18:00 / 16-02-2020
İranda güclü zəlzələ
19:12 / 15-02-2020
Rafael Ağayev finalda
13:38 / 15-02-2020
Sabah sınaq imtahanı var
Qərbi Azərbaycan İcmasının Qadınlar Şurası yaradıldı
Tarix: 25-12-2019 23:13 | Bölmə: Siyasət

 Yığıncaqda açıq səsvermə ilə Nəsibə İsrafilqızı Qərbi Azərbaycan İcması Qadınlar Şurasının sədri seçildi
 
 Dekabrın 22-də Qərbi Azərbaycan İcmasının Qadınlar Şurasının təsis yığıncağı keçirildi. Yığıncaqda fəaliyyətləri və imzaları ilə ölkənin elmi, ictimai, ədəbi və mədəni həyatında yaxşı tanınan xanımlar iştirak etdilər.
  Qərbi Azərbaycan İcmasının sədri Əziz Ələkbərli yığıncağı giriş sözü ilə açaraq Qərbi Azərbaycan İcmasının məram və hədəfləri barədə yığıncaq iştirakçılarına ətraflı məlumat verdi. O bildirdi ki, Qərbi Azərbaycan İcmasını yaratmaqda məqsəd son 200 il ərzində işğal olunmuş tarixi torpaqlarımız uğrunda mübarizə aparmaqdır. Bu mübarizənin tərkib hissəsi kimi, insanlarımızın o torpaqlara bağlılığını gücləndirmək, yeni nəsli Qərbi Azərbaycan uğrunda mübarizə ruhunda tərbiyə etmək və baba-nənələrimizin minillər boyu yaratdıqları Qərbi Azərbaycan dəyərlərinə sahib çıxmaq, onları qoruyub saxlamaq və yaşatmaqdır. Əziz Ələkbərli xüsusi olaraq vurğuladı ki, “Əgər hər güclü kişinin arxasında güclü bir qadın 



dayanırsa, hər güclü təşkilatın da arxasında güclü bir Qadınlar Şurası dayanmalıdır” və ümidvar olduğunu bildirdi ki, bu gün mötəbər heyətlə bu tədbirdə iştirak edən Qərbi Azərbaycan xanımlarının bu gün təsis edəcəyi Qadınlar Şurası Qərbi Azərbaycan İcmasının döyünən ürəyi olacaqdır.
  Yığıncaqda açıq səsvermə ilə Nəsibə İsrafilqızı Qərbi Azərbaycan İcması Qadınlar Şurasının sədri, Rəhilə Abdullayeva və Teyfə Zilfiqarova sədr müavinləri seçildilər. Şura üzvləri Flora Xəlilzadə, İradə Rzazadə, Məhluqə Qaramanlı, Elza Orucova, Azadə Novruzova, Leyla Abdullayeva, Səadət Məhərrəmqızı, Pərvanə Zəngəzurlu, Sevil Məmmədova, Səmayə İsmayılova, Rəfiqə Göyçəli, Nüşabə Qələndərli, Şəfəq Nəcəfova, Roza Əhmədova, Azadə Novruzova, Cəmalə Nəbiyevaə və Maarifə Rzayeva seçildilər. Etika Akademiyasının prezidenti Günel İbrahim isə Şuranın Fəxri üzvü seçildi.
 
Qərbi Azərbaycan İcması Qadınlar Şurasının sədri Nəsibə İsrafilqızı yığıncaq iştirakçılarını salamlayaraq ilk sözü əməkdar jurnalist Flora Xəlilzadəyə verdi. Flora xanım Qərbi Azərbaycan haqqında xatirələrindən kövrək hisslərlə bəhs edərək o torpaqlara təkrar qayıtmaq ümidilə yaşadığını dəfələrlə vurğuladı, həm Qərbi Azərbaycan İcmasının, həm də onun Qadınlar Şurasının yaradılmasını son dərəcə vacib hesab etdi.
  Sonra isə söz Vətəndaşların Sosial Rifahı Naminə İctimai Birliyinin sədri İradə Rzazadəyə verildi. İradə xanım da öz növbəsində bu möhtəşəm yığışacağın bu gün araya-ərsəyə gəlməsində Əziz Ələkbərliyə təşəkkür etdi və Nəsibə xanımı seçdikləri üçün hamıya təşəkkür etdi, ümidvar olduğunu bildirdi ki, Nəsibə xanım bu cətin və şərəfli işin öhdəsindən layiqincə gələcəkdir.
  Tanınmış QHT rəhbəri, Əlil Qadınlar Assosiasiyasının prezidenti Məhluqə Rəhimova (Qaramanlı) da öz növbəsində Şuranın işinə uğurlar arzuladı və hər kəsin əlindən gələn dəstəyi göstərməli olduğu fikrini dönə-dönə səsləndirdi, özünün və rəhbəri olduğu təşkilatın dəstəyini əsirgəməyəcəyinə söz verdi.
  Elza Qüdrətqızı öz çıxışında ata-baba yurdu Zəngəzur torpaqları haqda bəhs edərək əmin olduğunu bildirdi ki, Qərbi Azərbaycan uğrunda mübarizə bizim haqq işimizdir və bu gün təsis edilən Qadınlar Şurası Qərbi Azərbaycan İcmasının fəaliyyətinə hər cür dəstək olmalıdır.
  Sonra söz alan Səmayə İsmayılova işlədiyi İrəvan Dövlət Azərbaycan Dram Teatrı haqqında geniş məlumat verdi, bildirdi: “Müğənni olmağıma baxmayaraq, bəxtimdən, taleyimdən, səsimdən və sənətimdən küskünəm. Necə illərdir mən bu torpaqlar haqqında oxuya bilmirəm. Ürəkdən söz gəlmir. Vətən olmayınca oxunan mahnılar da ürəkdən gəlmir”.
  Texnika elmləri namizədi Rəhilə Abdullayeva da öz növbəsində Azərbaycan Qaçqınlar Cəmiyyətinin və Qərbi Azərbaycan İcmasının fəaliyyətindən razılığını bildirdi. Cəmiyyətin sədrinə yaratdığı şəraitə və qadınları bir araya gətirdiyinə görə təşəkkürünü bildirdi.
  Aşıq Pəri məclisinin sədri Pərvanə Zəngəzurlu çıxış edərək illərdən bəri vətən həsrətiylə göynədiyini dilə gətirdi, sevgi şeirlərindən belə vətən həsrəti gəldiyini bildirdi, o torpaqlara qayıtmaq üçün var güvüylə çalışacağına söz verdi.
  Şairə xanım Sevda İbrahimli öz kövrək şeirləri ilə xoş bir ab-hava gətirdi.
  Respublika Ombustman Aparatından Azadə xanım Novruzova çıxış edərək öz ürək sözlərini çatdırdı və bildirdi ki o da bizim yanımızdadır. Əlindən gələn köməyi etməyə hazırdır.
  Rəqibə xanım öz çıxışında Qərbi Azərbaycan qadınlarının hər birini salamladı və buraya bu qədər mötəbər, bir-birindən dəyərli xanımların yığılmağından məmnun olduğunu bildirdi. Şuranın bütün tədbirlərlərinə dəvət olunmasını xahiş etdi, imkan yaradasınız iştirak edim bir birimizdən xəbərimiz əlaqəmiz olsun.
  Aida xanım: “Bu gözəl təşəbbüs coxdan olmalı idi, gecikmişik, buna baxmayaraq xoşbəxtəm ki , bu gün bura yığılmışıq. Bu gün mən burada vətən ətri,torpaq hənirtisi hiss elədim, kövrəlirəm, qəhərlənirəm, amma bu günü mən ömürdən saymıram, çünki bu gün biz buradayıq və el qızlarımızın arasındayıq”, – dedi.
  Tədbirin gedişində Türkiyədən canlı bağlantı yaradıldı və əslən Amasiya rayonunun Qaraçanta kəndindən olan Türkiyənin görkəmli ictimai-siyasi xadimi, bir dönəm əvvəl Qars bələdiyyə başqanı olan Murtaza Qaraçanta tədbir iştirakçılarını salamladı, xanımlara işlərində uğurlar arzuladı. Əvvəlki bağlantıda Qərbi Azərbaycan İcmasının nümayəndələrini Türkiyəyə dəvət etdiyini xatırlatdı və bu gün də Qadınlar Şurasının nümayəndələrini qardaş Türkiyəyə dəvət etdi.
  Sonda tədbir saatlarla çay süfrəsi arxasında davam etdi. Hiss olunurdu ki, heç kəs dağılmaq istəmir. Çünki Azərbaycan Qaçqınlar Cəmiyyətinin və Qərbi Azərbaycan İcmasının ofisi həmin gün hamı üçün kiçik bir Vətən idi, bura toplananlar isə illərin Vətən həsrətliləri idilər.
  Analoq.az






Baxış sayı: 429


Bölməyə aid digər xəbərlər
11-01-2020, 17:49 İsa Qəmbərin rəqibləri