Vətən müharibəsi şəhidi Yusif Cəfərovun xatirəsinə inşa edilən bulaq istifadəyə verilib
Tarix: 26-04-2022 22:51 | Bölmə: Reportaj


    Şirvanda Vətən müharibəsi şəhidi Yusif Cəfərovun doğum günündə xatirəsi yad olunub. Həmçinin şəhidin adının əbədiləşdirilməsi üçün inşa edilən bulaq istifadəyə verilib.
    AZƏRTAC-ın bölgə müxbiri xəbər verir ki, şəhid Yusif Cəfərovun anım günündə ailəsi ilə bərabər Şirvan Şəhər İcra Hakimiyyətinin başçısının müavini Aynur Fərzəliyeva, YAP Şirvan şəhər təşkilatının sədri Zahir Qəhrəmanov, şəhid ailələri, veteran və qazilər, ictimaiyyət nümayəndələri iştirak ediblər. Şəhidlər xiyabanında şəhidin məzarı üzərinə gül dəstələri düzülüb və şəhidlərin xatirəsi sükutla anılıb.
    Çıxış edənlər Yusif Cəfərovun həyatından, Vətənə olan sevgisindən və döyüşlərdə göstərdiyi şücaətdən söhbət açıblar. Bildirilib ki, o, 1996-cı il aprelin 25-də dünyaya göz açıb. Hələ kiçik yaşlarından vətənpərvərliyi ilə seçilib. 2020-ci il sentyabrın 27-də başlanan Vətən müharibəsi zamanı cəbhəyə yollananlar sırasında Yusif də yer alıb. O, Zəngilan, Qubadlı, Cəbrayıl Xocavənd döyüşlərində xüsusi qəhrəmanlıq göstərib. Yusif qəhrəmancasına döyüşərək şəhidlik zirvəsinə ucalıb. Döyüşlərdə göstərdiyi şücaətə görə “Vətən uğrunda”, "Cəsur döyüşçü", “Cəbrayılın azad olunmasına görə” və “Qubadlının azad olunmasına görə” medalları ilə təltif edilib.
    Yusiflə bağlı xoş xatirələrini bölüşən şəhid anası oğlunun mərdliyindən, vətənpərvərliyindən, şərəfli ömür yolundan danışıb. Gülbəniz xanım şəhid ailələrinə, qazilərə və müharibə iştirakçılarına göstərilən diqqət və qayğıya görə Müzəffər Ali Baş Komandan, Prezident İlham Əliyevə və Birinci vitse-prezident Mehriban xanım Əliyevaya təşəkkürünü bildirib.
    Şirvan Şəhər İcra Hakimiyyəti başçısının müavini Aynur Fərzəliyeva ərazi bütövlüyümüz uğrunda həyatlarının ən gözəl çağında canlarından keçərək şəhadətə yüksələn şəhidlərimizin xatirəsinin daim əziz tutulacağını, hər zaman dərin ehtiramla yad ediləcəyini söyləyib.
    YAP Şirvan şəhər təşkilatının sədri Zahir Qəhrəmanov və Səfərbərlik və Hərbi Xidmətə Çağırış üzrə Dövlət Xidmətinin Şirvan şəhər şöbəsinin rəisi İlkin Məmmədov çıxış edərək böyük Qələbəni bizlərə yaşadan, azad olunmuş torpaqlarımızda üçrəngli bayrağımızı yenidən dalğalandıran, şanlı ordumuzun gücünü düşmənə bir daha göstərən igidlərimizin qəhrəmanlıq tariximizi yenidən yazdıqlarını bildiriblər.
    Daha sonra şəhidin böyüyüb boya-başa çatdığı evin qarşısında onun xatirəsinə inşa edilən bulağın açılışı olub. Sonda isə şəhidin xatirəsinə iftar süfrəsi açılıb.

Sabaha-inamla.az












Baxış sayı: 84


Bölməyə aid digər xəbərlər