Sürətli şahmat üzrə “Zəfər kuboku” onlayn turnirə start verildi
Tarix: 16-04-2021 14:30 | Bölmə: Reportaj


14 aprel 2021-ci il tarixində Bakı şəhər Gənclər və İdman Baş idarəsi və Sumqayıt şəhər Gənclər və İdman Baş idarəsinin təşkilatçılığı ilə Zoom internet portalı üzərində sürətli şahmat üzrə “Zəfər kuboku” 18 yaşadək oğlan və qızlar arasında onlayn turnirin açılış mərasimi keçirilmişdir.
Tədbir iştirakçıları ilk öncə Azərbaycan Respublikasının ərazi bütövlüyü uğrunda qəhrəmancasına həlak olmuş şəhidlərimizin əziz xatirəsini bir dəqiqlik sükutla yad etmişdilər.


Yarışın açılış mərasimində çıxış edən Bakı şəhər Gənclər və İdman Baş İdarəsinin rəisi Raqif Abbasov, Sumqayıt şəhər Gənclər və İdman Baş İdarəsinin rəisi Elgün Hümbətov, Şahmat üzrə yeniyetmələrdən ibarət milli yığma komandanın baş məşqçisi Fərid Abbasov, Boks üzrə Afina Yay Olimpiya Oyunlarının bürünc mükafatçısı Fuad Aslanov, yarışların baş katibi Fidan Talıbova Azərbaycan dövlətinin bütün sahələrdə olduğu kimi, idman sahəsində də əldə olunan nailiyyətlərin ulu öndər Heydər Əliyevin adı ilə bağlı olduğunu qeyd etmişlər. Natiqlər çıxışında bildirdilər ki, məhz bu dahi şəxsiyyətin idmana və bədən tərbiyəsinə göstərdiyi diqqət və qayğı Azərbaycan idmanını yüksək zirvəyə qaldırmışdır. Eyni zamanda şahmatın yüksək inkişafının bünövrəsini də Ulu Öndərimizin adı ilə bağlı olduğunu vurğulamışlar. Xalqın intellektual inkişafında şahmatın çox mühüm əhəmiyyətini yüksək qiymətləndirən və ölkənin beynəlxalq aləmdə tanıdılması işində şahmatın oynaya biləcəyi rolu zamanında layiqincə dəyərləndirən Azərbaycan xalqının ümummilli lideri Heydər Əliyevin uzaqgörən siyasəti və qoyduğu bünövrənin bu gün öz bəhrəsini verdiyini və ölkə başçısı cənab İlham Əliyevin bu siyasəti uğurla davam etdirdiyini qeyd etmişlər.


Daha sonra çıxışçılar Ali Baş Komandan, Prezident İlham Əliyevin rəhbərliyi ilə Azərbaycan Ordusu canı-qanı bahasına Ermənistan Ordusunun məğlubedilməzliyi barədə illərdir formalaşdırılmış mifi 44 günə dağıtdığını, bütün qüvvələri Azərbaycan xalqının iradəsi ilə hesablaşmağa vadar etdiyini, Azərbaycanın ərazi bütövlüyünün bərpa olunduğunu qeyd etdilər və onlayn formatda yarış koronavirus infeksiyasının ölkəmizdə yarada biləcəyi təhlükənin qarşısının alınması məqsədilə bütün təhsil müəssisələrində tədris, təlim-tərbiyə prosesi müvəqqəti olaraq dayandırıldığından məktəblilərin ev şəraitində vaxtlarını daha da səmərəli keçirməsi, onların müasir texnologiyalardan istifadə etməklə yarış təcrübələrinin artırılması üçün təşkil edildiyini vurğulamışlar.
Sonda çıxış edən şahmat üzrə yarışların baş hakimi və Sumqayıt şəhərinin baş məşqçisi İlham Əliyev yarışın keçirilmə qaydaları haqqında ətraflı məlumat verərək
idmançıların hər birinə uğurlar arzuladı və yarışın mükafatlandırma mərasiminin yaxın vaxtlarda Bakı şəhər Gənclər və İdman Baş idarəsində keçiriləcəyini bildirdi.
Maraqlı idman mübarizəsi şəraitində keçən turnirdə qızlar arasında Aytac Kərimli (7.5 xal, Sumqayıt) birinci, Xanım İsmayılova (6.5 xal, Bakı) ikinci, Nurtən Nuriyeva (6 xal, Sumqayıt) isə üçüncü yeri tutmuşlar. Oğlanların mübarizəsində isə Sumqayıt idmançıları Rüstəm Rüstəmov (8 xal), Yunis Mahmudzadə (7 xal) və İlknur Məmmədov (7 xal) müvafiq olaraq birinci, ikinci, üçüncü yerlərə layiq görülmüşlər.


Sabaha-inamla.az






Baxış sayı: 71


Bölməyə aid digər xəbərlər