Sumqayıtda şəhidin doğum günü keçirildi-FOTOLAR
Tarix: 12-06-2022 23:55 | Bölmə: Reportaj

Sumqayıtda "Poeziya evi"ndə şəhidlik zirvəsinə ucalmış Kərim Əhmədəliyevin doğum günü keçirilib.
  "Poeziya evi"nin, 35, 14 nömrəli tam orta məktəblərin təşəbbüsü və təşkilatçılığı ilə keçirilən tədbirdə şəhidin təhsil aldığı ali məktəbin müəllimi Zeynəb müəllimə,şəhidin sinif rəhbəri Rəfiqə müəllimə, şəhidin sinif yoldaşı olmuş Leyla xanım onunla bağlı xatirələrini danışıblar.



   Müğənni Arif Səlimov şəhidlər haqqında mahnı ifa edib, əməkdar artist Mehriban Xanlarova şəhidlər haqqında danışıb , qiraətçi-aktyor, Respublika şeir müsabiqəsinin qalibi Əliağa Tapdıqlı Azərbaycan Bayrağı şeirini (müəllif Ramiz Qusarçaylı) söyləyib ,aktyorlar Şəhla Məmmədova, Adil Səfərov şəhidlərə həsr olunmuş kompazisiya nümayiş etdiriblər. Soltan Hacıbəyov adına Musiqi Kollecinin tələbələri Fərid İmranlı(tar),Mahir Quliyev(kamança),Kənan Kərimov(xanəndə),Aydan Salahova(xanəndə) isə "Xudayar" təsnifini və "Sarı bülbül" mahnısını ifa ediblər.


35 nömrəli tam orta məktəbin ibtidai sinif şagirdlərinin söylədiyi vətənpərvər ruhlu şeirlər tədbir iştirakçıları tərəfindən maraqla qarşılanıb.
    Sonda şəhid anası Ceyran Axundova şəhidimizin doğum günü olduğunu vurğulayıb. Və qeyd edib ki, şəhidlərimizin xatirəsini hər zaman əziz tuturuq və tutacağıq.
Kərim Rövşən oğlu Əhmədəliyev 1998-ci il iyunun 12-də Sumqayıt şəhərində anadan olub. 2005-2016-cı illərdə Sumqayıt şəhərində 5 nömrəli tam orta məktəbdə təhsil alıb. 2016-2020-ci illərdə isə Azərbaycan Texnologiya Universitetində (ATU) "Menecment" ixtisası üzrə ali təhsil alıb. Subay idi.
Kərim Əhmədəliyev 2020-ci ildən Azərbaycan Silahlı Qüvvələrinin "N" saylı hərbi hissəsində müddətli həqiqi hərbi xidmətdə idi.


Azərbaycan Ordusunun əsgəri olan Kərim Əhmədəliyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Suqovuşanın azadlığı uğrunda gedən döyüşlərdə savaşıb. Kərim Əhmədəliyev oktyabrın 4-də Suqovuşan döyüşləri zamanı şəhid olub. Sumqayıt şəhərinin Şəhidlər Xiyabanında dəfn olunub.


Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Kərim Əhmədəliyev ölümündən sonra "Vətən uğrunda" medalı ilə təltif edildi.
Namiq MƏMMƏDLİ
Sabaha-inamla.az


https://www.facebook.com/namiq.memmedli.9/videos/327365702902109
https://www.facebook.com/namiq.memmedli.9/videos/438779310957787
https://www.facebook.com/namiq.memmedli.9/videos/546176200329649


















Baxış sayı: 232


Bölməyə aid digər xəbərlər