Sumqayıtda şəhidin doğum günü və baralyefinin açılışı oldu
Tarix: 17-10-2021 11:33 | Bölmə: Gündəm

Sumqayıtda şəhidlik zirvəsinə ucalmış Rüfət Əbülfət oğlu Əhmədzadənin doğum günü qeyd olunub və baralyefinin açılışı ilə bağlı möhtəşəm tədbir olub.
              
     Əvvəlcə şəhidin məzarını ziyarət ediblər. Sonra onun yaşadığı 42-ci məhəllədə baralyefinin açılışı olub. Tədbirdə şəhid ailələri, qazilər, Sumqayıt şəhər İcra Hakimiyyətinin nümayəndəsi, oxuduğu 31 nömrəli məktəbin rəhbərliyi, mərkəzi kitabxananın rəhbərliyi, şəhidin sinif yoldaşları, ictimayyət nümayəndələri, ziyalılar, jurnalistlər iştirak ediblər.      Tədbirdə onunla bağlı xatirələr danışılıb, oxuduğu məktəbin şagirdləri şeir söyləyiblər.
Sabaha-inamla.az tədbirdən çəkdiyi şəkilləri və videoları tamaşaçıların nəzərinə çatdırır:
                                           
   
    İşğal olunmuş torpaqlarımızın azad edilməsi uğrunda ordumuzun əks-hücum əməliyyatında şəhidlik zirvəsinə ucalanlardan biri də Rüfət Əhmədzadədir.
Əhmədzadə Rüfət Əbülfət oğlu 2001-ci il, oktyabrın 15-də Sumqayıt şəhərində dünyaya göz açıb. Anası tələbə olduğundan Rüfət baba, nənəsiylə böyüyüb. 6 yaşı olanda valideynlərinin yanına qayıdan Rüfət

                                         

orta təhsilə Sumqayıt şəhər 31saylı orta məktəbdə başlayır. Rüfət oxuduğu müddətdə həm uşaqların, həm də müəllimlərinin sevimlisi imiş.
Anası deyir ki, Rüfət gənc yaşda çoxlarının hörmətini qazanmışdı: “Mən onunla insanlığına, mərhəmətinə, insanlara sevgisinə görə fəxr edirdim, indi də şəhidliyi ilə fəxr edirəm. Hamının sevincinə sevinərdi. Onun arzuları başqalarının sevgisində çiçək açardı elə bil. Birinin bir özəl günundə bir hədiyyə ala bilməyəndə çox üzülərdi, hətta hərbi xidmətdə olanda belə birimizin doğum gününü unutmazdı. Balamdan mənə doğum

                         
günü hədiyyəsi şəkil çərçivəsi qaldı, hansı ki, indi o çərçivəni öz şəkilləri bəzəyir. Böyüsə də hər zaman kövrək olan, hətta ağlamağını gizlətməyən balam uşaq kimi boynuna sarılardı. Heç kəsi incitməzdi, hər kəsi sülhə çağırardı Rüfət. Arzuları özündən böyük olan balamın arzuları böyümədi heç. Fotoqraf olmaq həvəsi hədsiz böyük idi. Maraqlı fotoları çox idi. Harada təbiətin gizli mənzərəsini görsəydi, könül oxşayan şəkillər çəkərdi, amma hərbiyə həvəsi hər şeydən öndəydi. Vətənin şəklini isə qəlbinə çəkmişdi”.
Rüfət 2019-cu il, oktyabırın 23-də həqiqi hərbi xidmətə yollanıb. O, hərbi xidmətdə olanda atası dünyasını dəyişib. Anası deyir ki, atasının ölüm xəbərini ona bildirməyiblər:
“Atasının ölümündən xəbərsiz dünyadan köçən balam üçün şəhid oldu deyə yox, yalan danışdığım üçün göz yaşlarım heç zaman qurumuyacaq. Onun bayrağa bürünmüş tabutunu görəndə vətən uğrunda məndən xəbərsiz böyüdüyünü anladım”.
Rüfət Əhmədzadə sentyabrın 29-da Tərtər- Agdərə istiqamətində gedən döyüşlərdə artilleriya mərmisinin partlaması nəticəsində aldığı qəlpə yarasından şəhid olub. 1 oktyabrda Sumqayıt şəhəri Şəhidlər xiyabanında torpağa tapşırılıb.
Azərbaycan Prezidenti İlham Əliyevin sərəncamı ilə ölümündən sonra "Vətən uğrunda" medalıyla təltif edilib.


Namiq MƏMMƏDLİ
Sabaha-inamla.az


Baxış sayı: 216


Bölməyə aid digər xəbərlər
25-11-2021, 20:14 Prezident görüş keçirdi