdə maxelərə, hərbçilərə,qazilərə qarşı səsləndirilən təhqiramiz fikirlərə münasibət bildirərkən deyib.
Onun sözlərinə görə, hansısa qüvvələr qəhrəmanlarımızı gözdən salmağa çalışır:

“Yazıqlar olsun ki, 44 günlük Vətən Müharibəsindən sonra da bu davam etdi. Ümumiyyətlə, araşdıranda baxırsan ki, bu təbəqəyə dil uzadanların heç biri müharibə insanları deyil, yaxınlarından da kimsə müharibədə iştirak etməyib və müharibənin ağrı-acısının nə olduğunu bilmir. Bunlar bəzən bilərəkdən, bəzən isə bilmədən bunu edirlər. Çox heyf ki, bilərəkdən, qəsdən edənlər çoxdur. Bu ölkənin Milli Qəhrəmanları, şəhidləri var ki, adları bir dünya boydadır. Bunlar adətən o insanlara çamur atırlar ki, millətin dəyərlərini gözdən, hörmətdən salsınlar. Azərbaycanı sevməyən qüvvələr tərəfindən zaman-zaman bu planlı şəkildə həyata keçirilir. Lakin təəssüf ki, Azərbaycanda da bunun təsirinə düşən nadürüstlər, yaramazlar və nadanlar var. Konkret olaraq maxelərlə bağlı səsləndirilən fikirlərə gələndə isə deyə bilərəm ki, o mənfi sözləri deyən adamlar heç bilmir maxe sözü nədir".



Rey Kərimoğlu vurğulayıb ki, maxelər müddətdən artıq hərbi qulluqçulardır və bu gün əllərində silah, əsgərlərlə çiyin-çiyinə Kəlbəcərdə, Laçında ön cəbhədə postdadırlar:

"Maxelər illərdir Vətən uğrunda can verirlər, can alırlar. 44 günlük Vətən Müharibəsində 700 nəfərə yaxın maxe şəhid, çoxu da qazi olub. Yəni, maxelər haqqında mənfi danışan adamlar səviyyəsiz, savadsız danışığını bilməyənlərdir. Görünür ki, kiminsə şəxsən hansısa bir maxe ilə problemi olub və o problemdən çıxış edərək belə xoşagəlməz, mənfi ifadələr işlədib. Konkret olaraq bir nəfərin üzərində dayanıb məsələyə münasibət bildirmək fikrindən uzağam. Amma Azərbaycan Silahlı Qüvvələrinin tərkibində xidmət edən, Vətən Müharibəsində iştirak edən, yaxud etməyənlərin hamısı bu gün Azərbaycan dövlətini, sərhədlərini qoruyurlar, onun uğrunda can verməyə hazırdılar. Həmçinin onların bir hissəsi də can veriblər. Bu məsələlər çox ciddidir. Bəzi insanlar elə başa düşür ki, ölkədə bu məsələnin fərqinə varmayanlar var, amma həm dövlət, həm də cəmiyyətdə bu məsələnin kifayət qədər fərqinə varan insanlar var. Şəhidə, qaziyə, veterana, hərbi qulluqçuya dil uzatmaq olmaz".




Jurnalist qeyd edib ki, dövlət şəhidlərin, qazilərin şərəfini qorumalıdır:

"Şəhidə, qaziyə, hərbi qulluqçuya edilən mənfi hərəkət, dövlətə qarşı edilmiş kimi qəbul edilir və bu maddə ilə cinayət açılır, onlara qarşı tədbir görülür. Yəni, şəhidlik, qazilik Allah yanında bir məqamdır. Peyğəmbərimiz deyir ki, Vətəni qorumaq imandandır. Bunlar həm də dövlət atributlarıdır. Necə ki, Azərbaycan qanunvericiliyində bayrağa, himnə, gerbə həqarət etmək olmaz, bu cinayət sayılır, eləcə də şəhidlər, qazilər, hərbi qulluqçular qanunla bu sıralara qatılmasını istərdim. Şəhidlər, qazilər dövlət atributlarıdır. Onlara dil uzatmaq, toxunmaq olmaz. Toxunanlar ciddi cəzalanmalıdırlar. Mən arzu edirəm ki, şəhidlər, şəhid ailələri, qazilər, veteranlar, hərbi qulluqçuların şərəf və ləyaqəti, adları qanunla sərt şəkildə qorunsun və onlara qarşı təhqiramiz hərəkət edən hər kəs qanun qarşısında cavab versin”.


Baxış sayı: 87


Bölməyə aid digər xəbərlər