"Qarabağ"ın U-19 komandasının baş məşqçisi Samir Musayev 5 oyunluq cəza alıb. Buna səbəb mütəxəssisin hakimi təhqir etməsi olub. "Gənclər Liqası"nda baş tutan "Sabah"la matçın 65-ci dəqiqəsində "Qarabağ"ın futbolçusu Cahid Vəliyev ikinci sarı vərəqə ilə meydandan qovulan zaman, Samir bəy əsəbiləşib. Hakimin qərarına narazılıq edən Musayev onu təhqir etməkdən də çəkinməyib. Nəticədə AFFA-nın İntizam Komitəsi futbolçunu 1, baş məşqçini isə 5 oyunluq "istirahət"ə göndərib. 
Məsələ ilə bağlı Samir bəylə əlaqə saxlayıb fikirlərini öyrəndik. O Sport7.az-a açıqlamasında bunları söylədi: "Əlbəttə, özümü haqlı saymıram. Amma futboldu də, bəzən insan emosiyalarını cilovlaya bilmir. Çünki hakimin qərarı elə oldu ki, əsəbiləşdim. Qərar düzgün deyildi. Hətta rəqib komandanın məşqçiləri, hakimlərə nəzarət edən hakim-inspektor da bunun düzgün olmadığını dedilər. İkinci sarı vərəqə idi, özü də hesabda 0:1 geridəydik. Gülməli, səhv göstərilmiş vərəqə idi. Ona görə də dözə bilməyib, hakimi təhqir etdim. Lakin buna görə özümə haqq qazandırmıram".